Matie 15

Dedembai bala ŋa

(Cɔ Maaku 7:1-13)

1Ŋɔi Farisi gɔ ŋa do woo kɔ inɛ ŋa si wooda gɔ ŋa à naa hai Zeruzalɛmu à bɔ bi Jesu à beeɛ à ni, 2na mii í ce mɔcɔɛ ŋa a kù waa too dedembai bala nwa ŋa. Na mii í ce a ci ya wɔɔ si yaase bɛi bala nwa ŋa à jilɔɔ a bɛi a jɛ. 3Nɔ Jesu í jɛ nŋa do ide ku bee í ni, na mii í ce iŋɛ mɔ dedemba nŋɛ ŋa ku too í jɔ̀ i kù waa jirima woodai Ilaaɔ̃ ŋa. 4Ì mà sãa sãa ŋa iyi Ilaaɔ̃ í ni, i jirima iyeò baa nŋɛ ŋa.#15:4 Cɔ Kufita 20:12; Wooda ku kɔsi 5:16. Nɔ í ni má, inɛ iyi wa fɔ laalɔi iyeò baaɛ ŋa a kpa lafɛ̃ɛ.#15:4 Cɔ Kufita 21:17; Kuwee 20:9. 5Amma iŋɛ ì waa fɔ ide mmu. Ì waa ni inɛ á yɔkɔ ku sɔ̃ iyeɛ walakɔ baaɛ ku ni fia iyi nŋu á yɔkɔ ku sobiɛ do, ti Ilaaɔ̃i. 6Nɔ inɛ iyi í fɔ bɛɛbɛ kaa sobi iyeò baaɛ ŋa do fia má. Bɛɛbɛi ì waa kpa idei Ilaaɔ̃ ŋa ku ba i too dedemba iyi à jɔ̀ nŋɛ. 7Iŋɛ ilu muafiti ŋai. Hai tako Ezai í ce waliiɛi dee dee na iri nŋɛ waati iyi í ni,

Ilaaɔ̃ í ni,

8inɛ ŋau ihɛ̃ à waa jirimam nii

do gɛlɛ nŋu akã.

Amma idɔ nŋa í jĩim.

9Kutɔɔ iyi à waa ce ngbɛi,

domi woodai amanɛ ŋai à waa kɔ inɛ ŋa si

nɔ à waa ni woodam nii.#15:9 Cɔ Ezai 29:13.

Mii iyi í ya dasi inɛ riisi

(Cɔ Maaku 7:14-23)

10Ŋɔi Jesu í kpe zamaau nɔ í ni, i de itĩ i gbɔ yaasei ideu. 11Kù jɛ mii iyi wa lɔ hai do gɛlɛi amanɛi í ya dasiɛ riisi. Amma mii iyi í ya fita hai si gɛlɛi amanɛi á dasiɛ riisi.

12Nɔ mɔcɔɛ ŋau à na à sɔ̃ɔ à ni, i kù mà ide iyi ì fɔu bɛ í jɛa Farisi ŋau taale? 13Nɔ Jesu í jɛ nŋa í ni, jĩi baa yooma iyi Baam iyi í wa lele kù lɔ fei, aa tuui. 14I jɔ̀ ŋa bɛ. Woo mu golo fɛɛju ŋai. Nɔ bii fɛɛju wa mua fɛɛju golo aŋa minji fei à ya koo a dasi gooi. 15Ŋɔi Piɛɛ í ni, sisi nwa yaasei mɔndau bɛ. 16Nɔ Jesu í ni, iŋɛ mɔ, i kù nɛ bisi ŋai? 17I kù mà ŋa, mii iyi wa lɔ hai do gɛlɛi amanɛ fei, si inɔɛi wa bɔ? Si anyiɛ nɔ ku fita hai si ara. 18Amma ide iyi í ya fita hai si gɛlɛ, hai si idɔi wa naa. Nŋu bɛi wa dasi amanɛ riisi, 19domi hai si idɔi amanɛi lasabu laalɔ wa naa. Inɛ ku kpa, do sakara, do sɛ̃ɛ ku tɔtɔɔ do mudɛ̃ɛ hai ce abɔdɔ̃, do ile, do sɛɛda ibo, do inɛ ku bɛjɛ, mii ŋau bɛ fei hai si idɔi wa naa, 20nɔ nŋu ŋau bɛi í ya dasi amanɛ riisi. Amma kù jɛ kujɛ hai wɔɔi á dasi inɛ riisi.

