Matie 13

Mɔndai woo gbɛ̃

(Cɔ Maaku 4:1-9; Luku 8:4-8)

1Si ajɔ akãu bɛ má, Jesu í fita hai kpasɛ̃ í koo í buba itĩ tenku. 2Nɔ zamaa nla nla gɔ í tɔtɔɔ siɛ. Ŋɔi í lɔ akɔi inyi gɔ í buba ku ba ku kɔ ŋa si cio. Nɔ zamaau fei wa leekĩ itĩ tenkuu bɛ.

3Nɔ í sɔ̃ ŋa mii nkpɔ do mɔnda. Í ni, mɔkɔ gɔ í fita wa fã dimi. 4Si bɛi wa fã dimiu, ŋɔi gɔgɔ ŋa à cuku si kpãa nɔ yɛi ŋa à naa à jɔɔ. 5Nɔ gɔgɔ ŋa mɔ à cuku si ilɛ iyi í nɛ kuta, tengi bii sãa kù kpɔ. Nɔ í fita bɛ gbakã si na iyi í jɔ̀ sãa kù la bɛ. 6Amma iyi inunu wa ce, ŋɔi í joo nɔ í gbɛ, domi icãɛ kù mi lɛlɛ. 7Gɔgɔ ŋa mɔ à cuku si inɔ agũ ŋa. Ŋɔi agũ ŋau à dede siɛ à biiɛ à kpaa. 8Nɔ gɔgɔ ŋa mɔ à cuku si ilɛ jiida nɔ à bí. Gɔgɔ ŋa à nɛ iju cĩɔ, gɔgɔ ŋa mɔ kita, gɔgɔ ŋa mɔ kuntaa. 9Iyi Jesu í kpa mɔndau í tã ŋɔi í ni, inɛ iyi í nɛ itĩ iyi á gbɔò ide, ku gbɔ.

Na mii í jɔ̀ Jesu í ya maa kpa mɔnda

(Cɔ Maaku 4:10-12; Luku 8:9-10)

10Ŋɔi mɔcɔɛ ŋa à naa à beeɛ à ni, na mii í ce ì ya maa sɔ̃ inɛ ŋa ide do mɔnda. 11Nɔ í sɔ̃ ŋa í ni, iŋɛi Ilaaɔ̃ í jɔ̀ ì mà asiii bommaɛ ŋa. Amma kù jɔ̀ inɛ ŋa iyi à gbe ŋau a màa. 12Inɛ iyi í nɛ, nŋui à ya kɔ̃ɔa si, nɔ kunɛu ku la. Amma inɛ iyi kù nɛ, baa keeke iyi í nɛu à ya gbaai má. 13Inɛ ŋau, à ya maa cɔ ilu amma a kù waa yɛ, nɔ à waa sɔ̃ ŋa ide amma a kù waa gbɔ yaaseɛ. Na ŋɔi i jɔ̀ ǹ ya n maa n sɔ̃ ŋa ide do mɔnda. 14Mii iyi í ba ŋau bɛ Ezai í tako í ce waliiɛ í ni,

aa ya desi ide itĩ amma ì kaa gbɔ yaaseɛ ŋa,

nɔ aa maa cɔ ilu amma ì kaa yɛ ngɔgɔ ŋa.

15Idɔi inɛ ŋau í baa í le.

À dĩ itĩ nŋa ku ba a maà gbɔ ide gɔ,

nɔ à bii iju nŋa ku ba a maà yɛ ngɔgɔ,

nɔ idɔ nŋa mɔ ku maà mà ngɔgɔ.

Bii kù jɛ bɛɛbɛ aa na a sinda wa bi Ilaaɔ̃ nɔ ku jɔ̀ a ba iri.#13:15 Cɔ Ezai 6:9-10.

