Proverb 10
10
Proverb lo Lavi Moral
1Proverb Salomon.
En zanfan saz i donn lazwa son papa;
en zanfan bet i sagrin son manman.
2Byen mal aki pa anmenn okenn benefis.
Lazistis i delivre ou dan lanmor.
3SENYER pa les sa enn ki zis mor lafen.
Me i anpes en malfeter ganny sa ki i anvi.
4Lanmen ki pares i anmenn lanmizer;
me lanmen ki travay i anmenn larises.
5Sa ki fer provizyon pandan larekolt i pridan;
me sa enn ki dormi pandan larekolt i fer onte.
6Benediksyon i lo latet sa enn ki zis.
Me labous en malfeter i kasyet vyolans.
7Souvenir sa enn ki zis i anmenn benediksyon.
Me non en malfeter pou tonm an pouritir.
8Leker en saz i aksepte bann komannman;
me sa enn ki rabase pou konn son pert.
9Sa enn ki viv onnetman i mars an sekirite;
me sa enn ki swiv move semen pou ganny pini.
10Sa enn ki bat lizye i anmenn problenm;
labous bann fou i anmenn larin.
11Labous en zis i en sours lavi;
labous en malfeter i kasyet vyolans.
12Laenn i provok lager,
me lanmour i kouver tou lofans.
13Lasazes i lo lalev sa enn ki annan disernman;
me baton i pour ledo sa enn ki mank larezon.
14Konnesans i en trezor pour sa enn ki saz;
me sa enn ki rabase pou anmenn larin.
15Bann byen en ris i son lavil fortifye;
me lanmizer en pov i lakoz son larin.
16Lapey sa enn ki zis i donn lavi;
me saler en malfeter i anmenn li dan pese.
17Sa enn ki aksepte disiplin i lo semen lavi;
me sa enn ki refize ganny korize, pe sorti lo bon semen.
18Sa enn ki kasyet son laenn i en manter.
Sa enn ki fann mansonz i en fou.
19Kot i annan bokou koze,
pese pa manke;
sa enn ki konn kontrol son lalang
i pridan.
20Parol sa enn ki zis i vo plis ki larzan pir;
sa ki en malfeter i mazinen
pa vo nanryen.
21Parol sa enn ki zis i nouri en lafoul;
me bann fou i mor akoz zot latet i vid.
22Benediksyon SENYER i donn larises;
i pa anmenn okenn sagren.
23Sa enn ki bet i kontan fer sa ki mal;
me sa enn ki annan bon rezonnman i pratik lasazes.
24Sa ki en malfeter i per, pou tonm lo li.
Sa ki en zis i swete, i resevwar.
25Ler tanpet i vini, malfeter i fannen;
me sa enn ki zis i reste pour touzour.
26Parey vineg i fer grense ledan
e lafimen i bril lizye,
en travayer ki pares i fer ankoler son met.
27Respe pour SENYER i fer viv pli lontan;
me lavi bann malfeter i ganny rakoursi.
28Lespwar sa enn ki zis i donn li lazwa;
me lespwar en malfeter i fini dan nanryen.
29Bann plan SENYER i protez sa enn ki drwat;
me zot anmenn destriksyon lo bann malfeter.
30Sa enn ki zis pa pou zanmen tonbe;
me bann malfeter pa pou reste dan pei.
31Lasazes i sorti dan labous sa enn ki zis;
me lalang bann manter pou ganny koupe.
32Parol sa enn ki zis i fer plezir;
me lalang bann malfeter i fer dimal.
Currently Selected:
Proverb 10: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
