1Yohanes 4
4
“Allah Agurengge inom, kugi nuket diyaligogo mende inom, enggagat didiyausak,” yiluk yogisasike wene
1Nagarlagi, nirugi, kinebe kinaʼbuwa o. Akoni inebe dogalegat nen,
“Nit nen Allah wene yokisaligogi,” yiluk inenggalat yiligogi mende inebe arat selekma agakasik, o yi ai ndi ai liligogi eti paga, amberek kinoba witluk, wene yokisasinem, kit nen,
“Allah Agurengge inakla dogolik yoknisiligogi,” yiluk kinendainggen it inoba panggot dugup o. At te,
“Eberogonat Allah Agurengge inakla dogolik yoknisiligogi a? Ninat mende inakla dogolik yoknisiligogi a,” yiluk inaren ndak mbaliluk nen, inebe didiyasi dogono o. 2Kit nen,
“It eti Allah Agurengge inakla werek a? Ninat mende a,” yiluk inaren ndak mbalko dogusak eti yigit diluk. It amberek witluk nen,
“At Yesus Kristus eti Allah nen laʼbi wagikemo eberogonat abat endak lasi wagike,” yiluk ʼbukakogo yiligogi mende nen yisi kalok, kit nen,
“It eti Allah Agurengge inakla dogolik yiligogi,” yiluk didiyasi dogusak o. 3Esigit diluk mende, it amberek nen Yesus ake wene esigit diluk ʼbukakogo yiligogi dek mende nen yisi kalok, kit nen,
“It eti inakla Allah Agurengge ʼbuk. Ninat mende werek o,” yiluk didiyasi dogusagat o. It eti pasik, wene Allah nen paganeat yoknisasi dogolik,
“At omanggi Kristus inom mondok weyak mende wisigin etnaga o,” yiluk yoknisasike mende, kinasuk kolkigip etnaga, yogondak agat oba yoma inebe arat selekma agakasik werek etiat o.
4Mende, naʼburi o. It akoni agat oba mende inakla dogoligogo mende eti obatne dek mendeat, kirat, kinebe Allah aʼburiatma, at Agurengge obatne mondok korleyak mende kinakla werek eti paga, it ap eti inobatne deget diyalok werek o. 5It eti inebe akoni agat oba mende inaʼburi nogo nen, it nen wene agat oba wene yisinem, inane it akoni agat oba mende nen inasuk koligogi o. 6Mende, nit ninebe Allah aʼburi mende dogolik ninane yisinem, it amberek Allah ebe inilu mende kalok, inasuk kolkik, nen, it amberek inebe Allah aʼburi mende ʼbuk, ninat kalok, inasuk kolkidek togot digik, kagarigogi o. Esigit diluk kagakonem nit nen,
“Allah ebe mende Agurengge it eti inakla werek, nen it amberek eti kugi nukerinabigogo mende inakla werek,” yiluk enggagat didiligogi o.
“Allah nen ninaʼbuwa ambiligogo eti kak, nit-nit naʼbuwa-kaʼbuwarogo dogusak,” yiluk yogisasike wene
7Nagarlagi, nirugi, kinebe kinaʼbuwa o. Akoni amberek inaʼbuwa ambasi eti erlo, at Allah at eti paga, nit-nit naʼbuwa-kaʼbuwarogo doguwok o. Akoni naʼbuwa-kaʼbuwarogo dogogun mende, inebe dombok Allah nen endaginakikemo, at aʼburi dogolik, at ebe iniluat werek o. 8Nen, at Allah obabut, nit ninaʼbuwa ambasi werek eti paga, ta nen naʼbuwa-kaʼbuwarogo dogogin dek kalok, at eti Allah ebe onggodek werek o. 9Mende, Allah nen,
“Kit kinebe kinaʼbuwa werek,” yiluk ʼbukakogo selekmat digiluk, aʼbut omanggiat endago etnogo nen, ninilugut ninabuwagaluk agat oba wusa ʼbi wagike o. 10It amberek inaʼbuwa ambiligogi eti ebe, nit nen Allah aʼbuwa ambasugu ʼbuk. Dek o. At Allah nen nit ninaʼbuwa ambasikesik, at nen nit weyak kagako mende sagalogo deget diyalok kot ninabuwagaluk, aʼbut ninoba wusa ʼbi wagike o. 11Nagarlagi, nirugi o. Kinebe kinaʼbuwa o. At Allah nen nit esigit diluk ninaʼbuwa ambasike eti paga, nit nen, nit-nit naʼbuwa-kaʼbuwarogo doguwok o. 12Nen, Allah ebe eti, akoni amberek nen inilenggen mondok kigidek o. Mende, nit-nit naʼbuwa-kaʼbuwarogo dogogun kalok, Allah ninom kunik mondok dogogun o. Esigit diluk werekma, ebe-alep Allah nen ninaʼbuwa ambasi dogolik, akla ambasike eti kagat, akoni nen yi mende ndi mende pano bogokogo arat kagarigogi eti kak, nit-nit naʼbuwa-kaʼbuwarogo dogowagaluk bogokogo arat kagat ninabigogo o.