16Amma Jesu í sɔ̃ mɔcɔɛ ŋau í ni, iŋɛ ilu inɔ didɔ̃ ŋai, si na iyi í jɔ̀ iju nŋɛ wa yɛ ilu, nɔ itĩ nŋɛ wa gbɔ ide má. 17Ntɔ ntɔ ǹ wa n sɔ̃ ŋɛi, walii do inɛ nkpɔ iyi wa jirima idei Ilaaɔ̃, à bi aŋa à yɛ mii iyi ì waa yɛu ihɛ̃ ŋa, amma a kù yɔɔ. Nɔ à bi aŋa a gbɔ mii iyi ì waa gbɔu ihɛ̃ ŋa, a kù nɔ a kù gbɔɔ.

Yaasei mɔndai woo gbɛ̃u

(Cɔ Maaku 4:13-20; Luku 8:11-15)

18Jesu í sɔ̃ ŋa má í ni, i de itĩ i gbɔ yaasei mɔndai woo gbɛ̃u ŋa. 19Inɛ iyi wa gbɔ idei bommai Ilaaɔ̃ nɔ kù gbɔ yaaseɛ, í yɛi bɛi kpãa bii dimiu í cuku. Seetam inɛ laalɔui, í ya naa ku nya ide iyi à gbɛ̃ si idɔɛ. 20Inɛ mɔ iyi í yɛ bɛi ilɛ kuta bii dimiu í cukuu, bii wa gbɔ ideu gbakã í ya gbaai do inɔ didɔ̃. 21Amma ci ya jɔ̀ ideu ku ce icã jiida si idɔɛ, nɔ kaa yɔkɔ ku leekĩ ku kpɛ. Bii wahala gɔ, walakɔ ijuukpã gɔ í dede na irii ideu, í ya fũsi awɔi gbakã. 22Inɛ mɔ iyi í gba ideu bɛi si ilɛ ku nɛ agũ ŋau, wa gbɔ ideu amma lasabu bututui mii ŋa iyi wa bitandiɛ do fia ku bi iyi wa dĩ ijuɛ, aŋai à ya ganji ideu ku ce icɛ si inɛɛu. 23Inɛ mɔ iyi í gba ideu bɛi si ilɛ jiida, nŋui í jɛ inɛ iyi wa gbɔ ideu nɔ í gbɔɔ do yaaseɛ, nɔ í so iso. Bi inɛ gɔ ŋa, dimiu í so iso cĩɔ, bi inɛ gɔ ŋa kita, bi inɛ gɔ ŋa mɔ kuntaa.

Mɔndai fɔfɔ laalɔ

24Nɔ Jesu í kpa nŋa mɔnda má í ni, faaji iyi wa fɔ idei bommai Ilaaɔ̃ wee. Mɔkɔ gɔi í koo í gbɛ̃ dimi jiida si ilɛɛ. 25Amma idũ si waati iyi inɛ fei wa sĩ njoo, ŋɔi mbɛɛi mɔkɔu í naa í gbɛ̃aa fɔfɔ laalɔ si inɔ ilɛɛ nɔ í nɛɛ. 26Nɔ dimi jiidau í fita, wa la, nɔ í bí. Fɔfɔ laalɔu mɔ í fita, nɔ aŋa fei à la ajɔ. 27Ŋɔi amaacɛɛ ŋau à naa à sɔ̃ɔ à ni, lafɛ̃ɛ, í jɔ dimi jiidai ì gbɛ̃ si ilɛɛ ya. To, nɔ hai iwoi fɔfɔ laalɔu ihɛ̃ í fita wa má. 28Ŋɔi í sɔ̃ ŋa í ni, mbɛɛ gɔi í coo. Nɔ amaacɛɛ ŋau à beeɛ à ni, ì bi kaa logoo fɔfɔ laalɔu? 29Nɔ í ni, aawo. Bii ì waa bi i logoo fɔfɔ laalɔu bii i kù laakai ŋa aa na i tɔtɔɔ i logooò dimi jiidau ŋa. 30I jɔ̀ aŋa fei a dede nŋa hee bii kumuɛ í to. Waati bɛɛbɛ an sɔ̃ woo mu ŋau a kpa fɔfɔ laalɔu titã a dũu a dasi ina, a bɛi a tɔtɔɔ dimi jiidau a dasi suum.

