Proverb 11
11
1SENYER i deteste en balans ki'n fose;
me en pwa ki zis, i fer li plezir.
2Ler lorgey i vini,
mepri i akonpanny li;
me lasazes i akonpanny dimoun senp.
3Lonnekte i gid sa enn ki zis;
me mesanste sa enn ki fo,
i anmenn son prop destriksyon.
4Larises pa servi dan nanryen zour lakoler i leve;
me lazistis i delivre dan lanmor.
5Lazistis en zonm onnet
i gard li lo bon semen;
me malfeter i tonbe
akoz son mesanste.
6Lazistis en zonm onnet i sov li.
Me en tret i ganny pri dan pyez son prop lanvi.
7Lanmor i met en lafen avek lespwar en malfeter;
lespwar ki i ti met dan son larises i osi ganny detri.
8Sa enn ki zis i ganny delivre dan son traka;
malfeter i vin pran son plas.
9Parol malfeter i kapab detri son prosen;
me leksperyans i sov bann ki zis.
10Lavil i dan lazwa,
ler bann dimoun ki zis i ere.
Zot kontan, ler bann malfeter i disparet.
11En lavil i prospere, gras a son bann zonm drwat.
Me i ganny rinen par labous bann malfeter.
12Sa enn ki mepriz son prosen napa leker,
me en dimoun rezonnab i reste trankil.
13Sa enn ki rakont mansonz i osi devwal sekre;
en konfidan i konn gard en sekre.
14Ler napa bon direksyon,
nasyon i tonbe;
me bokou konseye i asir laviktwar.
15Aksepte pour pey det en etranze i anmenn problenm;
i preferab ki ou refize fer li.
16En zoli fanm i ganny onore;
zonm for i ganny zis larises.
17En bon dimoun i ganny rekonpanse;
me sa enn ki kriyel i anmenn maler lo li.
18En malfeter i travay pour nanryen;
me sa enn ki senm lazistis i ganny en vre rekonpans.
19Sa enn ki fer sa ki zis pou viv;
me sa enn ki prefer sa ki mal pou mor.
20SENYER i deteste dimoun ki fourb;
i kontan dimoun onnet.
21En malfeter pou sirman ganny pini;
me desandans sa enn ki zis pou ganny sove.
22En zoli fanm san zizman
i parey en bag annor dan nennen en koson.
23Sa enn ki zis i kontan fer selman sa ki byen;
En malfeter i trouv son lespwar dan vanzans.
24Sa enn ki donn avek gran ker, i vin ankor pli ris;
sa enn ki pa rann sa ki i dwa, i vin pli pov.
25Sa enn ki zenere pour viv dan lopilans;
sa enn ki donn delo pa pou zanmen swaf.
26Lepep i modi sa enn ki gard son dible;
me i ranpli avek zoli parol pour sa enn ki vann li.
27Sa enn ki rod fer dibyen i ganny faver;
me maler i tonm lo sa enn ki rod fer dimal.
28Sa enn ki met son konfyans dan son larises pou tonbe;
me sa enn ki zis, pou devlope parey feyaz.
29Sa enn ki senm dezord dan son menaz pou rekolte divan;
en fou pour vin serviter en saz.
30Fri en dimoun ki zis, i parey en pye dibwa ki donn lavi;
me vyolans i fini par pran lavi.
31Si sa enn ki zis i ganny rekonpanse lo later,
malfeter ek peser pour osi ganny zot rekonpans.
Currently Selected:
Proverb 11: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