13Allah nen Agurengge woknisasike eti paga, nit nen ambasi dogolik,
“At nit ninom kunik werek. Nen, nit at ninom kunik werek,” yiluk didiligogi o. 14Nit nen,
“Allah aʼbut ninilenggen kasi lagagu mende eti nen, nit akoni agat oba mende ndil ninabuwagaluk ninombae Allah nen laʼbi wagikemo,” yiluk abok ʼbukakogo yokisaligogi. 15Ta nen,
“Yesus eti Allah aʼbut,” yiluk ʼbukakogo yogisaligogo mende kalok, at Allah nen at imbisak kunik mondok, nen, at nen Allah imbisak kunik mondok, dogoligogi o. 16Nit nen,
“Allah nen ninaʼbuwa ambaligogo eti, didogosik eberogonat,” yiluk ambaligogi o. At obabut ninaʼbuwa ambasi mondok dogoligogo eti paga, ta nen obabut akoni inaʼbuwa ambasi mondogat dogoligogo kalok, Allah nen at imbisak kunik mondok, nen, at nen Allah imbisak kunik mondok, dogoligogi o. 17At Kristus dogoligogo eti kak, nit agat oba esigit dilugat werek eti paga, yabunggane Allah nen nit ninendema waganogo wene ninoba ʼbigik, nggokik, kagasigin etinem ninenggarli dek dogogun o. Ninenggarli dekogo dogowagaluk ebe-alep Allah nen ninaʼbuwa ambasi dogolik, akla ambasike eti kak, yi mende ndi mende bogokogo arat kagarigogi eti kak, nit-nit naʼbuwa-kaʼbuwarogo dogowagaluk ʼbogokogo arat kagat ninabigogo o. 18Akoni amberek nen it amberek inom naʼbuwa-kaʼbuwarogo dogolik, inayuk dek dogoligogi eti paga, yi mende ndi mende arat bogokogo kagarigogi eti kak, nit-nit naʼbuwa-kaʼbuwarogo kagarigogi mende eti arat ʼbogokogo kagat lago dogolik, ninobabut ninayuk mende eti dek arigogo. Mende, it akoni amberek inobabut inayuk mende eti, inakla nen,
“Iya! Allah nen yabunggane wene ninoba ʼbigin a? Dek a,” yiluk inobabut inayuk-inayuk dogoligogi o. Esigit diluk dogoligogi eti paga, naʼbuwa-kaʼbuwarogo kagarigogi mende eti, inakla pano ʼbogokogo arat kagat larigogo mondok dek o. 19Ebe-alep Allah nen ndak ninaʼbuwa ambasikesikmo, nit men, nit-nit naʼbuwa-kaʼbuwarogo doguwok o. 20Esigit diluk mende, akoni nen inagarlagi inirugi inilenggen kiligogi mende inendainggen kunik naʼbuwa-kaʼbuwarogo welagidek dogoligat, Allah inilenggen kiligogi dek mende inendainggen kunik dogusak ambegep? Erlok dek o. Eti paga, at omanggi agarlagi irugi mondok aʼit werek mende nen,
“An Allah nendainggen kunik,” yiluk yiligogo kalok, enggalat yiligogo o. 21Eti paga, at Kristus nen ninasuk wako dogolik,
“Allah kinendainggen kunik dogolik, kinagarlagi kinirugi kinendainggen kunik naʼbuwa-kaʼbuwarogo dogono o,” yiluk yoknisasike o.
Currently Selected:
1Yohanes 4: DNA
Highlight
Copy
Compare
Share
Want to have your highlights saved across all your devices? Sign up or sign in
