Matthew 26
26
1Aman Yèsu a n'ndeva ma nenga'a haha tèlèba, a ngaƋa ta golahi nenga'a:
2Kin suna, njèkè m'mèn cèw, ta da gi ngolala Pâque, a ta da gshè Kra-ndo a kita, aman ta da gézlèlè'a.
3Te deɓa'a ndohi mvi skwi a Zhiklè mbibihia'a, a malamhai, a ndohi nhala'a ta ɓeceda va a gala Bi ndohi mvi skwi a Zhiklè, nzlembaƌ na Caiphe, 4a ta tsomma, aman ta gshè Yèsu, a maya ncèkèlma, a ta kèƌè'a. 5Aman ta gaƌa:
Te ngolala ka ɓai, man ɓai ndohi ta da rubai.
6Aman Yèsu a zhè te Béthanie, te gi Simon, ndo hutsoƋ, 7ngwoz ngiƋè a mshkè a sam na, a koloba ɓurdi te rai, nshum nenga'a a vata. Aman Yèsu a ndi skwai, ngwoz a mbaƋa na burdi a gèƋ. 8Aman golahi Yèsu ta rka'a, ta gu ndav, a ta gaƋa:
A gedasse te pa me? 9Dara man ta preda ma a suli kumba, a ta va ta ndohi ntawassa'a.
10Aman Yèsu a suna, a ngaƋa ta:
Kin pra na zlau a va ngwoz haha èhèmè? A ngau skwi man amba a sam ga. 11Ndohi ntawassa'a ta zhè a sam kinè pèc pècèk; aman iyè, i nzi a sam kinè pèc pècèk azɓai. 12Nenga'a a mbaƋa burdi a va ga, aman a tilay va ga, ga i metsi ga. 13A vava i gaƌa kinè: T'herkeda tèlèba, man ta da njè ta ma mbela'a, ta da gèƋè skwi man ngwoz haha a gau, a ta da hérè'a.
14Judas Iscariot, staƋ te va 12, a mdo a sam ndohi mvi skwi a Zhiklè mbibihia'a, 15a ngaƌa:
Aman i va kinè Yèsu a ri a kinè, kin da vay mè?
A tenga'a ta ngra na gurso 30. 16Te deɓa'a a hüno man a nwoy maya, aman a nga na ri a gèƌ. 17A pats nshèlèkura'a man ta ndi movar man skwi nshégèrè a te di ɓai, golahi Yèsu ta shkè a sam Yèsu, a ta gaƋa na:
Ka woya aman nga da tila ka skwi n'ndi Pâque a ka ndia'a tema?
18Yèsu a ngaƋa ta:
Vodo a kokwar mbia'a, vagaƋa na zana te pa: Ndo njèngè ma a gaƌa: País ga ndul ndul ma. Nga a golahi ga, nga ndi tambak Pâque a sam ngaya.
19A golahi Yèsu ta gu ara man Yèsu a gaƋa ta, a ta tila skwi n'ndi Pâque. 20A dakwaƋ man pats nkala ma, Yèsu a n'nza hai a ndi skwai a nda golahi 12. 21Aman ta ndi skwi n'ndai, a ngaƋa ta:
A vava i gaƋa kinè: StaƋ te ndev kinè a da gay ri a gèƌ.
22Tenga'a ta kuƌi te ndav ta, a ta hüno, staƌ staƌ a ndzhoƌo:
Bai, i dè?
23A nenga'a a m'mbeƋa ta a ma:
Nenga'a man nga tèr ri a gandaf a vna, nenga'a a nda gay ri a gèƌ. 24Kra-ndo a dè na ara man ta windo te ƌèlèwèr Zhiklè a géƋ nenga'a; aman woba ndo man a ga na ri a gèƋ a Kra-ndo. Dara man da yoko ɓai.
25A Judas man a nga na ri a gèƋ, a m'mbeƋa na a ma Yèsu:
I Ƌè, Rabbi?
A Yèsu a ngaƋa na:
Ara ngèƋ ngaya!
26Aman ta ndi skwai, Yèsu a nco movar, te deɓ man a mpshè na ma, a ntsaka'a, a mva ta golahi nenga'a, a ngaƋa:
Voco, vandau, na haha va ga!
27Te deɓa'a a nco kokwai, te deɓ nshid gèƋ, a mva ta, a ngaƋa:
Vasau tèlèba te pa! 28Aman na haha pombaz ga, pombaz nderzlèma, man mbaƋahai, a mprè mali ndohi kumba. 29I gaƋa kinè, anai i si barassa te deɓ anta asaɓai, ha pats man i da sia'a mɓua'a a nda kinè te kokwar-Bi Bab ga.
