लुका 21
21
गरिब बिध्वाले भेटि चर्हाइल
(मर्कुस १२:४१-४४)
1एक दिन् येसु मन्दिरम भेल जुमा धनिक मानुकस्या मन्दिरक दान कर्लाहार बाकसम भेटि चर्हाइल ताक्ति छले। 2येसुले एक जना गरिब बिध्वाका पनि ओइ बाकसम तमाक दुइगो डलर चर्हाइल देखल्के। 3यि देखिक येसुले कहल्के, “हम तोर्सिका साँच्चेक कह स्यो, यि गरिब बिध्वाले सभेस बेसि भेटि चर्हाइल छो। 4किरकि अरु सभेले त आप्न बेसि भेल सम्पतिस भेटि चर्हाइल छो तर यि बिध्वाले त गरिब भइक पनि आप्न गुजारा कर लागि राख्ल सभे चर्हाइल्को।”
मन्दिर भर्कलाहारक बारेम अगमबानि
(मत्ति २४:१-१४; मर्कुस १३:१-१३)
5एक बाजि कुन्हुँ-कुन्हुँ चेलास्या मन्दिर देखिक “यि मन्दिर त कत्का छग्बर-छग्बर पाखनस बनाइल आ मानुकस्या दान कर्ल चिजसिस सजाइल छो!” कहिक बात कर्ति छले त येसुले ओकर्सिका कहल्के, 6“एहेन समै आब्ति छो, तोर्स्या अखन जे देख्ति स्या यि सभे भर्काइल जेतो आ एगो पाखन दस्रो पाखनक उप्रिम नाइ रहतो।”
आइलाहार दुख आ सताबटक बारेम चेताबनि
(मत्ति २४:३-२४; मर्कुस १३:३-१३)
7उ बात सुनिक चेलास्या येसुका पुछल्के, “हे गुरु, यि घट्ना कह्या हेतो? अनि यि सभे घट्नासब घट लग्ल छो कहिक हमर्स्या केनामे थाहा पाइबो?”
8तब येसुले ओकर्सिका जबाफ देल्के, “तोर्स्या होसियार रह, तोर्सिका कुन्हुँले ठक नाइ पाउस किरकि थुप्रे मानुकसब हम्र नामम एतो आ कहतो ‘हम खिरिस्ट स्यो, आब् समै लगेम आइसक्ल छो।’ तर तोर्स्या ओकर्सिक बात नाइ पत्याह्य। 9जब तोर्स्या देस-देसक बिचम लराइ आ ओइलगक मानुकस्या आप्न देसक सरकारक बिरोधम हुल-दङ्ङा कर्ल खबर सुन्ब त डरस नाइ अताल्ह्य किरकि सन्सारक अन्त्ये हबस अगा यि सभे घट्नासब हबि पर्तो। तर ओहे जुमा सन्सारक अन्त्ये चाहिं नाइ हेतो।”
10पछास येसुले फेरि कहल्के, “एगो जातले दस्रो जातक बिरोध कर्तो आ एगो देस दस्रो देससङ लराइ कर्तो। 11बर्कि-बर्कि भुइचालसब जेतो, जति-तति अनिकाल पर्तो, माहामारि फैलतो आ अकासम बर्कि-बर्कि डर लग्लाहार चिनहसब देखा पर्तो। 12तर यि सभे घट्ना घटस अगा मानुकस्या तोर्सिका पक्रिक सताइतो आ सभाघरसिम लगाइक तोर्सिक बिरोधम झुठा मुद्दा घालिक तोर्सिका दोसि ठहराइतो आ जेलम घालि देतो। अनि हम्र नामक कारनस तोर्सिका रजा आ हाकिमसिलग लगाइतो। 13उजुमा तोर्स्या हम्र बारेम गबाहि दिअ लागि मौका पाइब। 14तर तोर्स्या आप्न बचाउक लागि कथि कहबो कहिक अगाहिस चिन्ता नाइ कर्।#लुका १२:११,१२ 15किरकि हम तोर्सिका बज लागि एहेन बचन आ बुद्धि देबो कि तोर्सिक बिरोधिस्या उत्तर दिअ नाइ सकिक चुप-चाप रहतो। 16तोर्सिका आप्ने बाप-मतार, दाजुभाइ, नता-गोता आ सङ्स्या धोखा दैक पक्राइ देतो। तोर्सिभोरि कतेकका त तोर्सिक दुस्मनस्या मारि पनि देतो। 17अनि हम्र नामक कारनस सभेले तोर्सिका घिलाइतो। 18तैयो तोर्सिक कपारक एगो केस पनि नास नाइ हेतो। 19तोर्स्या यि सभे बातसब सहिक बिस्वासम जोर्गर भइक रहब त सब्दिन रहलाहार जिबन पाइब।
यरुसलेमक बिनास
(मत्ति २४:१५-२१; मर्कुस १३:१४-१९)
