Die venster van redding

Daar word op verskeie plekke in Ragab se verhaal na haar huis se venster verwys. Sy het die twee verspieders met ‘n tou deur die venster laat afsak en sy het die rooi tou aan die venster vasgebind, in opdrag van die verspieders. Die venster verwys nie net na ‘n fisieke opening nie, maar ook ‘n simboliese een en sluit aan by die tema van vensters in die Bybel, wat dikwels hoop, ontsnapping, openbaring of God se werke verteenwoordig.

In Genesis 8:6 maak Noag die venster van die ark oop om die kraai uit te laat, wat die aankondiging van die einde van die vloed simboliseer. Dawid ontsnap deur ‘n venster toe Saul hom probeer doodmaak en Daniël bid by sy venster, gerig na Jerusalem, as ‘n daad van hoop en vertroue op God se beloftes. Elisa beveel koning Joas om die venster oop te maak, simbolies van visie op oorwinning.

Net so word Ragab se venster ‘n simbool van ontsnapping, nie net vir die verspieders nie, maar uiteindelik vir haar hele familie. God gebruik die mees onwaarskynlike omstandighede om instrumente van verlossing te skep.

Die venster in Ragab se verhaal het ‘n oorgang na ‘n nuwe era vir haar en haar familie ingelui en haar daad van geloof deur hierdie venster was nie net fisies nie, maar ook geestelik – ‘n vertroue in God se beloftes vir ‘n nuwe toekoms.

Ragab se venster nooi ons uit om ons eie ‘vensters’ van geloof oop te maak en op God te vertrou om ‘n pad te maak, selfs in moeilike omstandighede. Waar in jou lewe moet jy ‘n venster van geloof, visie en hoop oopmaak en op die Here vertrou?

Gebed

Here, help ons om ook die vensters van ons lewe oop te maak sodat ons u verlossing kan ervaar. Help ons om, soos Ragab, op u beloftes te vertrou, selfs wanneer omstandighede onseker lyk. Gee ons die moed om ons geloof uit te leef en op U te vertrou vir redding en ‘n nuwe begin. Laat ons lewens ‘n venster wees waardeur ander u genade en liefde kan sien. Amen.