Ìyìn: Àṣàrò nínú Orin DáfídìÀpẹrẹ

Kíni ó sọ?

Onísáàmù ń yin ó sì gbẹ́kẹ̀lẹ́ Olúwa ní gbogbo ọjọ́ ayé rẹ̀ nítorí pé òtítọ́ Rẹ̀ dúró. Ó pe Ísírẹ́lì níjà láti yin Ọlọ́run fún àwọn òfin àti Ọ̀rọ̀ Rẹ̀ tí a fihàn.

Kíni ó túmọ̀sí?

Èrò ọ̀pọ̀ ni pé wọ́n kọ sáàmù márùnún tí ó kẹ́hìn lẹ́yìn tí wọ́n ti parí tẹ́ńpìlì kejì tí wọ́n sì ti parí àtúnkọ́ ògiri Jèrúsalẹ́mù ni. Ó jẹ́ àlàyé tí ó bá a mu wẹ́kú fún ìdí tí àwọn sáàmù wọ̀nyí fi bẹ̀rẹ̀ pẹ̀lú àwọn ọ̀rọ̀ mẹ́ta pàtó yìí: “Ẹ yin Olúwa.” Nígbà ìgbèkùn Ísírẹ́lì àti ìpadàbọ̀ rẹ̀, òǹkọ̀wé náà ti kọ́ láti fi ìrètí rẹ̀ sínú Ọlọ́run dípò àwọn ènìyàn. Ẹlẹ́dàá Ọ̀run àti Ayé nìkan ni ó ń gbé àwọn tí ó ní ìdààmú ró, Ó ń gbé àwọn tí a rẹ̀ sílẹ̀ sókè, tí Ó sì ń wo àwọn oníròbìnújẹ́-ọkàn sàn. Kò ní já àwọ́n tí ó gbẹ́kẹ̀lé E kúlẹ̀. Ísírẹ̀lì ní ìdí pàtàkì láti yin Ọlọ́run; kò sí orílẹ́ èdè mìíràn tí ó ní ìfihàn ọgbọ́n Ọlọ́run àti Ẹni tí ó jẹ́ nípasẹ̀ àwọn òfin àti ìlànà Rẹ̀. Ó yẹ láti yìn Ín.

Báwo ni kí n ṣe dáhùn?

Kíni àwọn ìdojúkọ tí ò ń ní lọ́wọ́lọ́wọ́ báyìí? Tani o gbẹ́kẹ̀lé fún ìdáhùn sí wọn? Ọlọ́run ṣeé gbẹ́kẹ̀lé láti fún ọ ní ohun tí o nílò nígbà tí o bá lo àkókò nínú Ọ̀rọ̀ Rẹ̀ àti àdúrà. Tí o bá ń ṣe àníyàn, o lè yí padà sí I fún àlàáfíà. Tí o bá dánìkànwà, o lè yí padà sí I fún ìbádọ̀rẹ́. Tí ọkàn rẹ́ bá bàjẹ́, o lè yí padà sí I fún ìwòsàn. Tí o bá dà bí ẹni pé o kò ní agbára mọ́, o lè yí padà sí I fún agbára. O tilẹ̀ lè dúpẹ́ kí o sì yìn Ín kí àwọn ìdáhùn tó dé nítorí pé láéláé ni Ọlọ́run jẹ́ olótìtọ́ sí àwọn tí wọ́n yàn láti ní ìrètí nínú Rẹ̀.