Die geboorte van Christus en gesinsleweVoorbeeld

Die trefkrag van eenvoud

Die Kersverhaal herinner ons daaraan dat daar vir Jesus geen plek in die herberg was nie. Tog het ’n eenvoudige stal en krip ('n voerbak vir diere) aan Hom die warmte van huisvesting gebied. En dit was ook hier waar Josef en Maria die herders en die wyse manne uit die Ooste ontvang het. Hierdie nederige toneel roep ons om weer te besef hoe merkwaardig eenvoudige dinge en ook gasvryheid is. Dit herinner ons telkens weer aan watter groot rol klein dingetjies kan speel. In ’n tyd waar mense dikwels haastig of selfgerig is, roep Christus se geboorte ons om deur middel van eenvoudige dinge ruimte te maak vir familie, vriende en vreemdelinge. Julle huis kan ’n plek van vrede wees; waar ander iets van God se liefde kan ervaar. Wanneer die klem doelbewus geplaas word op eenvoudige dinge soos gasvryheid en mededeelsaamheid – en Christus as die sentrale figuur en boodskap gehandhaaf word – word die ware betekenis van Kersfees treffend verkondig. Hierdie eenvoud is waarlik voldoende.

Geselsvrae vir die hele gesin ...

Watter klein dingetjies kan julle gesin hierdie Kersfees doen, sodat ander Jesus kan beleef?

Hoekom word gasvryheid en die verkondiging van die geboorte van Christus aan mekaar verbind?

Hoe kan julle hierdie Kersfees gasvryheid uitleef – sonder om oordadig te wees?