लुका 22
22
येसुका मार लागि मौका खोज्ल
(मत्ति २६:१-५,१४-१६; मर्कुस १४:१-२,१०-११; युहन्ना ११:४५-५३)
1अनि खमिर नाइ घाल्ल रोटि खाइलाहार निस्तार पब्निक दिन् लगम एले त,#प्रस्थान १२:१-२७ 2मुल पुजारि आ धर्मगुरुस्या येसुका केनामे मार्ब कहिक मौका खोज लग्ले किरकि ओकर्स्या मानुकसिसङ डेराबेक।
यहुदा इस्करियोतिले येसुका धोखा देल
(मत्ति २६:१४-१६; मर्कुस १४:१०-११)
3ओहे जुमा येसुक बार जना चेलाभोरिम एक जना यहुदा इस्करियोति कहलाहारक मनम सैतान ढुक्ले। 4ओहेस उ मुल पुजारि आ मन्दिरक देख्भाल कर्लाहार सिपाहिसिलग जाइक येसुका ओकर्सिक हाथम पक्राइ देल्हार बारेम सल्लाहा करल्के। 5यि बात सुनिक ओकर्स्या एक्दम खुसि भइक ओक्रा ढेवा देल्हार बाचा करल्के। 6ओहेस यहुदा पनि मान्ले आ मानुकस्या थाहा नाइ पाइलाहार तरिकास केनामे येसुका ओकर्सिक हाथम पक्राइ देबो कहिक मौका खोज लग्ले।
चेलासिका निस्तार पब्निक तयारि कर पठाइल
(मत्ति २६:१७-२५; मर्कुस १४:१२-२१; युहन्ना १३:२१-३०)
7पछास खमिर नाइ घाल्ल रोटि खाइलाहार निस्तार पब्निक दिन् एले, जुन दिन् निस्तार पब्निक भेराक पठाका बलि चर्हाब परेक। 8अनि येसुले पत्रुस आ युहन्नाका एना कहिक पठाइल्के, “तोर्स्या जो आ आपन्सिक लागि निस्तार पब्निक भोज तयार कर्।”
9तर ओकर्स्या येसुका पुछल्के, “हमर्स्या यि भोज कत तयार करुम?”
10येसुले ओकर्सिका कहल्के, “तोर्स्या सहरम ढुक्ति बितिन एक जना मानुकले घैलाम पानि बोकिक जाइत भेट्तो। तोर्स्या ओक्रे पछा-पछा जाह्य। 11अनि उ जुन घरम ढुक्तो, उ घरक मालिकका पुछ्ह्य, ‘हमर्सिक गुरुले तोरा यि पुछ्ल छो, हम आप्न चेलासिसङ बेठिक निस्तार पब्निक भोज खाइलाहर मेज्बानसि बला कोठा कत छो?’ 12ओइले तोर्सिका उपरका तलाक एगो बर्किगो कोठाका सजाइल देखाइ देतो। तोर्स्या ओहेलग तयार कर्ह्य।”
13अनि ओकर्स्या गेले त जेनामे येसुले कहिक पठाइल छले ओनाहिमे पाइल्के आ ओहेलग ओकर्स्या निस्तार पब्निक भोज तयार करल्के।
प्रभु भोज
(मत्ति २६:२६-३०; मर्कुस १४:२२-२६; १ कोरन्थि ११:२३-२५)
14जब भोज खाइलाहार बेला भेले त येसु आप्न बार जना पेरेरितसिसङ खाइ लागि बेठ्ले। 15अनि ओकर्सिका कहल्के, “हम्रा दुख भोगस अगा निस्तार पब्निक यि भोज तोर्सिसङ खाइ लागि एक्दम मन छलो। 16किरकि हम तोर्सिका कह स्यो, जखन तलिक यि भोजक अर्थ पर्मेसोरक राज्येम पुरा नाइ हेतो, तखन तलिक हम दस्रो निस्तार पब्निक भोज नाइ खेबो।”
17एतेक कहिक येसुले अङ्गुरक रसस भोर्ल बाटि लेल्के आ पर्मेसोरका धन्येबाद दैक पेरेरितसिका कहल्के, “यि ले आ तोर्स्या सभेले बाँटिक पि। 18हम तोर्सिका कह स्यो, पर्मेसोरक राज्ये नाइ आइल तलिक यि अङ्गुरक रस हम फेरि नाइ पिबो।”
19तब येसुले रोटि लेल्के आ पर्मेसोरका धन्येबाद दैक रोटिका टुक्रा करिक एना कहति पेरेरितसिका देल्के, “यि रोटि तोर्सिक लागि देल हम्र देह स्यो। तोर्स्या हम्र सम्झनाम एनाहिमे करिक खाह्य।” 20ओनाहिमे जब ओकर्स्या रोटि खाइसकल्के त येसुले अङ्गुरक रसस भोर्ल बाटि लइक एनामे कहल्के, “यि बाटि हम्र रकतम बाह्न्ल पर्मेसोर आ ओक्र उप्रि बिस्वास कर्लाहार्सिक बिचक लया बाचा स्यो, जुन रकत तोर्सिक लागि बहाइल छो।#यर्मिया ३१:३१-३४
21“तर देख्, हम्रा पक्राइलाहार मानुक हम्रेसङ बेठिक खाइति छो। 22मानुकक बेटाका त पर्मेसोरक योजना अन्सार मोरि पर्तो तर धिक्कार उ मानुकका जुन मानुकले ओक्रा पक्राइ देतो।”
23यि बात सुनिक पेरेरितस्या आपसम एनामे बज लग्ले, “एहेन काम कर्लाहार कोन स्यो?”
