Becoming Love: As ons by Volbring begin, waar eindig ons? (Deel 2)Voorbeeld

Dag nege - Jesus en Saggeus

Wat is jou reaksie teenoor iemand wat moeilik is om lief te hê?

Saggeus, as hoofbelastinggaarder, was nie ’n gewilde man nie — inteendeel, hy was verag. Jy kan jou indink dat hy, juis hieroor, sy hart teenoor mense verhard het om homself te beskerm. Maar daar is ’n dringendheid in hom om vir Jesus te sien.

Jesus se reaksie op Saggeus leer ons baie. Wanneer Hy by die boom kom, kyk Hy op en sê vir Saggeus om vinnig af te klim, want Hy móét by sy huis tuisgaan. Jesus reageer nie net op enige man in ’n boom nie; Hy reageer op die dringendheid in Saggeus se hart.

Ons leer twee belangrike toepassings vir ons eie lewens in hierdie gedeelte:

In ons benadering tot die “veragtes” of dié wat moeilik is om lief te hê, leer ons eerstens om hulle nie te ignoreer nie, soos ons soms maak, maar om op te kyk. Dit is maklik om ywer raak te sien. Leer om uit te kyk vir mense wat “bome klim” om vir Jesus te sien.

Tweedens ontdek ons in die proses van om liefde te word die beginsel van uitnodiging. Jesus nooi Homself na Saggeus se huis toe. Hoekom doen Hy dit? Want dit was waarskynlik die een plek waar Saggeus veilig gevoel het in die gemeenskap. Jesus bou op so ‘n manier met Saggeus ‘n band wat hom skuif van sy eie begrip van liefde na ’n liefde wat hom van binne af sou verander. Ons word dieselfde soort liefde wanneer ons gewillig is om liefde te wees wat mense gaan haal waar hulle is en vir hulle wys waaroor liefde werklik gaan.

Hoe word jy bewus van iemand wat na meer soek?

Hoe dink jy kan ons die wêreld rondom ons betrek wat nie geliefd voel nie?