TSÜCHITAO 2
2
Tsüveiyu Navei Buu
1Anahna, Enou neye paodou peiyu avei chipaotao sü polo, alia avei kharochitao sü ne hi pojü khailo. 2Tsüvei nasü kei toulo ae sünasü süloure donou telo. 3Ouvai, nenou shurasoua tsünghi kho louzü, ae paipa-a tsüsü kho louzü; 4nenou sünaye shahu büa phoulouzü, alia sünasü pokukhai touyu chingi büa phou louzü; 5sütou louzü Mapao ye piyu hai nenou süloulai, ae Ramai vei tsüdo nasü ngaoloulai. 6Daiolouzü Mapao nou ratsü hai peiwe; Puh mü hinou tsüvei ae sükulou süyu nasü pawe. 7Puhnou maiveih maiye donou tsüvei sü pojüwe; Puh hai checheyu mai vei rüe. 8Puhnou kaozü maivei ludu sü khopeiwe, alia sheeyu mai bo vupei-a bue.
9Nenou achi kei louzü, nenou acheche, kaozü ae veiyu nasü süloulai. 10Ne sü tsüvei palai, ae tsüdo aveih nasünou neye souvasa peilai. 11Aveih ashi dokulou süyu nanou neye zhupeilai; ae tsüsü nanou neye khopeilai, 12ae neye ashi ludu hinou vupa peilai, kaozü moyu chipao paoyu maitao hinou povailai peilai— 13checheyu bo thaowua azhi hinou ta-a bumai hinou; 14ashi souyu hi lesayu mai, alia vah ashi souyu jüpa-a buyu maitao hinou; 15shodo veimoyu maitao hinou, alia ludu zümo hi tayu maitao hinou neye vupa peilai.
16Neye chilee moyu naotumai, honapai vei mü theayu chipaotao hinou vupa peilai; 17nahle-a buki puh paye thaoyu naotu, alia puhvei Ramai hi vo soukhai touyu nasü ngaiyu naotupai hinou turei taloulai. 18Daiolouzü honapai vei ki sü athai hi leilou baiwe, alia honapai vei bo sü mai-zhi hi vewe; 19honapai hi veyu mai lia khaive moe, hriloure vei bo-a ngao dakhailou moe. 20Südonou ne sü mai aveih mai ludu hinou talo alia acheche mai hrü hinou hülo. 21Daiolouzü acheche mai — chilee checheyu mainou Etao vei teidei hai hisü hrülai. 22Ana Ramai nou maishiyu mai alia mah souyu maiye sü teidei hai hinou poube ali hai kamaa hinou paila laiyu büa pailai-a bailai.
Currently Selected:
TSÜCHITAO 2: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
