TSÜCHITAO 14
14
1Naotumai livei tsüvei nanou lah puh ki sü soulouwe, ana voyu naotupai louzü lah puh bah nou soushi loua baiwe.
2Cheche-a tayu mai nasü Mapao ye piwe, ana kheirei souyu ludu hi tayu nanou Puhye ngaophou moe.
3Voyu mai livei chipaoyu haio lah puhye dare süüda ali baie, ana tsüvei mai livei mütai nou puletaoye vupa peilai.
4Sa-a tatayu chode hayu buh hisü thou hae; ana shinamara pouyu hai chode vei pfüchi vanou vewe.
5Louchelou veiyu shaki mai nou dayu chi pao moe; ana dayu la-apeio louzü dayu likhei pao baiwe.
6Maiye ngaohiyu maisü hako hinou tsüveiyu phoua baie, ana tsüdo sü tsüsüyu maili donou talapa-a baie.
7Vomai nou buyu buh hisü buso, daiolouzü sühisü nenou tsüdo lia douloulai moe.
8Süyu maili vei tsüveiwo louzü lah puhvei ludu sükuloue. Maili hai daivanou tsüha-e toulouzü, puhsü lah süwe tea tsücho louyu vanou vo-e.
9Ramai nou mai ashi maiye lekhawe, ana maicheyu nawo puhvei jüpa ngaolouwe.#14.9 Phoure 9 nahai Hebrew hi sheesha timoe.
10Lüthou nou lah vei veayu nasü süwe, alia shevai-shesü maili noua puhvei lesayu nasü zha ngaozholai moe.
11Mai ashimai vei ki sü souhawu bailai, ana acheche mai vei ki louzü veipalai.
12Mai linou ludu haina hai kaore tea tsücho-a buyuma, sünasü akhai hi kou thailou veiyu ludu soulou veie.
13Nü-a buyu teile hi-a lüthou sü levea-a bubaie, alia savayu vei akhai sü dongai baie.
14Kaozümo souyu maili hai lahnou ngaozü thaifüa ngaolai, alia mai aveih maili sü puhvei vah sovei thaifüa buu ngaolai.
15Chaome souyu mainawo haveishi nou louche baiwe, ana souzü süyu nawo louzü puhnou daiki tawe tiyu zhuwe.
16Tsüvei mai linou leikeia hashi hinou tarei talouwe, ana voyu nawo shameayu laiwu-a chaochao sou-a baiwe.
17Lekha shiyu mai liwo thoulou moyu vah souwe, ana lahvu soulou süyu mai louzü shamea süe.#14.17 Larübvü ali hi shamea süe; Hebrew süsü ngaora-a baiwe.
18Tsüvei moyu mailiwo lah puhnou vo-a kaozü moyu soukhai touyu nasü ngao-a baie, ana dokai veiyu maiwo louzü tsüdo aveih nanou vepeirü soupeiwe.
19Hashi nasü haveih na nghoujü nou khurüwe, alia mai ashi nanou acheche mai hinou zhuvea peio tea kholai.
20Touhayu mai sü lah puh kinapamai koutea jüpa moe, ana toungi nawo louzü samai khamai alao bue.
21Lah kinapaye ngaophou moyu haisü mah-e, ana touhayu maiye zhuvea leshi peiyu mai sü savalai.
22Haveih souyu mai sü mainou louchelai alia tsükhouyu ngaolai; hashi soure bo phouyu mai sü kaomo tare.
23Teroyu teitei hisü shupa bue, ana mü pha-a laiyu maisü touha-a bailai.
24Tsüvei maivei peirü louzü puhmai vei ratsü nasüe, ana voyu nasü kaozü moyu hinou sülouwe.#14.24 Hebrew hi sheesha toumoe.
25Cheche-a shaki soupeiyu nanou mai hrirai vupa peiwe, ana dachi paoyu nawo maiye doutha peie.
26 Mapao ye piyu hinou maili vei leduyu sü bue, alia puhvei kikhamai hai kaozhou vei-a bulai.
27 Mapao ye piyu hai ahri vei dzüla lie, süvanou athai vei rüh hinou tarei paloulai.
28Mai pouyu hinou veo vei kathe sü bue, ana mai hayu thaio puh sü hakata-a bailai.
29Sososoua lekhayu nasü tsüveie, ana lekha ashi mai lisü puhvei kaozü moyu sü soupa ngao-a baie.
30Kaonasha touyu tsüle hai pfüphaoye souvei peiwe, ana maiye ngaoraiyu hai-o sourao hi sou ashi soua tangiyu büa baie.
31Touhayu maiye souveayu mai sü puletaoye soupeiyu Ramai ye ngaophou moe, ana vea-a laiyu maiye leshi peiyu maisü puhye tsükhoue.
32Mai ashi mai sü lah puletao vei hashi souyu vanou hakata-a baiwe, ana acheche mai louzü puhvei chileeyu vanou baibu ngaolouwe.
33Ratsü hai tsüsüyu mai hrülai hi bue, ana sünasü vomai linou sümoe.
34Acheche nanou tyahrü liye souduso peiwe, ana mah touyu haina louzü tyahrü taraliye donoua hraongu sü baie.
35Tsüvei-a vah souyu kilai mai lisü veo vei jüpa ngaoloue, ana puhvei lekha rarou nasü haongu vah souyu mai hi bue.
Currently Selected:
TSÜCHITAO 14: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