Mɔndai dimi keeke iyi à ya kpe mutaadi

(Cɔ Maaku 4:30-32; Luku 13:18-19)

31Nɔ Jesu í kpa nŋa mɔnda gɔ má í ni, bommai Ilaaɔ̃ í yɛi bɛi ngboi mutaadi iyi inɛ gɔ í so í gbɛ̃ si ilɛɛ. 32Ngbou í kere í re ngbo ŋa iyi à gbe fei, amma bii à gbɔ̃ɔ, nŋui í ya fita ku lá ku re ama jĩi fei, hee yɛi ŋa à ya maa ce antɛ si amaawɔɛ ŋa.

Mɔndai levɛ̃ɛ

(Cɔ Luku 13:20-21)

33Nɔ Jesu í kpa nŋa mɔnda gɔ má í ni, bommai Ilaaɔ̃ í yɛi bɛi levɛ̃ɛ iyi abo gɔ í so í dasi iyafũi pɛ̃ɛ gũa mɛɛta, nɔ fei ndɛɛ í dede í kpante.

Idei mɔnda ŋau

(Cɔ Maaku 4:33-34)

34Ide ŋau bɛ fei sãa sãa do mɔndai Jesu í sɔ̃ zamaau, ci ya fɔ ide iyi kù jɛ do mɔnda. 35Bɛɛbɛi idei inɛ akãi walii ŋau í ce iyi í ni,

do mɔndai an ya n sɔ̃ ŋa ide,

nɔ si bantumai an fɔ mii iyi wa manji hai waati iyi ǹ taka andunya.#13:35 Cɔ Iri ku kɔ̃ 78:2.

Jesu í sisi yaasei mɔndai fɔfɔ laalɔu

36Jesu í jɔ̀ zamaau nɔ í koo í lɔ kpasɛ̃. Nɔ mɔcɔɛ ŋau à bɔ bi tɛɛ à ni, sisi nwa yaasei mɔndai fɔfɔ laalɔu. 37Nɔ í jɛ nŋa í ni, inɛ iyi í gbɛ̃ dimi jiidau amu Amai Amanɛi. 38Ilɛui í jɛ andunya. Dimi jiidau mɔ, nŋui í jɛ inɛi bommai Ilaaɔ̃ ŋa. Fɔfɔ laalɔu nŋui í jɛ inɛi Seetam ŋa. 39Mbɛɛ iyi í gbɔ̃ɔ nŋui í jɛ Seetam. Ajɔi kumuu mɔi í jɛ ajɔ iyi andunya á kpa iri, nɔ woo mu ŋau mɔ aŋai à jɛ amaleka ŋau. 40Nɔ si bɛi à ya kpa fɔfɔ laalɔu a dasi inau, bɛɛbɛ mɔi á jɛ si ajɔ iyi andunya á kpa iri. 41Amu Amai Amanɛ, an bɛ amalekam ŋa wa a na a nya inɛ ŋa iyi à waa dasi inɛ ŋa kurara do woo ce laalɔ ŋau a tekĩò ŋa hai tengi bii an na n jɛ bommam, 42nɔ a dasi ŋa ina iyi ci ya ku. Tengi bɛi aa lesi awɔ si iri a kpataò. 43Nɔ waati bɛɛbɛ inɛ ŋa iyi à waa dɛ idɔɔbii Ilaaɔ̃ ku ce aa maa má inyai bɛi inunu si bommai Ilaaɔ̃ Baa nŋa. Inɛ iyi í nɛ itĩ iyi á gbɔò ide, ku gbɔ.

Mɔndai amani iyi wa singa

44Nɔ Jesu í ni má, mɔnda gɔ iyi wa fɔ idei bommai Ilaaɔ̃ wee. Ajɔ nŋu gɔ inɛ gɔ í koo í kãsi amani iyi wa singa si inɔ ilɛ. Iyi í yɔɔ nɔ í teese í singaɛ má. Nɔ í nɛ do inɔ didɔ̃ í koo í ta mii iyi í nɛ fei, nɔ í na í ra ikou.