30Te deɓa'a aman ta slu dimèsh psaume Zhiklè ma, to do ta, a za oliviers. 31Yèsu a ngaƋa ta:
A vaƋ haha, kin da jèkyè tèlèba; aman ta windo te ƌèlèwèr Zhiklè: I keƌa ndo mɓer skwai, a tambakihi a ta ngezl ta. 32Aman i slambaƋkaƋauda te m'metsi ma, i dè a ma kinè a kokwar Galilée.
33A Pierre a m'mbeƋa na a ma:
Aman tèlèba ta jèke ka a pa, iyè, i jèke ka a pa azɓai.
34Yèsu a ngaƌa na:
A vava, i gaƌa ka, a vaƋ haha, ga ngarah a tsi da'ai, ka cèkèlma a géƋ ga sak makar.
35Pierre a ngaƋa na:
Ko i metsi ga a va ka, i cèkèlma a géƋ ngaya azɓai.
A golahi tèlèba ta goƋ arsa. 36Te deɓa'a Yèsu a mshkè a nda golahi na a sam man ta baba na Gethsémané. Yèsu a ngaƋa ta:
Vanza hai, ha i dè a i tsi ri ahngata.
37A nco Pierre a wudahi Zèbédèe cèw a nda nenga'a, a hüno man a nkuƌi te ndav na, ndav nenga'a a mbeƌè. 38A ngaƋa ta:
Ndav ga a mbeƋè, nlèyè a keƋyè a hi a vèvèƋ. Vanza a haha, vanza a dai a nda iyè!
39Te deɓa'a a nco sak a ma kètè, a ntseda medi a hai, a ntsu rai, a ngaƋa:
Bab ga, aman ara man a gai, kokwi haha do do auda a sam ga; aman ara man iyè a nwoya ka ɓai, aman ara man ka, ka woya'a.
40A Yèsu a mshkè a deɓa a sam golahi nenga'a, a n'ngats ta, ta nzhuna. A ngaƋa na Pierre:
Ka slaha ka nzi a dai a nda iyè kèshkata azɓi Ƌè? 41Vanza a dai, vatsu rai, aman skwa da pe kinè a wi ɓai. Mèzhèɓ a woya a ngi amba, aman wuƋi ndo azɓai.
42A va za'a, macecèwa'a, a ndo a ntsu rai, a ngaƋa:
Bab ga, aman kokwi haha a slaha a ndè auda a sam ga azɓai, sèi i sia'a, da gu ara man ka woya'a.
43Aman a mshkè a deɓa za'a, a n'ngats ta, ta nzhuna. 44A njèke ta, a ndo za'a, a ntsu ri mamakara'a, a ngoƌ lèmèlèmè. 45Te deɓa'a a mshkè a sam golahi nenga'a, a ngaƋa ta:
Antanta vanzhun ma! Vasok va! Na haha, tiƋè sama ma, a ta va na Kra-ndo a ri a ndohi malihai. 46VaslambaƋa, ngodokoya, na haha, nenga'a man a gay ri a gèƋ a herdeka nga va.
47Aman a gèƋè dai, na haha Judas a mshkè, staƋ te va 12, a ndohi rèdèdèa a nda nenga'a, a ka fahi gwèsh a géƌ gaƋa, ara man ndohi mvi skwi a Zhiklé mbibihia'a, a ndohi nhala'a, ta zlinde ta. 48Ndo n'nga na ri a gèƌ a Yèsu, a ngaƌa ta ar haha, aman ta shinè te pa:
Nenga'a man i da kelawa na ri a da'ai, vogso!
49Tsam-tsam a mshkè a sam Yèsu, a ngaƌa:
Mbalai, Rabbi!
A nkelawa na ri a da'ai. 50Yèsu a ngaƌa na:
Masli ga, gu skwi man ka shkè a géƌè'a.
Te deɓa'a ta shkè, a ta faha ri a Yèsu, a ta gso. 51Na haha, staƋ te va tenga'a man ta zhè a nda Yèsu, a ngeda rai, a mpho kafahi gwèsh, a ntsau ɓèl bi ndohi mvi skwi a Zhiklè, a ntsahama na zlembaƋ auda a va. 52A Yèsu a ngaƋa na:
Ciɓda gwèsh a gi na! Aman ndohi tèlèba man ta phè gwèsh auda, ta da metsi te ri gwèsh. 53Ka hur antanta ba i slaha a i tsi ri a bab ga azɓi Ƌè, aman a zlindkoƋi golahi a fena gozhèm 12 a sam ga? 54Ɗèlèwèr Zhiklè a da ndikè a pa kè? Sèi a gi arsa!
