Matie 14

Idei ikui Zãa woo dasi inyiu

(Cɔ Maaku 6:14-29; Luku 9:7-9)

1Si waati bɛɛbɛi Herodu, ilaalui Galileeu í gbɔ laabaaui Jesu. 2Nɔ í sɔ̃ amaacɛɛ ŋa í ni, inɛɛu bɛ Zãa woo dasi inyiui í jĩ wa hai si balɛ. Na ŋɔi í jɔ̀ í nɛ gbugbã wa ceò maamaake ŋau bɛ.

3-4Mii iyi í jɔ̀ Herodu í fɔ bɛɛbɛ wee. Herodu í tako í so Herodiasi aboi Filipu, ifɔɛ. Ŋɔi Zãa í sɔ̃ɔ í ni, kù sĩa i gba aboi ifɔɛ i dasi kpasɛ̃ɛ. Ide iyi Zãa í fɔ na irii Herodiasiui í jɔ̀ Herodu í ni a muu a dũu a dasiɛ piisɔ̃ɔ. 5Nɔ Herodu wa bi ku kpaa, amma wa ce njoi inɛ ŋa si na iyi í jɔ̀ aŋa fei à ni Zãa waliii.

6Ŋɔi ajɔ í naa í to bii Herodu wa ce jingau ku yeò gigii ajɔi kubíɛ. Nɔ ama inaaboi Herodiasi wa jojo si wajui inɛ ŋa iyi à kpe ku jɛu. Ŋɔi í dɔ̃a Herodu si jiida jiida 7hee í ceaa kuwã nɔ í gbasi í ni nŋu á muaa mii iyi í bi fei. 8Ŋɔi ama inaabou í koo í bee iyeɛ, nɔ í nyi wa í naa í sɔ̃ɔ í ni, ǹ bi i muum irii Zãa woo dasi inyiu wa si pɛrɛnti. 9Ŋɔi inɔi ilaaluu í fɔ. Do nŋu fei í jɛsi nɔ í ni a koo a bu irii Zãau wa a naa a náa. Í jɛsii si na iyi í jɔ̀ í gbasi tã do mii fei si wajui inɛ njooɛ ŋau. 10Nɔ í bɛ inɛ ŋa ile piisɔ̃ɔ bɛ a koo a bu irii Zãa wa. 11Ŋɔi inɛ ŋau à koo à buu nɔ à lesi pɛrɛnti wa à na à na ama inaabou nɔ nŋu mɔ í koo í na iyeɛ. 12Ŋɔi mɔcɔi Zãa ŋau à gbɔ ideu. Nɔ à koo à so ikuɛu à koo à suu. Nɔ à koo à sɔ̃ Jesu.

Jesu í wò inɛmɔkɔ dubu miiu (5.000)

(Cɔ Maaku 6:30-44; Luku 9:10-17; Zãa 6:1-14)

13Iyi Jesu í gbɔ ideu ŋɔi í nɛ hai bɛ. Í lɔ akɔi inyi do mɔcɔɛ ŋa nɔ à bɔ gbabua gɔ. Iyi inɛ ŋa à gbɔ, ŋɔi à fita hai inɔ ilu nŋa ŋa à da hãmɛ nŋa wa do isɛ. 14Iyi à fita hai si akɔi inyiu ŋɔi Jesu í yɛ zamaau. Nɔ í ce araare nŋa nɔ í jɔ̀ bɔ̃ɔ nŋa ŋa à ba iri.

