Popular Bible Verses from 1Yohanes 4

Share

Akoni amberek nen it amberek inom naʼbuwa-kaʼbuwarogo dogolik, inayuk dek dogoligogi eti paga, yi mende ndi mende arat bogokogo kagarigogi eti kak, nit-nit naʼbuwa-kaʼbuwarogo kagarigogi mende eti arat ʼbogokogo kagat lago dogolik, ninobabut ninayuk mende eti dek arigogo. Mende, it akoni amberek inobabut inayuk mende eti, inakla nen, “Iya! Allah nen yabunggane wene ninoba ʼbigin a? Dek a,” yiluk inobabut inayuk-inayuk dogoligogi o. Esigit diluk dogoligogi eti paga, naʼbuwa-kaʼbuwarogo kagarigogi mende eti, inakla pano ʼbogokogo arat kagat larigogo mondok dek o.

Mende, naʼburi o. It akoni agat oba mende inakla dogoligogo mende eti obatne dek mendeat, kirat, kinebe Allah aʼburiatma, at Agurengge obatne mondok korleyak mende kinakla werek eti paga, it ap eti inobatne deget diyalok werek o.

Ebe-alep Allah nen ndak ninaʼbuwa ambasikesikmo, nit men, nit-nit naʼbuwa-kaʼbuwarogo doguwok o.

Nagarlagi, nirugi, kinebe kinaʼbuwa o. Akoni amberek inaʼbuwa ambasi eti erlo, at Allah at eti paga, nit-nit naʼbuwa-kaʼbuwarogo doguwok o. Akoni naʼbuwa-kaʼbuwarogo dogogun mende, inebe dombok Allah nen endaginakikemo, at aʼburi dogolik, at ebe iniluat werek o.

Nen, at Allah obabut, nit ninaʼbuwa ambasi werek eti paga, ta nen naʼbuwa-kaʼbuwarogo dogogin dek kalok, at eti Allah ebe onggodek werek o.

It amberek inaʼbuwa ambiligogi eti ebe, nit nen Allah aʼbuwa ambasugu ʼbuk. Dek o. At Allah nen nit ninaʼbuwa ambasikesik, at nen nit weyak kagako mende sagalogo deget diyalok kot ninabuwagaluk, aʼbut ninoba wusa ʼbi wagike o.

Nagarlagi, nirugi o. Kinebe kinaʼbuwa o. At Allah nen nit esigit diluk ninaʼbuwa ambasike eti paga, nit nen, nit-nit naʼbuwa-kaʼbuwarogo doguwok o.

Mende, Allah nen, “Kit kinebe kinaʼbuwa werek,” yiluk ʼbukakogo selekmat digiluk, aʼbut omanggiat endago etnogo nen, ninilugut ninabuwagaluk agat oba wusa ʼbi wagike o.

Esigit diluk mende, akoni nen inagarlagi inirugi inilenggen kiligogi mende inendainggen kunik naʼbuwa-kaʼbuwarogo welagidek dogoligat, Allah inilenggen kiligogi dek mende inendainggen kunik dogusak ambegep? Erlok dek o. Eti paga, at omanggi agarlagi irugi mondok aʼit werek mende nen, “An Allah nendainggen kunik,” yiluk yiligogo kalok, enggalat yiligogo o.

Ta nen, “Yesus eti Allah aʼbut,” yiluk ʼbukakogo yogisaligogo mende kalok, at Allah nen at imbisak kunik mondok, nen, at nen Allah imbisak kunik mondok, dogoligogi o.

Eti paga, at Kristus nen ninasuk wako dogolik, “Allah kinendainggen kunik dogolik, kinagarlagi kinirugi kinendainggen kunik naʼbuwa-kaʼbuwarogo dogono o,” yiluk yoknisasike o.

Nagarlagi, nirugi, kinebe kinaʼbuwa o. Akoni inebe dogalegat nen, “Nit nen Allah wene yokisaligogi,” yiluk inenggalat yiligogi mende inebe arat selekma agakasik, o yi ai ndi ai liligogi eti paga, amberek kinoba witluk, wene yokisasinem, kit nen, “Allah Agurengge inakla dogolik yoknisiligogi,” yiluk kinendainggen it inoba panggot dugup o. At te, “Eberogonat Allah Agurengge inakla dogolik yoknisiligogi a? Ninat mende inakla dogolik yoknisiligogi a,” yiluk inaren ndak mbaliluk nen, inebe didiyasi dogono o. Kit nen, “It eti Allah Agurengge inakla werek a? Ninat mende a,” yiluk inaren ndak mbalko dogusak eti yigit diluk. It amberek witluk nen, “At Yesus Kristus eti Allah nen laʼbi wagikemo eberogonat abat endak lasi wagike,” yiluk ʼbukakogo yiligogi mende nen yisi kalok, kit nen, “It eti Allah Agurengge inakla dogolik yiligogi,” yiluk didiyasi dogusak o.

Esigit diluk mende, it amberek nen Yesus ake wene esigit diluk ʼbukakogo yiligogi dek mende nen yisi kalok, kit nen, “It eti inakla Allah Agurengge ʼbuk. Ninat mende werek o,” yiluk didiyasi dogusagat o. It eti pasik, wene Allah nen paganeat yoknisasi dogolik, “At omanggi Kristus inom mondok weyak mende wisigin etnaga o,” yiluk yoknisasike mende, kinasuk kolkigip etnaga, yogondak agat oba yoma inebe arat selekma agakasik werek etiat o.