20“तर जब तोर्स्या यरुसलेम सहरका सेनास्या चारोभरस घेर्ल देख्ब त आब् यि सहर नास हब लग्ल छो कहिक बुझ्ह्य। 21उजुमा यहुदिया पर्देसम भेल्हारसब पाहारभर भागिक जाउस, यरुसलेम सहरम भेल्हारसब सहरस बाहार भागिक जाउस अनि गाँमम भेल्हारसब चाहिं सहर भित्रि नाइ जाउस। 22किरकि धर्मसास्तरम निख्ल सभे बातसब पुरा हब लागि उ सजाएक दिनसब हेतो। 23उजुमा देहभारि आ दुध पियाइलाहार जनिसिका थुप्रे दुख हेतो किरकि देसभोरिक मानुकसिक उप्रिम एक्दम बर्कि सङ्कट एतो अनि पर्मेसोरक रिस यि मानुकसि उप्रिम पर्तो। 24दुस्मनस्या मानुकसिका तर्बारस मार्तो आ बन्दि बनाइक सभे देससिम लगाइतो। अनि दस्रो जातक मानुकसिक समै पुरा नाइ भेल तलिक ओकर्स्या यरुसलेमका आप्न टाङक तरम जाँतिक राख्तो।
मानुकक बेटा फेरि एतो
(मत्ति २४:२९-३१; मर्कुस १३:२४-२७)
25“अनि चन्ना, सुरुज आ तरासिम अचम्मक चिनहसब देखा पर्तो आ समुन्द्रक गर्जन आ बर्कि-बर्कि हेल्फा देखिक सन्सारक सभे मानुकसब डरस अताल्तो। 26सन्सारम आब लग्ल दुखक कारनस सभे मानुकसब डरस मुर्छा पर्तो किरकि उप्रि अकासम भेल सभे सक्तिसब हिल्तो। 27तब ओकर्स्या मानुकक बेटाका सक्ति आ बर्कि महिमाम मेघम आब्त देख्तो।#दानिएल ७:१३; प्रकास १:७ 28जब यि बातसब हब सुरु हेतो त तोर्सिक मनका जोर्गर बनाइक ठेर्या किरकि पर्मेसोरले तोर्सिका झप्सिन यि दुखस बचाइतो।”
नेभाराक गाछस सिछ्या
(मत्ति २४:३२-३५; मर्कुस १३:२८-३१)
29तब येसुले ओकर्सिका आरो एगो उदाहरन दैक कहल्के, “तोर्स्या नेभाराक गाछ आ अरु गाछ्सिका ताक्। 30जब उ गाछ्सब पिप्लाब लग्छो त तोर्सिका थाहा हब्छो कि आब् गर्मिक समै आइल जाइछो कहिक। 31ओनाहिमे जब तोर्स्या हम्र कहल बातसब पुरा हब्त देख्ब त यि जान्ह्य कि पर्मेसोरक राज्ये लगेम आइल छो।
32“हम तोर्सिका साँच्चेक कह स्यो, जखन तलिक हम्र कहल यि सभे बातसब पुरा नाइ हेतो, तखन तलिक यि पुस्ताक मानुकसब नाइ ओराइतो। 33अकास आ पिर्थिबि ओराइक जेतो तर हम्र कहल बातसब नाइ ओराइतो।
होसियार रह
34“तर तोर्स्या होसियार रह, मौज-मज्जाक पछा नाइ लग आ मतबालि नाइ बन् अनि आप्न जिबनक बारेम पनि चिन्ता-फिक्रि नाइ कर्। ओना कर्ब त तोर्सिक जोस ओराइतो अनि फुदिसब फनाम पर्ल जक्या बिनासक दिन् तोर्सिक उप्रिम अन्चक्एम एतो। 35किरकि सन्सारम रहलाहार सभेक उप्रिम उ दिन् एनाहिमे एतो। 36ओहेस तोर्स्या सब्दिन होसियार रह। अनि डर लग्लाहार सङ्कटस बच लागि आ मानुकक बेटाक अगाम ठेर्याब सक्लाहार बन सकुँ कहिक जखन पनि पर्थना कर्ति रह।”
37येसुले दिन-दिन मन्दिरम सिछ्या दिएक तर राति चाहिं सहरस बाहार जैतुन पाहारम जाइक रात बिताबेक।#लुका १९:४७ 38अनि बिहान हब्ति बितिन सभे मानुकसब येसुक सिछ्या सुन लागि मन्दिरम आबेक।
Đang chọn:
लुका 21: DANU
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 (Active), Mother Tongue Translators Society and Wycliffe Bible Translators, Inc. All rights reserved.
