Die verspieders as ‘n skadubeeld van die Heilige Gees

In Josua 2 lees ons van twee Israelitiese verspieders wat na Jerigo gestuur is om die stad te verken voor die inval van die Israeliete. In die Midrash word die twee verspieders wat deur Josua gestuur is, geïdentifiseer as Pinehas en Kaleb. Hulle het hulleself volgens die Midrash as pottebakkers vermom en uitgeroep om hulle produkte te verkoop en uiteindelik het hulle by Ragab se herberg beland.

Robert Boling wys daarop dat in antieke tye 'n herberg 'n ideale plek was om inligting in te samel, aangesien dit as 'n ontmoetingspunt vir mense van binne die stad en buite die gemeenskap gedien het.

Die verspieders was nie net daar om inligting te bekom nie, maar hulle het ‘n sending gehad – hulle moes die stad se lot bepaal en die toekomstige verlossing van Israel voorberei. Die verspieders in Josua is ‘n skadubeeld in die Ou Testament van die werk wat die Heilige Gees in die Nuwe Testament gaan verrig.

Net soos die verspieders die stad Jerigo verken het om die plan van God uit te voer, het die Heilige Gees die wêreld betree om die harte van mense te ondersoek. Die verspieders het Ragab oortuig van haar sonde en haar bewus gemaak van God en die weg tot redding. Dit weerspieël die werk van die Heilige Gees, wat mense lei tot bekering, hulle in ‘n verhouding met God bring en in sy familie opneem.

Soos Jesus dit in Johannes 16:8 sê: “En wanneer Hy kom, sal Hy die wêreld oortuig van sonde en van geregtigheid en van oordeel”. Net soos die verspieders in Josua vir Ragab ‘n kanaal van redding geword het, is die Heilige Gees vir ons die Persoon wat ons na Christus lei. Hy help ons om die werk van God in ons lewens te omhels en sy verlossing te ontvang.

Vertrou op die leiding van die Heilige Gees. Net soos Ragab die verspieders se leiding vertrou het om die redding van Ragab en haar familie te verseker, moet ons die Heilige Gees toelaat om ons te lei en ons harte oop te maak vir die evangelie van Christus.

Gebed

Vader dankie vir die Heilige Gees, wat die wêreld oortuig van die waarheid van die evangelie van Jesus Christus. Heilige Gees ek vra dat U my sal lei om u plan in my lewe te ontdek. Heilige Gees, help my om my vertroue op u leiding te plaas en om die werk wat U in my begin het tot volle verwerkliking te bring. Amen.