Psalms Vir Die PandemieVoorbeeld

Woede is dodelik. Die boek van Spreuke sê dat 'n mens van woede kan doodgaan. Woede maak dat mense dinge aanvang wat hulle lewens vernietig. Woede bring die einde aan baie mense se lewens. Daarom moet jy iets met woede doen. Jy moet van die gif ontslae raak. Gelukkig leer Asaf hoe om dit te doen. Gelukkig eindig Psalm 73 nie by vers 14 nie. Gelukkig is daar nog verse: 15 tot 28. Die heel eerste ding wat Asaf leer, en die tweede deel van sy Psalm, is dat jy 'n toksiese lewe sal hê as jy woede koester.

Hoor net wat sê hy in vers 15: “Maar as ek so sou aanhou praat, sou ek dié verloën wat aan U behoort.” Asaf gaan dink daaroor na. Hy doen een goeie ding – Hy skuld homself ʼn tweede opinie en hy doen dit. Jy sien, die probleem met woede is dat dit alle deernis en sagtheid en nederigheid uit jou lewe uithaal. Woede beroof jou van tweede opinies wat jy jouself skuld.

Asaf stop, gee ʼn tree terug en hy besef hy is besig om droog te maak. Hy sien wat sy woede aan sy vrou en aan sy familie doen. 'n Mens kan nie met woedende mense saamleef nie. Het jy al gesien? Jy sit in ʼn geselskap en ou Jan Woede bars uit. Dan is almal ewe skielik op hulle agterhoede. Woedende mense sê wat hulle wil, soos hulle wil, wanneer hulle wil, en hulle regverdig hulself: “Jy, weet, ek is eerlik. Ek is reguit. Ek gee nie om wat ander mense van my dink nie.” Moet dit nie doen nie, Asaf.