Popular Bible Verses from ECLESIASTES 3

Share

Maipaay iti tunggal banag adda nakedngan a tiempo, ket maysa a tiempo maipaay iti tunggal panggep iti baba ti langit

Pannawen ti pannacayanac, ken pannawen ti pannacatay, pannawen ti panagmula, ken pannawen ti panagparot iti naimula; Pannawen ti panangpapatay, ken pannawen ti panangagas; pannawen ti panangrugpo, ken pannawen ti panangbangon

Pannawen ti panagsangit, ken pannawen ti panagcatawa; pannawen ti panagdung-aw, ken pannawen ti panagsala; Pannawen ti panagibelleng cadagiti batbato, ket pannawen ti panagurnong cadagiti batbato; pannawen ti panagaracup ket pannawen ti panangmedmed iti panagaracup

Pannawen ti panagpigis, ken pannawen ti panagdait; pannawen ti panagulimec, ken pannawen ti panagsao; Pannawen ti panagayat, ken pannawen ti panaggura; pannawen a maipaay iti gubat, ken pannawen a maipaay iti talna.

Pannawen ti panagbiroc, ket pannawen ti panangpucaw; pannawen ti panangsalimetmet, ket pannawen ti panagibelleng

Ammoc a ti aniaman nga aramiden ti Dios, addanto iti agnanayon: awan ti aniaman a mainayon kencuana, wenno aniaman a makissay kencuana; ket ti Dios inaramidna tapno agbuteng coma dagiti tattao iti sangoananna.

Kinunac itoy pusoc, Ocomento ti Dios ti nalinteg ken ti nadangcoc; ta adda pannawen sadiay a maipaay iti tunggal panggep ken maipaay iti tunggal aramid.