पेरेरितसिक बिचम सभेस बर्कि कोन कहिक बाद-बिबाद भेल
24ओहे जुमा पेरेरितसिक बिचम सभेस बर्कि कोन स्यो कहिक बाद-बिबाद हब लग्ले।#मत्ति १८:१; मर्कुस ९:३४; लुका ९:४६ 25ओहेस येसुले ओकर्सिका एनामे कहल्के, “यि सन्सारक रजास्या पो आप्न पर्जासिक उप्रिम मनपरि सासन कर्छे। अनि हमर्स्या त मानुकसिक भलाइ कर्लाहारसब स्यो कहिक कहछे। 26तर तोर्स्या चाहिं ओहोन नाइ हब्ह्य। तोर्सिभोरि जे सभेस बर्कि बन चाहाछो, उ सभेस कन्कि बनुस आ जे अगुवा बन चाहाछो, उ नोकर जक्या बनुस।#मत्ति २३:११; मर्कुस ९:३५ 27किरकि खनाइ खाइ लागि बेठ्ल मालिक आ सेबा कर्लाहार नोकरम कोन बर्कि स्यो? मालिक नाइ स्यो झन? तर देख्, हम तोर्सिक बिचम एगो सेबा कर्लाहार नोकर जक्या स्यो।#युहन्ना १३:१२-१५
28“तोर्स्या हम्र सभे दुखक समैम हम्रा साथ देति रहल। 29ओहेस जेनामे हम्र बापले हम्रा सासन कर्लाहार अधिकार देल छो, ओनाहिमे हमु तोर्सिका अधिकार देस्यो। 30तोर्स्या हम्र राज्येम हम्रे टेबुलम बेठिक खेब-पिब आ हम्रसङ राजगद्दिम बेठिक इस्राएलक बार कुलक मानुकसिक फैसला कर्ब।”#मत्ति १९:२८
पत्रुसले येसुका इन्कार कर्लाहार बारेम अगमबानि
(मत्ति २६:३१-३५; मर्कुस १४:२७-३१; युहन्ना १३:३६-३८)
31तब येसुले पत्रुसका कहल्के, “सिमोन, ए सिमोन, सुन् त, जेनामे किसानले गोहोमका फट्किक भुसाका बेक्छाइ छो, ओनाहिमे सैतानले पनि हम्र उप्रिम बिस्वास कर्लाहार्सिक बिस्वासका जाँच लागि अनुमति लेल छो। 32तर तोर बिस्वास कम्जोर नाइ हउस कहिक तोर लागि हम पर्थना कर्ल स्यो। ओहेस जब तुइं फेरि आप्न बिस्वासम जोर्गर भइक हम्रलग घुमिक एब त आप्न दाजुभाइसिका पनि बिस्वासम जोर्गर बन लागि सहयोग कर्ह्य।”
33तर पत्रुसले कहल्के, “प्रभु, हम तोरसङ जेलम पर आ मोर लागि पनि तयार स्यो।”
34तर येसुले कहल्के, “ए पत्रुस, हम तोरा साँच्चेक कह स्यो, आजु भोल्या बोलस अगाहि तुइं हम्रा नाइ चिन्स्यो कहिक तिन बाजि इन्कार कर्ब।”
दुख सह लागि तैयार रह
35तब येसुले ओकर्सिका पुछल्के, “जब हम तोर्सिका खुसिक खबर पर्चार कर लागि झोला, जुत्ता आ ढेवा बिना पठाइल छल्यो त तोर्सिका कथ्यो चिजक खाँचो भेल छलो?”
