TSÜCHITAO 11
11
1Kaomoyu sühdoukhao poyu maiye Mapao nou ngaora-e, ana checheyu sühdou poyu maisü Puhnou jüpae.
2Khaophu souyu maisü thasho-a hraongu vedao baiwe; ana tainou soumai hisü tsüvei bue.
3Mai aveih maiye tsüle sheeyu nanou süthai peilai, ana mai ashi maiwo louzü puletao vei shodo ashi sünou souha-a bailai.
4Kini nou poa chaa ngaoyu teithe hio shupayu hae, ana checheyuo louzü athai hinou vupa peilai.
5Mai veiyu maili hai puhvei tsüle sheesha touyu vanou vaphi tea nou hrülouwe, ana maishi mai louzü lah puhvei ashi vanou kaoduta-a bailai.
6Chilihyu maivei acheche sünou puletaoye vupa peiwe, ana shodo ashi soumai louzü lah puletao vei dutounü hinou muloua baiwe.
7Mai ashi nanou thaiyu phaki, puhvei areih-a koa thaita-a baiwe, alia Ramai samo maivei kini khesü muh liro ha-a bailai.
8Acheche maiye veahoyu hinou vupa peilai; anou süna hisü mai ashi mainou thaosou deloua bailai.
9Ramai sümoyu nanou puh münou kinapaye soushi peiwe, ana tsüdo süyu vanou acheche maina louzü vupa peiwe.
10Acheche mainou kaozhou veia buyu phaki, nuhmai-rümai khenou vasa-a buwe; ae maishiyu mai thaiyu phaki, asah soua shusou shawe.
11Chilih checheyu mai livei shiha vanou nuh sü pola pokupa peiwe, ana süsü maishi mai münou soushi souha baiwe.
12Kinapamai liye soutaiyu nasü tsü ha-e, ana tsüsüyu mai liwo lapai chamoe.
13Mü la-a maichi pao-a laiyu mai nanou kheichi pophao-a baiwe, ana louchelou veiyu mai nawo louzü kheichi poku peiwe.
14Süthai peimai hayu hisü tyahrü hai kaoduta-a baiwe; ana douzü-apei mai pouyu buh hisü kaozhou veia bulai.
15Vakou maili vei chimü pfüyu mai nasü lengai-a bailai, ana chimü pfüyu ngaorayu maisü rako veie.
16Zhuveasüh naotupai nou khuhraoyu ngaoloue, alia zhaipou shiyu mainou chingi ngaoloue.#11.16 Larübvü kamai hia hai jünou loupu hie; ana sütao hai Hebrew hi hae.
17Maiye zhuvea süyu hai lahye donou veia baie, ana hraishiyu mai sü lahye soushilou-a baiwe.
18Mai shiyu mai sü shodo ashi sünou buu soua ngao-a bailai, ana acheche hinou vuthou khaitouyu mai nasü veikhaimo-a buu aveih ngaolai.
19Acheche hinou latei toulouyu mai sü hrilai, ana hashi thaihu-a laiyu mai sü thai-a bailai.
20Tsüle shimoyu maisü Mapao nou ngaorae, ana kaozü vah souyu maisü puhnou leshie.
21Cheche vuzünou mai ashimaiye sü souvea peimoa panou talai moe, ana checheyu maitaowo tureipa loulai.
22Hüvei shoyu naotu linou puh hi aveih ashi sükulou süyu tsü hayu thaio, vo nghou hi sana bahkha ali khikhai touyu büa baie.
23Acheche mainou jüpa-a buyu khesü haveih nou ngaoloulai; mai ashimai nou vuzhia buyu nasü ngaolouyu phaki, mai hrülai nou rapa-a baiwe.#11.23 mai hrülai nou rapa-a baiwe; moa Ramai nou puletaoye tudee baiwe.
24Mai kamai-a nou pangai khaimoa pei-zhi koutewe, anou toungipu pa-a baie. Mai kukheli nou peizütao-a peimoa totei sho-e, anou puhsü chejü-a baiwe.
25Tolayu mai liye sü soungi peilai, alia maiye soukha peiyu mai sü soukha hai ngaoloulai.
26Maikhe mainou thoudzü phabayu maiye sü chaa peiwe, ana maikhe maiye thoudzü zhopeiyu maisü shiha ngaolai.
27Haveih nasü lenoua phoulai maisü tsükhouyu sü ngaolouwe, ana hashi phoua laiyu maisü, süna ngaoloua bailai.
28Lahvei nangiye louche-a buyu maisü kaki süünghou raitayu büa raita-a bailai, ana acheche mainawo louzü houki süünghou lapayu büa veishoa bulai.
29Lah puhvei kikhamaiye souveayu mai nasü akhai hi kou haliro bulai moe.
Voyu mai nasü teisa nou tsüvei maivei kilai soukoute-a bailai.
30Acheche maivei rashiwo hriloure vei süübe alie, ana zhaipou shiyu nanou hrü sü pota-a baiwe.
31Acheche maiye deiphao hinou buu peiyu thaisü, mai ashimai alia mah souyu maiye kazhou koute tudee peipulai!
Currently Selected:
TSÜCHITAO 11: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
