TSÜCHITAO 10
10
Solomon vei Tsüchitao
1Tsüveiyu nah linou puo vei le sousa peiwe, ana voyu nah liwo pfüye souveayu sü baie. 2Maishi soua ngaolouyu nangi haio hupa hae, ana checheyu sünou neye athai hinou vupa peilai.
3 Mapao nou acheche maiye panou hou-züa tamoe, ana maishiyu mainou jüpashoa buyu nasü puhnou souka pei baiwe.
4Bah keiyu vanou touha sü vewe, ana kounouyu mai bah linou soungi peiwe.
5Teilü kinou pojü louyu nah sü kaozü souyu mai-e, ana chaki zhiyu nah lisü haongu pfüve peiwe.
6Checheyu mai nou ha khesü ngaolai, ana mai ashimai mü hinou zhaipou shiyu chipao khesü kupfüa bue.
7Acheche maiye lichoyu hai shiha alie, ana mai ashimai livei zhih sü taha-a-bailai.
8Mai aveih linou paodou peiyu khesü polouwe, ana mü pouyu vomai liwo hakata-a bailai.
9Chilee-a tayu mailisü kaozhou veia tawe, ana tsüle sheemoa kaomoyu ludu hi tayu mai louzü phoupaloua bailai.
10Nghimaiyu mai nasü maiye radaipa-a baiwe, ana khuveia züpeiyu mai nanou soukaona peiwe.#10.10 Larübvü ali hi ana...soukaona peiwe; Hebrew hio phoure 8b nahai raibüa paopua baie.
11Acheche maili vei müwo ahri dzüla li-e, ana mai ashimai müwo poushi kupfüa bue.
12Ngaorayu sünou souzüvei peiwe, ana leshiyu sünou kaomoyu teitei hongi baiwe.
13Tsüsüyu maina mütai hinou tsüvei sü ngaoloue, ana süüda louzü tsühayu maiye dare donou baie.
14Tsüvei maiwo tsüdo pojükhai louwe, ana vomai livei chithou loumoyu ae müpouyu nou hakayu sü thasho-a pove peiwe.
15Hangiyu maili vei chingisü puhvei khouyu nuhdue; hahayu maivei touha sü puhmai vei ha-a katayu nasüe.
16Vah aveih souyu maivei buu sü ahri nasüe, ana maishiyu maiwo mah ngaopuloua baie.
17Paodou peiyu hai kei louyu maisü hriyu ngaoloulai, ana deipeiyu chi lubayu maisü shita-a bailai.
18Ngaorayu pokheia buyu mai nasü dayu mütai pfüwe, alia maiye paomah paoshi-a laiyu maisü vomaie.
19Nenou chi alao paolouzü, ne sü mah soupu louveie, ana mü tukhalou mai nasü tsüveiyu mainae.
20Acheche maili vei chipao hai veikayu shahue; mai ashi maili vei tsüle louzü muh lia hae.
21Acheche maili vei chipao sünou mai alaoye souvi peiwe, ana vomai louzü tsü hayu vanou thai-a baiwe.
22 Mapao vei shiha nou soungi peiwe, alia puhnou sühisü leveayu hai thoupei moe.#10.22 alia puhnou...thoupei moe; moa vah aetea souyu nanou neye sounghipu peilai moe.
23Kaomoyu vah souyu hinou savayu hai voyu vah baie. Tsüveiyu mai sü ratsü vanou vasawe.
24Maishi mai nou piyu nasü puh pei hi ve-a bailai, ana acheche mainou jüpa-a buyu khesü ngaoloulai.
25Teikhai teirü ashi veyu phaki, mai shiyu maitaoye sü hüpoa ta bailai, ana acheche maiwo louzü teisa nou kaozhou vei-a bailai.
26Heakayu mai liye panou nevei vah sü soukhai tiso, puhsü neye donou khaiyu dzü keloua huh keiyu büa bailai, moyuma nghithou hi meikhao louyu büa bailai.
27 Mapao ye piyu vanou hrüso hrüloulai, ana maishi mai louzü hrü jüa bailai.
28Acheche maivei areih louzü lesayu hinou ve akhai soulai, ana maishi mainou vuzhi-a buyu nasü hamako bailai.
29 Mapao nou tsüle sheesha touyu maiye vupa peilai, ana vah kaomo souyu maiye souhawu bailai.
30Acheche mai louzü popa laikhai tilai moe, ana maishiyu mai louzü teidei hinou hrüa bulai moe.
31Acheche mai mü nou tsüvei paopa peiwe, ana kaozümo souyu mai mali louzü daode laiwu bailai.
32Acheche mainou aetou louveiyu chipao khesü süwe, ana maishimai müwo kaozü moyu chipao likhei süa baie.
Currently Selected:
TSÜCHITAO 10: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
