Almal wil wen, maar niemand wil wag nieVoorbeeld

Ontdek God se wil vir jou lewe

As 'n leraar, is die mees algemene vraag wat mense my vra: “Hoe kan ek uitvind wat God se wil vir my lewe is?”

Hier is vier stappe om jou te help om dit te ontdek:

1. Ontwikkel 'n passievolle begeerte na God en wat vir Hom die meeste saak maak.
   Ons moet die hart van God leer ken sodat ons hartsbegeertes met Syne ooreenstem. Ek bid altyd dat God my sal inspireer om gedagtes en begeertes te hê wat Hom sal behaag.


2. Spandeer tyd om te bid en om die Woord van God te lees
   Dit sal jou help om sy stem te herken. My daaglikse gebed klink soos volg: “Here, help my om U stem te hoor en te herken dat dit U is, sodat ek die dinge kan doen wat U van my verlang.”


3. Gee aandag aan jou natuurlike gawes en vermoëns
   Fokus op dit waarin jy goed is. God gee jou gawes volgens sy planne vir jou lewe. Gebruik dit wat God binne jou geplaas het om sy koninkryk te help bou. Dit is die wil van God vir jou lewe.


4. Soek raad by geestelik volwasse mense
   God plaas mense in ons lewens om ons te help. Wees gewillig om begelei te word. Goddelike raad sal jou net nader aan die ontdekking van God se volmaakte wil vir jou lewe bring.

Diegene wat die wil van God vir hulle lewe wil leer ken, het 'n begeerte om God te behaag. Waarom sal enigiemand wil weet wat God se wil vir hulle lewe is, as hulle geen bedoeling gehad het om sy plan te vervul nie? Dit is 'n edele ambisie om God se wil vir jou lewe te wil ken.