TSÜCHITAO 13
13
1Tsüveiyu nah linou puh puo vei paodou-apei sü keiwe, ana maiye ngaohiyu mailinou maichi kei moe.
2Mai aveih linou lah puh mü hinou paopayu rashithou aveih nasü toulai, ana shodo ashi souyu mai nawo louzü züvei-a buyu sü baie.
3Lah müye tukha louyu mai sü lahvei hrü hai vulouwe; chaochao soua chi paoyu maisü lahvei hrü hai souhaloua baie.
4Heakayu mai linou hataralia jüpasho-a buyuma, puhnou sünasü ngaoloukhai tilai moe. Kounouyu mai sü puletao nou jüpa-a buyu veishi hai ngaoloulai.
5Acheche mai linou dayu hai ngaorae, ana mai ashimai liwo haongu alia hashi hinou vah souwe.
6Acheche sünou chileeyu maili vei ludu sü khopeie, ana mah nanou mai ashi naye panou kaoduta-a baiwe.
7Mai kamai-a halia hayuma toungiyu khokho souwe; mai kukheli nou hayu khokho souwe, anou toungi shoa bue.
8Mai livei hrü hai hüpayu muh sü puhvei chingi-e, ana touhayu mai liwo po-a vupaloure halia hae.
9Acheche maili hai vavei shoyu ava ali büe, ana maishiyu maivei meivabvü louzü souhei bailai.
10Mai chi chouba-a rochiyu nasü khaityayu likhei baie, ana mainou paodou peiyu züyu mai hiwo tsüvei sü bue.
11Thahaha-a ngaolouyu chingiwo hataha bailai, ana tititou nou pojükhai louyu mainawo pulailai palai.
12Areih vetemoyu thaio tsüle pepoa baiwe, ana jüpa souche louyu nawo ahri süübe lie.
13Paodou peiyu nasü ngaophou moyu puhsü lah pei hi hakayu pove louwe, ana kharochi tsükhou louyu mai sü buu ngaolai.
14Tsüvei maili vei doupeiyu hai ahri dzüla lie; kaozhou ashi hi loulaiyu phaki, sünanou nevei hrü hai vupa peilai.
15Tsüvei nanou maivei jüpa ngaoloue, ana mainou louchelou hoyu maina louzü haka tayu ludu hi tawe.
16Kaozü süyu mai nanou vah soutamo jünou tsü cholouwe, ana voyu mai linou lah puhvei voyu shapao-a baiwe.
17Kopola peiyu mai ashi nanou maikhe maiye panou veahoyu daowe, ana louchelou veiyu kijü pamai linou souvei louyu pfüve peiwe.
18Paodou peiyu chi pobayu maina sü touhayu ae hraongu ngao-a bailai, ana tudee peiyu chi keilouyu mai nasü tsükhou peiyu hai ngaolai.
19Jüpa vete louyu hai daizhou koute veisa! Ana voyu mai donou ashi hinou pah pfürei tabae.
20Tsüvei maiye sa-a tayu mai sü tsüvei palai, ana vomaiye sa-a tayu mai louzü veahoyu vedao-a bailai.
21Rako ashi sünou mah souyu maiye thaihu-a laiwe, ana acheche maiye haveih nou buu peilai.
22Mai aveih mainou puhvei tounah mai hi nangi khesü kaa khaidai peiwe, ana mah maili vei chingi sü acheche mai donou pojü khaipeia baie.
23Touhayu mai linou vukhai touyu dei hinou thoudzü alao ngaolou süe, ana süsü kaozü moyu sünou phailai baiwe.#13.23 Phoure 23 nahai Hebrew hi sheesha moe.
24Süra nah hai to-e, ana mü nah-wo zü-a baiwe. (Lah nahye tudee moyu maisü, nahye leshi moe; ana nahye leshiyu maisü tudee peiwe.)
25Acheche mai louzü toujü-sojü moe, ana mai ashimai liwo houzü-a bukoute bailai.
Currently Selected:
TSÜCHITAO 13: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