ओकर्स्या कहल्के, “अहँ, कथ्योक खाँचो नाइ भेल छलो।”#मत्ति १०:९,१०; मर्कुस
36पछास फेरि येसुले ओकर्सिका कहल्के, “तर आब् जक्रसङ ढेवा छो, ओइले ढेवा बोकुस, झोला भेल्हारले झोला बोकुस आ जक्रसङ तर्बार नाइ छो, ओइले आप्न कप्रा बेचिक एगो तर्बार किनुस। 37किरकि हम तोर्सिका कह स्यो, धर्मसास्तरम ‘ओक्र गन्ति पापिसिसङ भेलो’ कहिक निख्ल सभे बातसब हम्र जिबनम पुरा हबि पर्तो आ साँच्चेक हम्र बारेम जे निख्ल छो, उ सभे पुरा हबि लग्ल छो।”#यसैया ५३:१२
38तब चेलास्या कहल्के, “प्रभु, एत ताक्त हमर्सिसङ दुइगो तर्बार छो।”
येसुले जबाफ देल्के, “ओतेक काफि छो।”
जैतुन पाहारम येसुले पर्थना कर्ल
(मत्ति २६:३६-४६; मर्कुस १४:३२-४२)
39तब येसु आप्न चेलासिसङ निस्तार पब्निक भोज खाइक ओइ घरस निकल्ले आ सब्दिनक जक्या सहरस बाहारम भेल जैतुन पाहारम गेले। चेलासब पनि येसुसङ गेले। 40जब येसु ओत पुग्ले त चेलासिका कहल्के, “तोर्स्या जाँचम नाइ पर लागि पर्थना कर्ति रह।”
41तब येसु चेलासिस कनेक सना दुर जाइक ठेउन्या मारिक एनामे पर्थना कर लग्ले, 42“गे बाप, तोर इच्छा रहतो त यि दुखक बाटि हम्र उप्रिस हटाइ दे। तैयो हम्र इच्छा अन्सार नाइ तर तोर इच्छा अन्सार हउस।” 43[येसुले पर्थना करिरहल जुमा एक जना सोर्गदुत आइक येसुका साहास देल्के। 44येसु पराने निकल्लाहार जक्या दुखम पर्ल कारनस झन आरो थुप्रे पर्थना करल्के। अनि येसुक पसिना रकतक बर्कि-बर्कि थोपा जक्या धर्तिम चुइति छले।]
45जब येसु पर्थना करिक उठ्ले आ आप्न चेलासिलग एले त ओकर्सिका सोकम परिक सुति सक्ल पाइल्के। 46ओहेस येसुले ओकर्सिका कहल्के, “तोर्स्या किर सुत्ल स्या? आब् उठ् आ जाँचम नाइ पर लागि पर्थना कर्।”
येसु पक्राउ पर्ल
(मत्ति २६:४७-५६; मर्कुस १४:४३-५०; युहन्ना १८:३-११)
47येसुले चेलासिका कहति-कहति एक हुल मानुकसब ओइलग एले। येसुक बार जना चेलाभोरिम एक जना यहुदा कहलाहार चेला चाहिं सभेस अगा-अगा आइक येसुका चुम्मा लिअ लागि लगम एले। 48तर येसुले ओक्रा कहल्के, “ए यहुदा, कथि तुइं मानुकक बेटाका चुम्मा लइक धोखा धि छ?”