Abo dimi mmu gɔ í dasi Jesu naanɛ

(Cɔ Maaku 7:24-30)

21Si anyii nŋu, Jesu í nɛ hai bɛ í bɔ ikpa Tii do Sidɔ̃ɔ. 22Inaaboi ilɛi Kanaã gɔ iyi í wa bɛ í naa bi tɛɛ nɔ í dɔ̃ anu í ni, Lafɛ̃ɛ, tɔkui Davidi amanlu nlau, ce araarem. Ama inaabom í nɛ inɛi inɔɔko, nɔ wa kpãa iju ntɔ ntɔ. 23Amma Jesu kù jɛaa ide kãma. Nɔ mɔcɔɛ ŋa à naa à tɔɔɛ à ni, abou ihɛ̃ wa dɔ̃ anu wa too anyi nwa. I kaa leleɛ? 24Nɔ í jɛ í ni, bi inɛi Izirɛli ŋa aŋa akãi à bɛm wa, inɛ ŋa iyi à yɛ bɛi angudã ŋa iyi à nyɔ. 25Amma abou í naa í gulɛ si wajuɛ í ni, Lafɛ̃ɛ, sobim. 26Nɔ Jesu í ni, kù sĩa a gba ijɛi amu ŋa a na aja ŋa. 27Ŋɔi abou í ni, ntɔi Lafɛ̃ɛ. Amma do nŋu fei, aja ŋau à ya wa abɛi taabu a maa jɛ buubuui ijɛ iyi wa cuku wa hai si taabui lafɛ̃ɛ nŋa ŋa. 28Nɔ Jesu í jɛaa í ni, abooyi, naanɛ ku dasiɛ í la. Bɛi ì bi fei á ce. Nɔ gbakã ama inaaboɛu í ba iri.

Jesu í jɔ̀ bɔ̃ɔ nkpɔ í ba iri

29Nɔ Jesu í nɛ hai bɛ í too itĩi tenkui Galilee, í koo í gũ antaii iri kuta gɔ í buba. 30Nɔ zamaa nla gɔ í naa bi tɛɛ. À naaò ilu kutɛ akã ŋa wa, do fɛɛju ŋa, do wɛɛgɛ ŋa, do dekĩ ŋa, do bɔ̃ɔ nkpɔ má nɔ à jilɛ ŋa si wajui Jesu, nɔ í jɔ̀ à ba iri. 31Ŋɔi inɛ ŋau à biti iyi à yɛ dekĩ ŋau à waa fɔ ide, wɛɛgɛ ŋau à ba iri, ilu kutɛ akã ŋau à waa nɛ, fɛɛju ŋa à waa yɛ ilu, nɔ à waa saabu Ilaaɔ̃ Lafɛ̃ɛi inɛi Izirɛli ŋa.

Jesu í wò inɛmɔkɔ dubu mɛɛ (4.000)

(Cɔ Maaku 8:1-10)

32Jesu í kpe mɔcɔɛ ŋa í ni, araarei inɛ ŋau ihɛ̃ wa mum, domi ajɔ mɛɛta nŋai ihɛ̃ iyi à wa bi tom, nɔ sɔnda kãma kù gbe nŋa má. Nɔ n kù bi n jɔ̀ a nɛò ariu ku ba a maà na a koo a cuku kpãa. 33Nɔ mɔcɔɛ ŋau mɔ à beeɛ à ni, to, iwoi aa ka ba ijɛ si gbabuau ihɛ̃ iyi á yo zamaa nla nlau ihɛ̃. 34Nɔ Jesu í bee ŋa í ni, pɛ̃ɛ fɛloi ì nɛ ŋa. Ŋɔi à ni, pɛ̃ɛ ara mɛɛjei do cɛ̃ɛ wɛwɛɛ gɔ ŋa. 35Nɔ Jesu í ni inɛ ŋau a buba ilɛ. 36Nɔ í so pɛ̃ɛ ara mɛɛjeu do cɛ̃ɛ ŋau, í saabu Ilaaɔ̃ titã í bɛi í bububuɛ í na mɔcɔɛ ŋa a kpɛ̃ nŋa. Ŋɔi à kpɛ̃a inɛ ŋau. 37Nɔ aŋa fei à jɛ à yo hee pɛ̃ɛu í gbe. Ŋɔi à ko pɛ̃ɛ iyi í gbeu nɔ í ce kɔlɔ mɛɛje. 38Inɛ ŋa iyi à jɛu à wɛɛi zakai amanɛ dubu mɛɛ (4.000), baai inaabo do amu ŋa baasi. 39Ŋɔi Jesu í jɔ̀ inɛ ŋau à nɛ í bɛi í lɔ akɔi inyi í nɛ ikpa ilɛi Magadãa.

Currently Selected:

Matie 15: MKL

Highlight

Compare

Copy