Matie 16

Farisi do Sadusi ŋa à bi Jesu ku ce maamaake

(Cɔ Maaku 8:11-13; Luku 12:54-56)

1Si anyii nŋu, Farisi do Sadusi ŋa à naa bi Jesu a cɔ laakaiɛ. À tɔɔɛ ku ce maamaake iyi á nyisi iyi gbugbãɛ hai bi Ilaaɔ̃i wa naa. 2Ŋɔi Jesu í jɛ nŋa í ni, bii inunu wa bɔ ku lɔ nɔ lele í kpã ì ya ni ŋa, iju iyi á má ala á sĩa. 3Bii daakɔi ì ya ni ŋa, ijĩ á wɔ domi ijĩ í dũ í we mango. Ì mà yaasei lele ŋa amma i kù mà yaasei waati iyi à wa si nsɛi ŋa. 4Inɛ laalɔi nsɛi ŋa iyi a kù leekĩò Ilaaɔ̃ nŋu akã, nyindai à ya maa bi ku yɛ. Amma maamaake gɔ kù wɛɛ iyi aa nyisi ŋa má bii kù jɛ ti walii Zonasiu.

Iyi Jesu í fɔ bɛɛbɛ í tã ŋɔi í jɔ̀ ŋa í nɛ.

Levɛ̃ɛi Farisi ŋa do ti Sadusi ŋa

(Cɔ Maaku 8:14-21)

5Si anyii nŋu, Jesu do mɔcɔɛ ŋau à koo à lɔ akɔi inyi à waa bɔ ikpa icei tenkuu ikpa ihɔ̃. Nɔ wee mɔcɔɛ ŋau à gbɛjɛ ku so pɛ̃ɛ kosĩa. 6Ŋɔi Jesu í sɔ̃ ŋa í ni, i ce laakai do levɛ̃ɛi Farisi ŋa do ti Sadusi ŋau. 7Ŋɔi mɔcɔ ŋau à waa lasabu si idɔ nŋa à waa ni, na iyi í jɔ̀ a kù so pɛ̃ɛ kosĩai í jɔ̀ wa fɔ bɛɛbɛ. 8Amma Jesu í mà lasabu nŋa iyi à waa ce nɔ í bee ŋa í ni, na mii í ce ì waa ni ŋa, na iyi í jɔ̀ iŋɛ i kù so pɛ̃ɛ kosĩai í jɔ̀ ǹ wa n fɔ bɛɛbɛ. Naanɛ nŋɛ kù la. 9I kù gbɔ yaaseɛ hee nsɛi ŋa? I kù waa ye gigii pɛ̃ɛ ara miiu iyi ǹ bu ǹ kpɛ̃a amanɛ dubu miiu do jiai pɛ̃ɛ kɔlɔ iyi í gbe má ŋa? 10Mà i kù waa ye gigii pɛ̃ɛ ara mɛɛje iyi ǹ bububu ǹ na amanɛ dubu mɛɛ ŋau do jiai pɛ̃ɛ kɔlɔ iyi í gbe má ŋa? 11Na mii í ce i kù mà ŋa iyi pɛ̃ɛ si ǹ wa n fãa. I ce laakai do levɛ̃ɛi Farisi ŋa do ti Sadusi ŋau.

12Bɛbɛi mɔcɔ ŋau à mà iyi kù jɛ levɛ̃ɛ iyi í ya jɔ̀ pɛ̃ɛ ku wui wa fãa, amma à mà iyi cioi Farisi do ti Sadusi ŋaui wa fãa.

Piɛɛ í ni Jesu í jɛ inɛ iyi Ilaaɔ̃ í cica

(Cɔ Maaku 8:27-30; Luku 9:18-21)