Mɔndai lɛgɛ

45Jesu í ni, mɔnda gɔ wee má iyi wa fɔ idei bommai Ilaaɔ̃. Woo nya sĩa gɔ wa dɛ lɛgɛ jiida ŋa. 46Iyi í yɛ akã iyi í jɛ jiida ti fia nkpɔ gɔ, nɔ í koo í ta mii iyi í nɛ fei í na í raa.

Mɔndai taao

47Jesu í ni má, bommai Ilaaɔ̃ í yɛi bɛi taao iyi à sɔsi inɔ inyi ku mu cɛ̃ɛ dimi ikã ikã fei. 48Bii í mu cɛ̃ɛ ŋau í tã, sɔɔkɔ ŋau à ya faa wa icei. Nɔ a buba a cica cɛ̃ɛ jiida ŋau a dasi kɔlɔ, cɛ̃ɛ ŋa iyi a kù ce ncɛɛu mɔ nɔ a nikã ŋa. 49Nɔ bɛɛbɛ mɔi á yɛ si iri ku kpai andunya. Amaleka ŋa aa na a nya inɛ ŋa iyi à waa ce laalɔ hai si inɔi inɛ ŋa iyi à waa ce idɔɔbii Ilaaɔ̃, 50a dasi ŋa ina iyi ci ya ku. Bɛi aa lesi awɔ si iri a kpataò.

Amani titɔ̃ do nwo

51Jesu í bee ŋa í ni, ì gbɔ yaasei ideu fei ŋa? Nɔ à jɛ à ni, oo. 52Nɔ í sɔ̃ ŋa í ni, bɛɛbɛ mɔi, woo kɔ inɛ ŋa si wooda baa yooma fei iyi í mà idei bommai Ilaaɔ̃, í yɛi bɛi ilu kpasɛ̃ gɔ iyi wa fitaò mii titɔ̃ ŋa do mii nwo ŋa hai si bi ku jilɛ amaniɛ.

Inɛi Nazarɛti ŋa a kù dasi Jesu naanɛ

(Cɔ Maaku 6:1-6; Luku 4:16-30)

53Iyi Jesu í kpa nŋa mɔnda ŋau bɛ í tã, nɔ í nɛ hai bɛ. 54Í bɔ ilu bii í jɛ ama. Iyi í to bɛ í lɔsi ku kɔ inɛ ŋa si cio ile bii à ya maa ce kutɔtɔɔ hee inɛ ŋa iyi à waa gbɔ ideɛ ŋau à na à biti. Nɔ à waa ni, hai iwoi inɛɛu ihɛ̃ í ba dimii bisiu ihɛ̃ wa. Bɛirei í ce wa ceò dimii maamaake ŋau ihɛ̃. 55Í jɔ amai woo gbe jĩi nɔu mbɛ ya. Kù jɛ iyeɛi à ya kpe Maariu? Zaaki do Zozɛfu do Simɔɔ do Zudu ŋa si à jɛ ifɔɛ ŋa? 56Awaò wecĩɛ ŋa fei si à wa ihɛ̃ ba. Bii bɛɛbɛi nɔ hai iwoi í ba gbugbãu ihɛ̃ fei wa. 57To, lasabu nŋu ŋau bɛi í ganji ŋa a dasiɛ naanɛ. Nɔ Jesu í sɔ̃ ŋa í ni, kù nɛ bii walii ci ya nɛ bɛɛrɛ bii kù jɛ si ilɛi ideɛ do si kpasɛ̃ɛ. 58Kù nɔ kù ce maamaake nkpɔ bɛ si na iyi í jɔ̀ a kù dasiɛ naanɛ.

Currently Selected:

Matie 13: MKL

Highlight

Compare

Copy