Bible Basics: Om God te kenVoorbeeld

Die ewige en verhewe God

Die Bybel leer ons dat God alwetend (Hy weet alles), almagtig (Hy kan enigiets doen), alomteenwoordig (Hy is oral teenwoordig) en transendent (verhewe bo alles) is (1 Johannes 3:20; Genesis 17:1; 1 Kronieke 29:11). God is almagtig en Hy word nie deur tyd en ruimte beperk nie!

Dit is belangrik vir ons om God se eienskappe te verstaan sodat ons Hom beter kan leer ken — al sal ons Hom nooit volledig kan verstaan nie, want Hy is ver bo ons beperkte begrip en verstand. God se ongelooflike grootheid kan intimiderend — selfs vreesaanjaend — voel, maar gelukkig is Hy nie net almagtig en verhewe nie, maar ook ten volle goed en volmaak liefdevol.

Wanneer ons oorweldig word deur die verwarring, chaos en swaarkry om ons kan ons vertroosting vind in die feit dat daar ’n God is wat nie te swak vir enigiets is nie (Matteus 19:26). Dinge “gebeur” nie met God nie; Hy spreek en dit gebeur. Hy is nooit verlam deur vrees nie, Hy is magtig en in beheer, vry om te kies wat Hy wil hê moet gebeur. Om ons aan God se verhewe mag te onderwerp, vind ons vrede vir ons siel in die feit dat daar ’n koning oor alles is wat weet wat Hy doen.

Die boek Job gee vir ons ’n ongelooflike blik in God se almagtigheid, alwetendheid, alomteenwoordighede en verhewendheid. Job is ’n regverdige man van geloof wat ongelooflik getoets is. Hy moes pyn, verlies en siekte verduur en worstel dan met sy vrou, vriende en God oor wat dit beteken. Vir die eerste 37 hoofstukke van die boek praat Job en sy vriende oor beskuldigings en aannames. Wanneer die argumente ’n toppunt bereik, praat God met Job. Vir vier hoofstukke vra Hy vir Job verskeie vrae soos: “Waar was jy toe Ek die fondasie van die aarde gelê het? Sê My as jy so baie weet!” (Job 38:4 NLV) en “Het jy ooit die môre beveel om te verskyn? Het jy die dag laat breek in die ooste?” (Job 38:12 NLV). Ons dink dalk dit is verregaande dat Job en sy vriende dink hulle weet beter as God, en tog moet ons erken daar was tye wat ons gedink het ons weet wat God in ’n sekere situasie moet of nie moet doen nie.

Op een punt in hulle gesprek sê God vir Job: “Wil jy ’n saak maak teen die Almagtige en Hom bestraf? Wil jy vir God teregwys? Antwoord Hom dan!” (Job 39:35 AFR83). Natuurlik besef Job hy is besig om die argument te verloor! Ons moet almal op daardie punt kom waar ons nederig erken: “U is God; ek is nie.” Job kan uiteindelik erken: “Ek weet nou U kan enigiets doen, en niemand kan U keer nie” (Job 42:2 NLV).

Ons kan leef met ongelooflike vrede en gesag wanneer ons besef dat ons almagtige, verhewe, soewereine en ongelooflike God goed, liefdevol en vol deernis is en Hy ’n verhouding met ons wil hê. Hy is aan ons kant en ken ons (Psalm 139)! Ruim ’n bietjie tyd in om stil te raak in God se teenwoordigheid. Maak jou hart oop vir sy grootheid. Hy is baie nader aan jou as wat jy dink. As jy platgedruk word deur angstigheid of iets spesifieks waaroor jy bekommerd is, gee dit vir God. Hy het jou liewer as wat jy jou ooit kan voorstel.

Deur Christopher Hyslop