13Nɔ Jesu í to Sezaree-Filipu. Nɔ í bee mɔcɔɛ ŋa í ni, yooi inɛ ŋa à ya ni amu Amai Amanɛ ǹ jɛ. 14Ŋɔi à jɛaa à ni, inɛ gɔ ŋa à ya ni awɔ Zãa woo dasi inyiui. Inɛ gɔ ŋa mɔ à ya ni awɔ Elii walii nlai takoui. Inɛ gɔ ŋa mɔ à ya ni awɔ Zeremii, walakɔ walii mmu gɔ má. 15Nɔ Jesu í bee ŋa í ni, iŋɛ mɔ ni, yooi ì ni ǹ jɛ ŋa. 16Nɔ Simɔɔ Piɛɛ í jɛaa í ni, awɔ Amai Ilaaɔ̃ nŋu iyi í jɛ irii kuwɛɛui. Awɔi ì jɛ inɛ iyi í cicau. 17Ŋɔi Jesu í ni, Simɔɔ, amai Zãa, awɔ ilu inɔ didɔ̃i. Kù jɛ amanɛi í sɔ̃ɛ, bii kù jɛ Baam iyi í wa lele. 18Amui ǹ wa n sɔ̃ɛ iyi awɔ Piɛɛi, waatɔ kuta. Si antaii kutaui an jilɛ igbɛm, nɔ baa iku takaɛ kaa yɔkɔ ku ganji igbɛu. 19Awɔi an na yiiko si kpãai bommai Ilaaɔ̃. Mii iyi ì kɔ̀si si andunya, lele mɔ á kɔ̀sii. Nɔ mii iyi ì jɛsi si andunyau, lele mɔ á jɛsii.

20Ŋɔi Jesu í sɔ̃ mɔcɔɛ ŋau do kugaabu í ni a maà na a sɔ̃ inɛ gɔ iyi nŋu í jɛ inɛ iyi Ilaaɔ̃ í cicau.

Jesu wa fɔ idei ikuɛ do kujĩɛ

(Cɔ Maaku 8:31-9:1; Luku 9:22-27)

21Hai waati bɛɛbɛi Jesu í sinti ku sɔ̃ mɔcɔɛ ŋa í ni tilasii nŋu ku bɔ Zeruzalɛmu. Tengi bɛi inɛ ngbo ŋa do inɛ ngboi woo weei Ilaaɔ̃ ŋa do woo kɔ inɛ ŋa si wooda ŋa aa kpã nŋu iju. Aa kpa nŋu, amma si ajɔ mɛɛtasia nŋu á jĩ má hai si balɛ. 22Ŋɔi Piɛɛ í gbãa í bɔòɛ kɔkɔlɛ í sɔ̃ɔ í ni, Ilaaɔ̃ ku waasu ideu, Lafɛ̃ɛ. Ide dimi bɛɛbɛ kaa baɛ pai. 23Amma Jesu í sinda í sɔ̃ Piɛɛ í ni, sɛkɛɛ hai bi tom Seetam. Ì waa bi i jɛɛm bi ku koosɛ, domi i kù waa ce lasabui Ilaaɔ̃, í gbe ti amanɛ ŋa. 24Si anyii nŋu Jesu í sɔ̃ mɔcɔɛ ŋa í ni, inɛ iyi wa bi ku toom, ku jɔ̀ idɔɔbiɛ nɔ ku so jĩi ku gaauɛ#16:24 jĩi ku gaauɛ Inɛ ŋa iyi à kua wooda gɔ ŋa, inɛi Romu ŋa à ya kpa ŋai si jĩi ku gaau. Nɔ inɛ iyi à yɛ taaleɛu nŋui í ya so jĩi nɔu ku bɔò hee tengi bii aa kpaau. ku toom wa. 25Nɔ inɛ iyi wa bi ku jɛ kuwɛɛɛ do idɔɔbiɛ, á na ku kuaɛ. Amma inɛ iyi í kɔ̀si kuwɛɛɛ na irim, lafɛ̃ɛ á baa do ntɔ. 26Aranfãani yoomai amanɛ í nɛ bii í ba amanii andunya fei nɔ í kua kuwɛɛɛ. Mà mii í wɛɛ iyi amanɛ á kpaasiò kuwɛɛɛ. 27Amu Amai Amanɛ an nyi wa má do amboei Baam do amalekam ŋa ajɔ. Si waati bɛɛbɛi an sãa inɛ fei si yaase bɛi í jɛò kuwɛɛɛ. 28Ntɔ ntɔ ǹ wa n sɔ̃ ŋɛi, inɛ ŋa iyi à wa ihɛ̃ si nsɛi, gɔgɔ nŋa ŋa aa yɛ amu Amai Amanɛ n naa n jɛ bommam hee aŋa fei a maa ku.

Currently Selected:

Matie 16: MKL

Highlight

Compare

Copy