Becoming Love: As ons by Volbring begin, waar eindig ons? (Deel 2)Voorbeeld

Dag agt: Die roeping van Matteus, die tollenaar

Het jy al ooit na iemand gekyk en gewonder: Is daar regtig hoop vir iemand soos hy?

Ons kyk na ’n pragtige verhaal in Matteus 9. Jesus roep Matteus om Hom te volg as een van sy dissipels, maar Matteus is ’n tollenaar — iemand wat gesien is as korrup en ’n verraaier van sy eie mense. In daardie tyd en kultuur is Matteus beskou as iemand wat “te ver heen is, ’n verraaier, ’n mens vir wie daar geen hoop was nie”.

Tog vermy Jesus hom nie. Hy stap reguit na hom toe en sê: “Volg My,” en later daardie selfde dag is Hy by Matteus se huis en geniet ’n maaltyd saam met ander tollenaars en “sondaars”.

Sien jy wat hier gebeur? Jesus sê nie: “Volg My,” terwyl Hy buite Matteus se gemors staan nie. Nee, Jesus stap in Matteus se gemors in en lei hom daaruit. Jesus word liefde vir Matteus deur sy huis binne te gaan. Hy loop Matteus se pad saam met hom, ’n pad van verwerping, isolasie en skaamte. Waar die samelewing ’n verraaier gesien het, het Jesus hoop gesien, wetende dat Matteus se skaamte in ’n lewe van feesviering sou verander. Jesus se uitnodiging was ’n weg uit sy gemors, in ’n nuwe lewe in — ’n lewe met ’n nuwe identiteit en vervulling.

Deur saam met ‘n tollenaar gesien te word, plaas Jesus sy reputasie op die spel. Maar sy liefde vir Matteus was groter as sy behoefte aan ’n goeie naam voor mense. Jesus het geweet die mees liefdevolle ding wat Hy vir Matteus kon doen, was om met Matteus te vereenselwig, want Jesus sou self die pyn verstaan om alleen te wees en deur mense verwerp te word.

Hierdie liefde verander Matteus vir ewig.

Wat beteken dit vir ons? Jesus nooi ons om self liefde te wees soos Hy daardie dag liefde vir Matteus was. Ons word geroep om verder te kyk as ons eie reputasie voor mense, en om vir iemand anders liefde te wees. Jesus nooi ons om mense lief te hê wat “sonder hoop” is en om by húlle tafel, húlle lewens en húlle gemeenskap ’n sitplek in te neem.

Wie in jou lewe het jy afgeskryf of misgekyk omdat hulle geskiedenis, status of reputasie sleg is? Hoe kan jy nader aan hulle beweeg, eerder as om hulle weg te stoot?

Miskien is dit so eenvoudig soos om hulle vir ete te nooi. Of selfs beter — om ja te sê op húlle uitnodiging en by húlle tafel te sit. Dink net wat God kan doen deur so ‘n liefde.