Psonm 18
18
Remersiman pour Laviktwar
Pour sef lakoral. Lerwa David ti sant sa psonm pour SENYER ler i ti ganny delivre dan lanmen Sail ek lezot son bann lennmi.
1SENYER! Mon kontan ou.
Ou menm mon lafors.
2SENYER i mon Ros protekter,
mon fortres e mon liberater.
I mon Bondye, mon Ros protekter,
kot mon an sekirite.
I mon korn ki delivre mwan; i mon soutyen.
3Mon apel SENYER, mon loue li.
I delivre mwan kont mon bann lennmi.
4Lemonn lanmor ti'n antortiy mwan;
bann gro laroul destriksyon ti fer mwan per.
5Lasenn lemonn lanmor ti'n anmay mwan.
Mon ti'n fini tonm dan son latrap.
6Dan mon detres, mon ti apel SENYER;
mon ti kriy ver mon Bondye pour son led.
Depi son tanp, i ti antann mon lavwa,
e i ti antann mon lapel.
7Alor, later ti tranble e ganny sekwe;
bann fondasyon montanny ti osi tranble.
Zot ti osi sekwe, akoz SENYER ti'n ankoler.
8Lafimen ti sorti dan son nennen,
e labrez ek laflanm ti sorti dan son labous.
9I ti deroul lesyel e i ti desann
avek en nyaz epe anba son lipye.
10I ti mont lo en seriben e i ti anvole.
I ti plannen lo lezel divan.
11I ti anvlop li dan fernwanr.
Bann nyaz epe, ranpli avek delo ti antour li.
12Devan li,
zekler ti anvoy lagrel ek letensel dife
atraver bann gro nyaz.
13Dan lesyel, lavwa SENYER
ti rezonnen parey loraz.
14I ti lans son bann dart e dispers bann lennmi.
I ti lans bann zekler e zot ti taye.
15SENYER! Devan ou bann menas,
devan tanpet ou lakoler,
fon lanmer ti aparet
e fondasyon later ti ganny ekspoze.
16Alor, depi lao dan lesyel,
SENYER ti anvoy lanmen e atrap mwan.
I ti tir mwan dan sa gran kouran delo.
17I ti delivre mwan
dan lanmen mon bann lennmi ki pwisan,
e kont sa bann ki ay mwan,
akoz zot ti tro for pour mwan.
18Zot ti atak mwan zour mon ti dan maler;
me SENYER in vin sekour mwan.
19In tir mwan dan danze, in liber mwan;
in sov mwan, akoz i kontan mwan.
20SENYER i rekonpans mwan
akoz mon'n reste fidel;
i beni mwan akoz mon lanmen i prop.
21Mon'n met an pratik komannman SENYER.
Mon'n reste fidel anver mon Bondye.
22Mon'n gard tou son bann lalwa.
Mon pa'n dezobei son bann regleman.
23Mon san repros devan li.
Mon'n evit fer okenn pese.
24SENYER in war dibyen ki mon'n fer
e in rekonpans mwan,
akoz mon lanmen i prop devan li.
25Ou fidel anver sa enn ki fidel.
Ou bon anver sa enn ki bon.
26Ou pir avek sa enn ki pir;
sever avek sa enn ki rize.
27Ou delivre dimoun ki senp.
Ou fer bann orgeye bes zot lizye.
28SENYER! Mon Bondye!
Ou ki alim mon lalanp.
Ou menm mon lalimyer kan mon dan fernwanr.
29Avek ou led, mon kapab kraz en larme;
avek mon Bondye, mon kapab sot en miray.
30Bondye i en gid parfe.
Bann promes SENYER i vre;
i en proteksyon pour tou
sa bann ki vin pran refiz kot li.
31Lekel ki Bondye apar SENYER?
Lekel ki nou Ros protekter apar Bondye?
32Bondye ki ranpli mwan avek lafors
e i met mwan lo bon semen.
33I fer mwan taye parey en serf
e met mwan debout lo montanny.
34I antrenn mwan pour konba;
i ed mwan redi en fles an bronz.
35Ou donn mwan ou boukliye laviktwar.
Ou soutenir mwan avek ou lanmen drwat.
Ou led in rann mwan for.
36Ou donn plis lespas mon lipye,
e ou anpes mwan tonbe.
37Mon pourswiv mon bann lennmi
e mon atrap zot.
Mon pa retournen ziska ki mon'n fini avek zot.
38Mon aplati zot, zot pa kapab leve.
Mon met zot anba mon lipye.
39Ou ranpli mwan avek lafors pour konba.
Ou fer mon bann lennmi pliye devan mwan.
40Ou fer mon bann lennmi sove devan mwan.
Mon detri mon bann ladverser.
41Zot kriye, me personn pa vin sov zot.
Zot kriy ver SENYER, me i pa reponn zot.
42Mon kraz zot parey lapousyer
ki pe anvole dan divan.
Mon mars lo zot parey labou lo semen.
43Ou delivre mwan kont soulevman lepep.
Ou fer mwan sef bann nasyon.
En pep ki mon pa konnen in vin mon serviter.
44De ki zot antann mon lavwa, zot obei.
Bann etranze i vin flat mwan.
45Bann etranze i perdi kouraz.
Zot sorti an tranblan dan zot landrwa kasyet.
46SENYER i vivan!
Mon rann glwar mon Ros protekter.
Mon egzalte Bondye mon Sover.
47I donn mwan laviktwar lo mon bann lennmi
e fer bann pep soumet anba mwan.
48I delivre mwan kont mon bann lennmi.
I donn mwan laviktwar
lo sa bann ki atak mwan.
I sov mwan kont dimoun ki fer vyolans.
49Pour tousala,
mon pou loue ou parmi bann nasyon
e sant an loner ou non.
50SENYER i donn son lerwa bokou laviktwar.
I montre son fidelite
anver sa enn ki i'n konsakre,
anver David ek son desandans pour touzour.
Currently Selected:
Psonm 18: BSK
Highlight
Share
Compare
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