15Iyi alɛ wa lɛ ŋɔi mɔcɔɛ ŋau à naa bi tɛɛ à ni, si gbabuai à wa ihɛ̃ nɔ wee idũ wa dũ. Na nŋu, jɔ̀ inɛ ŋau a nɛ ilɛɛko ŋa a koo a ra mii iyi aa jɛ. 16Amma Jesu í sɔ̃ ŋa í ni, a kù nɛ bukaatai a nɛ. Iŋɛ taka nŋɛ, i na ŋa ijɛ a jɛ. 17Ŋɔi à ni, pɛ̃ɛ iyi à nɛ ihɛ̃ kù re ara miiu do cɛ̃ɛ minji. 18Nɔ Jesu í ni, i naam wa ihɛ̃. 19Nɔ í ni zamaau ku buba si fɔfɔu, nɔ í so pɛ̃ɛ ara miiu do cɛ̃ɛ minjiu, í wu iju lele í saabu Ilaaɔ̃. Nɔ í bububu pɛ̃ɛ ŋau í na mɔcɔɛ ŋau nɔ aŋa mɔ à kpɛ̃a zamaau. 20Nɔ aŋa fei à jɛ à yo hee mbɔɛ í gbe. Ŋɔi mɔcɔɛ ŋau à ko iyi í gbeu hee kɔlɔ maateeji í kɔ̃. 21Inɛmɔkɔ ŋa iyi à jɛu à wɛɛi zakai amanɛ dubu miiu (5.000), baai inaabo do amu ŋa baasi.

Jesu wa nɛ si antaii tenku

(Cɔ Maaku 6:45-52; Zãa 6:15-21)

22Iyi à tã ŋɔi Jesu í ni mɔcɔ ŋau a lɔ akɔi inyiu ku ba a tako nŋu a kua ice ihɔ̃. Iyi à waa nɛ nɔ í ni zamaau ku nɛ. 23Waati iyi í jɔ̀ à nɛ nɔ í koo í gũ iri kuta gɔ ku ba ku ce kutɔɔ. Nɔ idũ í dũ í báa bɛ nŋu akãɛ. 24Wee waati bɛɛbɛ akɔi inyiu í wa si aninii tenkuu tã. Nɔ kutãngãm dii inyiu í wasi ku taleɛ si na iyi í jɔ̀ fufu wa ko ŋa ikpó. 25Zakai amɛɛjuumá, ŋɔi Jesu wa nɛ si antaii inyiu, wa bɔ bi mɔcɔɛ ŋa. 26Waati iyi à yɔɔ wa nɛ si antaii tenkuu wa, ŋɔi zigi nŋa í da, njo wa mu ŋa, à waa ni, zĩii. Nɔ njou í jɔ̀ à wasi ku dɔ̃ anu. 27Bɛ gbakã Jesu í ba ŋa ide ku fɔ í sɔ̃ ŋa í ni, i sũ laakai nŋɛ. Amui Jesu, i maà ce njo ŋa. 28Ŋɔi Piɛɛ í sɔ̃ɔ í ni, Lafɛ̃ɛ, bii awɔi, jɔ̀ amu mɔ n nɛ n naa bi tɛɛ si antaii inyiu. 29Nɔ Jesu í jɛaa í ni, naa wa.

Nɔ Piɛɛ í kita hai si akɔi inyiu nɔ í nɛ si antaii inyiu wa bɔ bi Jesu. 30Amma iyi laakaiɛ í bɔ si fufu iyi wa ce do gbugbãu, ŋɔi njo í muu. Nɔ í sinti ku mile. Ŋɔi í dɔ̃ anu í ni, Lafɛ̃ɛ, faabam. 31Nɔ gbakã Jesu í yɔ awɔ í muu nɔ í ni, na mii í ce ì waa sika sika má. Naanɛɛ kù la.

32Ŋɔi aŋa minji fei à gũ akɔi inyiu nɔ fufuu í leekĩ. 33Nɔ inɛ ŋa iyi à wa si inɔi akɔu à gulɛ si wajui Jesu à ni, ntɔ ntɔ, awɔ Amai Ilaaɔ̃i.

Jesu í jɔ̀ bɔ̃ɔ ŋa à ba iri si ilɛi Zenezarɛti

(Cɔ Maaku 6:53-56)

34Iyi à kua, nɔ à to ilɛi Zenezarɛti. 35Si bɛi inɛi bɛ ŋau à mà Jesu, ŋɔi à fɔ laabaauɛ bii fei à ni í to wa. Nɔ à naa bɔ̃ɔ fei wa. 36Nɔ à tɔɔɛ à ni ku jɔ̀ aŋa a lu baa itĩi kumbooɛ, nɔ inɛ iyi í luu fei í ya ba irii.

Currently Selected:

Matie 14: MKL

Highlight

Compare

Copy