TSÜCHITAO 3
3
Nahlemaiye Paodou-apei
1Anahna, Enou ne hi paodou peiyu khesü ngaiwuso, sütao hai teisa nou licho-a bulo. 2Sütao nou neye hrüh shoyu alia savayu sü ne hi pove peilai. 3Rozüyu alia chilee checheyu nasü panou neye thaowua taso; süna haisü ne ngu hinou haolo; ne lethou pei hi rüthou khailo. 4Sükua souloure toulouzü, nenou maivei jüpa ae zhih aveih, alia Ramai nou jüpayu sü ngaoloulai.
5Nevei tsüle veishi nou peia Mapao ye louchelo. Ne lah nevei tsü chokhai touyu nasü lülou chewuso. 6Nenou soupfüyu vah veishi hinou Mapao ye licholo, sükulouzü puhnou neye checheyu ludu nasü ngaopeilai. 7Lah neye tsüveiwe tea chowuso, Mapao ye ngaopilo, ae ashi hinou tavai talo. 8Sünanou ne souke hi soua buyu nasü souvei peilai, alia ne raotaoye souhri peiyu soulai. 9Nevei teidei hinou payu shinamara, potei hi ngaolou raitao ae veikayu nou poa Mapao ye tsükhoua posheela peio. 10Sükua nenou souloure toulouzü, nevei thoubao sü phouloulai, alia nevei darkha dzübvü sü darkhadzü nou külyalai.
11Anahna, Mapao nou tukhayu hai ngaophou moyu souso, Puhvei tudei peiyu hai keinü moyu souwuso. 12Daiolouzü Mapao nou leshiyu maiye tudei peiwe, puo mai linou jüpayu nah hi souyu büa soupeiwe. 13Ratsü ngaolouyu mai alia tsüsü ngaolouyu mai hai asayu maie. 14Daiolouzü sühinou vilouna hai shahu hinou vilouyu najünou veie; alia süna vei hupayu hai sana jünou veipu hie. 15Ratsü hai muteichuh jünou mutei hie, alia nenou jüpa taralinoua poa sünaye nadalou hoe. 16Hrüshoyu hai puh bah zhoulova hi bue, puh bah nalo hisü kini alia tsükhouyu bue. 17Honapai vei ludu sü tavayu ludue, alia honapai vei bo teitei hai kaonayu nasüe. 18Honapaiye tao-a buyu maitao nou puhye sü hriyu süübe teanou kuwe; puhye taochüa buyu maiyesü asayu maitao tea kuwe.
19 Mapao nou deiphao hai puhvei tsüvei nou soushuloue,
puhvei tsüsü nanou raki hai soushu peie.
20Puhvei tsüdo vanou reidzü hai kütaloue,
alia teihao nou vidzü zaokou peie.
21Anahna, nevei ratsü aveih alia tsüvei sü khaitou tilo, sühai sü panou ne nghingao hinou tuta louso. 22Sühai nou neye hriyu sü peilai — savayu ae hüveiyu sü peilai. 23Nevei ludu sü kaozhou veia taloulai, alia ne phisü süloulai moe. 24Nenou chobuyuma ngaopilai moe, nenou dazüyuma vashoa nou züzhi loulai. 25Sümo ngaomo hinou maishi mainou ngaopiha tiyu, alia puhmai nou haka tayu phaki, sükhesü ne ngaopiwuso. 26Daiolouzü Mapao nou neye zhoukao veiyu sü peilai, alia puhnou neye panou rüh hi deloulai moe.
27Mai talinou soukha peiyu jüpa-a buyu phaki, ae süsü nenou soukha lousüyu khouko bulouzü, vah aveih sünasü puh hi soupei moyu sü souso. 28Nevei kinapa mai ali nou soukha peio tea ne hinou kholouzü, ae süsü nenou peilou süa bulouzü, dosho nou peilai tea ponawuso. 29Neye lütei tea ne hinou buyu nevei kinapa mai hi vah ashi soure donou do phousouo. 30Ne hi hashi lia soumoyu maiye qo lia ha-a nou züvaso. 31Zhaipou shiyu maiye thainüso, moyuma puletao nou tayu büa talai tea tsüchoso, 32daiolouzü vah ashi souyu maiye sü Mapao nou ngaora-e, ana checheyu maiye sü Puhnou loucheyu sü bue. 33Mapao vei chaa sü maishiyu maivei ki hi bue, ana Puhnou checheyu maivei ki hisü hra peiwe. 34Maiye konüyu mai hisü puhnou jühnü showe, anou tainou soumai hisü puhvei jüpa hai ngaopeiwe. 35Tsüveiyu mainou tsükhou peiyu sü ngaolai, ana voyu maiwo hraongu ngao-a bailai.
Currently Selected:
TSÜCHITAO 3: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
