Oswald Chambers: Hoop - ‘n Heilige Belofte Voorbeeld

Geloof is ons persoonlike vertroue in ‘n Wese wie se karakter ons ken, maar wie se weë ons nie deur ons gesonde verstand kan volg nie. Geloof is die praktiese uitwerking in ons lewe van die direkte, vasberade vertroue in God. Gesonde verstand is wiskundig; geloof is nié, geloof werk op onlogiese maniere. Jesus Christus beklemtoon geloof ten sterkste, veral geloof wat al getoets is.

Alle vertroue, liefde en toewyding wat nie op ‘n persoonlike verhouding met God gebaseer is nie, sal verdoem word, nie net in individuele ondervindinge nie, maar in die geskiedenis van die wêreld. God sal aan ons, op sy geduldige wyse, verduidelik dat wanneer ons op enigiets minder as Jesus Christus bou, dit kragteloos sal wees, omdat ons ons vertroue in verkeerde dinge geplaas het. (1 Kor. 3:10-15; 9:27)

Oordenkingsvrae: Op watter wyse verwag ek van geloof om soos ‘n wiskundige berekening te werk? Op watter maniere weerhou my belangstellings en besittings my daarvan om passievol te wees oor die dinge wat vir God belangrik is?

Aanhalings uit: "Studies In The Sermon On The Mount" en "Notes on Jeremiah", © Discovery House Uitgewers