TSÜCHITAO 4
4
Ratsü vei Viyu
1Anah maitaore, ne puo nou paodou peiyu khesü keilo, alia tsünghei ngaoloure donou soutaosoua keinoulo. 2Daiolouzü Enou ne hisü tsüsha aveih peiwe: Enou doupeiyu khesü licholo, thaowuso. 3E nahtou soua buyu phaki, apfüpuo vei nahzü touli soua buyu teile hi, 4apuo nou Eye paodou peie. Puhnou haibüa paoe, “Enou doupeiyu khesü licholo ae sütao hai ngaikhai touso. Enou kharochi peiyu khesü zülo, sükulouzü ne hriloulai. 5Enou paodou peiyu khesü ngaiwuso, alia amü nou paopeiyu chipaotao hinou tavai tawuso. Tsüvei polo; alia tsünghei ngaolouo. 6Sünaye thaoso, sükulouzü sünanou neye vupeilai; sünaye leshilo, sütoulouzü puhnou neye khopeilai. 7Tsüvei loure vei beirai sü haide: Tsüvei polo, alia hataralia nenou poloulai toulouzü, tsünghei nou polouo. 8Sünaye mutei shoa popeio, sütoulouzü puhnou neye pokupa peilai; nenou puhye kholoure toulouzü, puhnou neye tsükhouyu sü peilai. 9Puhnou neye zhai veishoyu poupa raizaoli toupeilai, puhnou neye hüvei shoyu vepeirü rüpeilai.”
10Keilo, anahna. Enou ne hi paopeiyu chipaotao hai soutaosou polo, sükulouzü ne hai hrüh sho-a nou hrüloulai. 11Enou ne hi ratsü alia kaozü hinou hrüloure vei ludu sü doupeiwure. 12Nenou tayu phaki, ne phi süloulai moe; alia nenou tutayuma, hraloulai moe. 13Paodou peiyu khesü soutaosoua potou tilo, panou tala tasho; puhye kholo, daiolouzü puhsü nevei ahri nasüe. 14Maishiyu maivei ludu hi talouso, alia ashi souyu maivei zhaidou douso. 15Sünasü tavailo; sühi lou tasouo; sühinou tareilo alia tacho talouo. 16Daiolouzü puhmai nou vah kaomoli soumosa sü zhithou louhoe; puhtao nou maiye panou phi sühlou mosa puletao hai zaihea bubaiwe. 17Daiolouzü puletao sü mai ashi maivei raokhao touwe, alia lekhashi maivei zhaoh sowe.
18Ana acheche maivei luduwo teinghi payu büe, hea touchü hi koumo koute valailai payu kue. 19Mai ashi maivei luduwo khei touchü zhiteiyu büa baie. Puletao nou dai hinou hraloua kaodu taresa touyua sümoe.
20Anahna, Enou paoyu chi khesü leloua polouo; avei chipaotao hai keilo. 21Sütao sü panou ne nghingao hinou latasouo; sütao hai licholo alia nevei lüthou hi pokhailo. 22Daiolouzü honaye ngaolouyu mai hai hriloulai, alia puhye donou sou souvei peilai. 23Nevei tsüle hai tsüreia khailo, daiolouzü sühinou ahri dzünghou küpawe. 24Cheche moyu chipao ali-a paokhai tiso, da-a nou kheirei soua chiphayu hai ne hinou doushoa polaiwuo. 25Ne nghithou panou nghoujülo toutei teanou zhulo, alia nevei nghithou hai panou ne nghoujülo züsha tea nou zhuloua baio. 26Nenou souyu vah haso khesü soutaosou chotou tilo, sütou louzü nenou soupfüyu veishi sü vei-a bailai. 27Zhoulova moyuma nalova-a reitawuso, ne phei hai ashi hinou tavei talouo.
Currently Selected:
TSÜCHITAO 4: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
