Bible Basics: Om God te kenVoorbeeld

Is daar regtig ’n God?

• Bestaan God regtig?
• Is daar beduidende bewyse van ’n almagtige, alwetende godheid vol liefde?
• Kan moderne wetenskap en God saam bestaan?

Dalk het jy al hierdie of soortgelyke vrae gevra. Miskien het mense gesê jy moenie sulke vrae vra nie, want ons kultuur het nie veel van ’n aptyt vir absolute waarheid nie. Ons word aangesê om te doen wat reg voel en ons eie waarheid uit te leef. “Wees net jy” is die filosofie van die dag en die idees van Christenskap is maar baie ongewild by party mense. Dalk is jy al geïgnoreer of uitgesluit, of het selfs aggressie of vyandigheid beleef oor jou geloof. Al het God ons nie nodig om Hom te verdedig nie, is dit belangrik dat ons ons geloof kan verdedig sodat ons lewens kan leef wat vol selfvertroue, moed, geloof en standvastigheid is.

Daar is drie kernargumente vir die bestaan van God:

1. Die kosmologiese argument draai om oorsaak en gevolg. Om te sê ons heelal het bestaan uit niks is logies gesproke absurd. As die heelal ’n begin het, moet daar ’n oorsaak, ’n bron of krag wees wat die lewe soos ons dit ken, begin het: God.
2. Die argument van ontwerp neem aan dat dit onlogies is om te glo dat die sterrestelsels, natuurwette, ekosisteme, menslike liggaam en so meer toevallig kon ontstaan het sonder ’n intelligente ontwerper. Die heelal wys na ’n groot ontwerper: God.
3. Die morele argument sê dat as daar slegs een universele sedewet is wat oor kulture en bevolkingsgroepe strek, daar ’n morele wetgewer moet wees, want ’n sedewet is onderhewig aan ’n morele wetgewer. Sedewette regeer mense. Mense regeer nie oor sedewette nie. Dit beteken ’n sedewet word verhewe bo ons. As ons nie bo hierdie sedewette is nie, wie is? Dit kan slegs ’n almagtige wetgewer wees wat bo alle dinge regeer: God.

Psalm 14:1-7 gee vir ons ’n goeie idee van wat gebeur wanneer mense — in hul dwaasheid — God verwerp. Die geskiedenis het bewys dat antieke volke wat die bestaan van God ontken het, in morele agteruitgang verval en selfs uitgesterf het. Selfs al het ateïsme ’n gewilde alternatief vir baie geword, en selfs al word mense wat in God glo dikwels vir hul geloof gespot, rig God steeds ’n generasie jongmense op wat gewillig is om teen die kultuur in te gaan. Hy roep ons om Hom te vertrou en op te staan vir sy koninkryk — dapper en skaamteloos. Mag ons die wonder van ’n lewe saam met God ontdek terwyl ons hierdie oproep beantwoord.

Deur Ross Marshall