55A pats nasa Yèsu a ngaƌa ta ndohi rèdèdèa:
Kin shkè ara man kin shkè a sam ndo metsar, a kafahi gwesh a géƌ gaƋa, aman a kin gsyè Ƌè? Pèc pècèk i nza a sam kinè te gi Zhiklè, a i senda kinè, kin gsyè ɓai. 56Aman skwi haha tèlèba a gi arsa, ara man Ƌèlèwèr ndohi nhadka ma Zhiklè a gaƋa.
A golahi nenga'a ta jèkeda a pa tèlèba, a ta hu ta. 57A ndohi man ta gso Yèsu, ta da'a a sam Caiphe, bi ndohi mvi skwi a Zhiklè, a sam man malamhai a ndohi nhala'a ta ɓica va. 58A Pierre a ndzodzor te deɓa dra, ha a ndè a gala bi ndohi mvi skwi a Zhiklè, a n'nzahai a sam ndohi mizlinè, a woya a nrka kita man ta da ngela na a gèƋ.
59A ndohi mvi skwi a Zhiklè mbibihia'a, a ndohi ncèmma tèlèba ta woy malwuƌi ncèkèlma a géƌ Yèsu, aman ta woy a ta kèƌè'a. 60Aman ta ngatsa ɓai, ko ndohi malwuƋihi ncèkèlma kumba ta shkè, a ta tsokol ma a géƋ nenga'a. Te deɓa'a ndohi malwuƋihi ncèkèlma cèw ta shkè, a ta gaƋa:
61Ndo haha a gaƌa: I slaha man i mbèƌda gi Zhiklè aussa, a i rèm ngiƋè te m'mèn makar.
62A bi ndohi mvi skwi a Zhiklè a nslambaƋa, a ngaƋa na Yèsu:
Ndohi haha ta gi ma a géƋ ngaya, ka mbeƋi a pa azɓi Ƌè?
63Aman Yèsu a n'nza tètè. A bi ndohi
mvi skwi a Zhiklè a ngaƋa na: I mbaƋa ka a nzlembaƋ Bi Zhiklè a nshèffè, sèi ka ngra nga, aman ka Kristi, kra Zhiklè!
64A Yèsu a ngaƋa na:
Ara ngèƋ ngaya! Aman i gaƋa kinè: Anai kin da rka Kra-ndo a nzi te ri mandi Zhiklè, a da shkè te va vanai te zhiklè.
65A bi ndohi mvi skwi a Zhiklè a nkuratsa maslaka nenga'a, a ngaƋa:
A derƋe Zhiklè! Kos nga woy ma malwuƋi ngiƋè za Ƌè? Antanta kin tsena'a ara man a derƋi Zhiklè. 66Kin hur kè?
A ta mbèƌa na a ma:
M'metsi mènè!
67Te deɓa'a ta njfa na slèslèɓ a dai, ta dutso, matrhia'a ta tsama na bazlazlam, 68a ta gaƋa:
Kristi, ngreda nga, ntse ka wa?
69Pierre a n'nzat'uda te gala. A dem mizlinè a mshkè a sam na, a ngaƋa:
Ka ba, kin nza a nda Yèsu, ndo Galilée!
70A Pierre a ntsokol ma a sam di ndohi tèlèba, a ngaƋa:
I sun skwi man ka gèƋè ɓai.
71Aman a ndo auda a ntamagai, dem mizlinè ngiƋè a nrka'a, a ngaƋa ta tengahi man ta zhè:
Nenga'a ba a n'nza a nda Yèsu, ndo Nazareth.
72A Pierre a tsokol ma za'a a mbèƋè:
I sun ndo haha ɓai!
73Te deɓa kètè ndohi man ta zlatsa a pa ta shkè, a ta gaƋa na Pierre:
A vava ka ba, ka staƋ te va ndohi nenga'a; aman da'ai ngaya ara tenga'a.
74Te deɓa'a a hüno man a mbèƋè a géƋ va na:
I sun ndo haha ɓai!
A nasa nasa ngarah a ntsu da'ai. 75A Pierre a nhur ma Yèsu, ara man a gaƋa na:
Ga ngarah a tsi da'ai, ka cèkèlma a géƋ ga, sak makar.
A mdo auda, a nkuƋau a vata.
Đang chọn:
Matthew 26: MAFNT
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Mofa New Testament © The Bible Society of Cameroun, 1989