49ओइलग घट लग्ल बातका थाहा पाइक चेलास्या येसुका पुछल्के, “हे प्रभु, हमर्स्या तर्बार चलाउँ?” 50ओहे जुमा एक जना चेलाले आप्न तर्बारस मुल पुजारिक नोकरक दहिना कानका च्वाट्टे काटि देल्के।
51तर येसुले ओक्रा कहल्के, “भेलो, आब् आरो नाइ कर्!” अनि येसुले ओक्र कानका छुइक अस्लि करि देल्के।
52तब येसुले पक्र आइलाहार मुल पुजारि, मन्दिरक देख्भाल कर्लाहार सिपाहि आ धर्मगुरुसिका कहल्के, “तोर्स्या डाकुका पक्र आइल जक्या कथि लाठि आ तर्बारसब लइक हम्रा पक्र लागि आइल स्या? 53हम सब्दिन तोर्सिसङ मन्दिरम छल्यो। उजुमा त तोर्स्या हम्रा नाइ पकर्ल तर यि तोर्सिक समै स्यो आ अँन्हारक सक्तिले राज करिरहल छो।”#लुका १९:४७; २१:३७
पत्रुसले येसुका इन्कार कर्ल
(मत्ति २६:५७-५८,६९-७५; मर्कुस १४:५३-५४,६६-७२; युहन्ना १८:१२-१८,२५-२७)
54तब ओकर्स्या येसुका पक्रिक सभेस बर्कि पुजारिक घरम लगाइल्के। तर पत्रुस चाहिं भले दुरि रहिक येसुका पछ्याइति गेले। 55उजुमा मानुकस्या एङ्नाक बिचम आगि सुन्गाइक ताप्ति छले। ओहेस पत्रुस पनि जाइक ओकर्सिसङ आगि ताप लग्ले। 56ओहे जुमा सभेस बर्कि पुजारिक घरम काम कर्लाहार एगो नोकर्निले पत्रुसका आगि ताप्त देखिक एक्होरो ताक्ति एनामे कहल्के, “यि मानुक पनि येसुसङ छलो।”
57तर पत्रुसले इन्कार कर्ति एनामे कहल्के, “गे दया, हम ओक्रा नाइ चिन्स्यो।”
58एक घरिया पछास दस्रो मानुकले पनि पत्रुसका देखिक कहल्के, “तुहुँ त येसुक चेला स्या।”
तर पत्रुसले इन्कार करिक कहल्के, “ए भाइ, हम ओक्र चेला नाइ स्यो।”
59ओक्र एक घन्टा पछास दस्रो मानुकले पनि आरो जोर दैक एनामे कहल्के, “साँच्चेक यि मानुक येसुसङि छलो किरकि एहो गालिलक स्यो।”
60तर पत्रुसले फेरि इन्कार कर्ति कहल्के, “ए भाइ, तुइं कथि कहति स्या, हम्रा थाहा नाइ छो।” पत्रुसले कहति-कहति भोल्या बोल्ले।
61ओहे जुमा येसुले घुमिक पत्रुसका ताकल्के त “आजु राति भोल्या बोलस अगाहि तुइं हम्रा तिन बाजि इन्कार कर्ब।” कहिक येसुले कहल बात पत्रुसका याद एले। 62ओहेस उ एङ्नास बाहार जाइक सुकुर-सुकुर कान लग्ले।
येसुक बिजेत कर्ल
(मत्ति २६:६७-६८; मर्कुस १४:६५)
63तब येसुका पकर्लाहार सिपाहिस्या येसुक खिसि कर्ति पिट लग्ले, 64अनि येसुक आँखम पट्टि बाह्निक एनामे पुछल्के, “तोरा पिट्लाहार कोन स्यो, ले अगमबानि कर्त?” 65एनाहिमे ओकर्स्या थुप्रे नाइ अस्लि बातसब कहिक येसुक बिजेत करल्के।
येसुका बर्कि पन्चायतम लगाइल
(मत्ति २६:५९-६६; मर्कुस १४:५५-६४; युहन्ना १८:१९-२४)
66अनि जब बिहान भेले त यहुदिसिक अगुवा, मुल पुजारि आ धर्मगुरुसब धेर्याइले आ येसुका बर्कि पन्चायतम आन लगाइक यि पुछल्के, 67“तुइं खिरिस्ट स्या त हमर्सिका कह।” तर येसुले ओकर्सिका जबाफ देति एनामे कहल्के, “हम तोर्सिका कहबो तैयो तोर्स्या नाइ पत्याइब,
68“आ हम तोर्सिका पुछ्बो त तोर्स्या उत्तर नाइ देब। 69तर आब् मानुकक बेटा सर्बसक्तिमान पर्मेसोरक दहिना काटम बेठ्तो।”
70तब ओकर्स्या येसुका पुछल्के, “कथि तुइं पर्मेसोरक बेटा स्या?”
येसुले ओकर्सिका जबाफ देल्के, “तोर्स्याहि कहछ, कि हम ओहे स्यो।”
71येसुक बात सुनिक ओकर्स्या कहल्के, “आब् आपन्सिका आरो पर्मानक खाँचो नाइ छो किरकि एक्रे मुहस आपन्स्या सुनि सक्ल स्या।”
Đang chọn:
लुका 22: DANU
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 (Active), Mother Tongue Translators Society and Wycliffe Bible Translators, Inc. All rights reserved.
