Wees Die Hande En VoeteVoorbeeld

Dit Is Jou Voete en Hande

Jy wonder dalk hoe 'n mens wat sonder enige ledemate gebore is homself as die hande en voete van Jesus op aarde beskou? 

Ek stem heelhartig saam dat dit 'n baie goeie vraag is. Ek het dieselfde vraag al baie keer vir myself gevra tydens my grootwordjare. Watter doel kan God vir 'n man sonder ledemate hê? 

Hierdie woorde van Sint Teresa van Avila het oor die jare heen 'n geweldige groot invloed op my gehad:

Christus het geen liggaam nie, behalwe joune,
Geen hande, geen voete op aarde nie, behalwe joune,
Dis met jou oë waardeur Hy met deernis na hierdie wêreld kyk.
Dis jou voete waarmee Hy loop om goed te doen, dis jou hande waarmee Hy die hele wêreld seën. 

Hierdie aanhaling het my voorsien van een van die talle stappe wat ek geneem het om my doel te vind as motiveringspreker en Christelike rolmodel, wat my geloof met ander wil deel. Ek kan nie alles doen nie, maar ek doen wel alles in my vermoë om mense te oortuig om God se huis te vul. Dit is wat ons as Christene veronderstel is om te doen.

Die waarheid oor wie ons is, is hoe ons van dag tot dag leef. As jy ander wil beïnvloed, is die belangrikste ding wat jy kan doen om 'n lewende voorbeeld te wees van die beginsels, ideale en geloof wat jy voorstaan. Die beste manier om jou oortuigings met ander te deel, is om jou geloof uit te leef, veral wanneer jy onder druk verkeer, wanneer uitdagings oor jou pad kom, en selfs wanneer die lewe die een krisis na die ander oor jou pad bring. 

Die mense om jou kyk en neem waar hoe jy reageer op die krisisse wat die lewe oor jou pad bring. Hulle kyk hoe jy liefde teenoor ander openbaar en hoe jy hulle behandel. Hulle beoordeel jou egtheid deur te kyk of jy gedurende donker tye aan jou eie eise voldoen. 

Dit beteken nie om positief te wees net ter wille van die skyn nie. Dit beteken om krag van diep binne jouself te put, eerder as om in wanhoop te verkeer; om een treetjie op 'n slag in 'n positiewe rigting te neem. 

Dit het my jare van depressie en selfs selfmoordpogings geneem voor ek verstaan ​​het dat ek nie God se fout was nie, maar dat God 'n doel vir sy "perfekte onvolmaakte kind" gehad het. Jy is ook deel van God se plan. Hy roep elkeen van ons om sy hande en voete op aarde te wees.

Wat beteken dit om God se hande en voete te wees? Hoe is dit vandag in jou lewe van toepassing?