যোহন 21
21
প্রভু যীশু সাত্জন শিচ্চ্যরে দেগা দিলো
1ইয়েন পরেদি তিবিরিয়া সাগর পারত্ শিচ্চ্যগুনো ইধু আরঅ যীশু দেগা দিলো। ঘটনাগান্ এবাবোত্যেগুরি ঘোট্যে:
2শিমোন-পিতর, থোমা যিবেরে দিদুমঃ কন্, গালীল রেজ্যর্ কান্না আদামর্ নথনেল, সিবদিয়র্ পুয়োগুন্ আর যীশুর্ অন্য দ্বিজন্ শিচ্চ্য একসমারে এলাক্। 3শিমোন-পিতর তারারে কলঅ, “মুই মাছ ধুুরিবাত্তে যাঙর্।”
তারা কলাক্, “আমিয়ো তঅ সমারে যেবং।” সেক্কে তারা নিগিলিনে নগানত্ উদিলাক্, মাত্তর্ সে রেদোত্ কিচ্চু ধুরি ন-পারিলাক্।
4বেন্ন্যে পহর্ ওই এজের্ এমন্ সময়োত্ যীশু সাগর পারত্ এইনে থিয়্যেল। মাত্তর্ শিচ্চ্যগুনে চিনি ন-পারিলাক্, তে যে যীশু। 5তে শিচ্চ্যগুনোরে কলঅ, “মঅ সমাজ্যেগুন্, কনঅ কিজু ন-পঅ?”
তারা কলাক্, “নাঢে, ন-পেই।”
6যীশু তারারে কলঅ, “নগানর্ ডেনেদি জালান্ ফেলঅ, পেবা।” সেক্কে তারা জালান্ ফেলেলাক্, আর এদ্ক্ বেশ্ মাছ ধরা পড়িলাক্ যে, তারা সিয়েন্ টানিনে তুলি ন-পারিলাক্।
7যীশু যে শিচ্চ্যবোরে কোচ্পেদঅ সেই শিচ্চ্যবো পিতররে কলঅ, “তে প্রভু যীশু।” সেক্কে শিমোন-পিতর কিয়্যেত্ কনঅ কাবড়্ ন-এলঅ। সেনত্তে যেক্কে তে শুনিলো, “তে প্রভু যীশু,” সেক্কে কিয়্যেত্ কাবড়ান্ বেড়েইনে সাগরত্ ঝাম্ দিলো। 8তারা কুলো চরত্তুন্ বেশ্ দুরোত্ ন-এলাক, প্রায় দ্বিশত্ আঢ্ দুরোত্ এলাক্। ইয়েনত্তে অন্য শিচ্চ্যগুনে মাছ্সোই ভরা জালান্ টান্দে টান্দে নগানত্ গুরিনে কুলো চরত্ এলাক্।
9কুলো-চরত্ লামি এইনে তারা গাজ আঙারার্ আগুন আর আগুনো উগুরে মাছ দেগিলাক্; সিয়েনত্ রুটিয়ো এলঅ। 10সেক্কে যীশু তারারে কলঅ, “ইক্কিনে যে মাছ্চুন্ ধুরিলা সিগুনোত্তুন্ কয়েক্কো আনঅ।”
11শিমোন-পিতরে নগানত্ যেইনে জালান্ কুলো-চরত্ টানি আনিলাক্। একশ তিপ্পান্নবো দাঙর্ মাছে জালান্ ভরা এলঅ। যুনিয়ো এদক্ মাছ এলাক্ তো জালান্ ন-ফাদিলো। 12যীশু তারারে কলঅ, “এজঅ, খগি।” শিচ্চ্যগুনোত্তুন্ কারর্ সাহচ্ ন-অলঅ যে, পুযোর্ গুরিবার্, “তুই কন্না?” কিয়া তারা কোই পারিদাক্, তে প্রভু। 13পরেদি যীশু এইনে রুটি লোইনে তারারে দিলো, আর সেবাবোত্যেগুরি মাছ্অ দিলো।
14মরাত্তুন্ জেদা ওই উদোনার্ পরেদি যীশু এই তিন বার্ শিচ্চ্যগুনোরে দেগা দিলো।
পিতর উগুরে প্রভু যীশুর উগুম্
15তারার্ হানা থুম্ অলে পরেদি যীশু শিমোন-পিতররে কলঅ, “যোহনর্ পুয়ো শিমোন, ইগুনোত্তুন্-অ কি তুই মরে বেশ্ কোচ্পাচ্?”
শিমোন-পিতরে তারে কলঅ, “অয়, প্রভু, তুই হবর্ পাজ্ তুই মর্ কদক্ পরাণর্।”
যীশু তারে কলঅ, “মর্ চিগোন-ভেড়া ছগুনোরে চরা।”
16যীশু দ্বিবার্ তারে কলঅ, “যোহনর্ পুয়ো শিমোন, তুই কি মরে কোচ্পাচ্?”
শিমোন-পিতরে তারে কলঅ, “অয়, প্রভু, তুই দঅ হবর্ পাজ্ তুই মর্ কদক্ পরাণর্।”
যীশু তারে কলঅ, “মঅ ভেড়াগুনোরে গমেডালে রিনি চাহ্।”
17পরেদি তে তিনবার্ শিমোন-পিতররে কলঅ, “যোহনর্ পুয়ো শিমোন, ঘেচ্চ্যেক্গুরি কি মুই তর্ পরাণর্?”
পিতরে এবার্ মনত্ দুঘ্ পেলঅ, কিয়া যীশু এই তিনবার্ তারে পুযোর্ গুরিলো, “মুই কি ঘেচ্চ্যেক্গুরি তর্ পরাণর্?” ইয়েনত্যে পিতর যীশুরে কলঅ, “প্রভু, তুই বেক্কানি হবর্ পাজ্; তুই দঅ হবর্ পাজ্, তুই মর্ ভারী পরাণর্।”
যীশু তারে কলঅ, “মঅ ভেড়াগুনোরে চরা। 18মুই তরে ঘেচ্চ্যেক্গুরি কঙর্, তুই যেক্কে গাবুর্ এলে সেক্কে তুই নিজে তর্ ফার্বো বানিদ্যে আর যিধু মনে কয় সিধু যেদে। মাত্তর্ যেক্কে তুই বুড়ো অবে সেক্কে তুই তঅ আঢ্তান্ বাবেই দিবে আর অন্য একজনে তরে বানিবো আর তুই যিধু যেবার্ ন-চাজ্ সিধু নেযেব।” 19গোজেনর্ মহিমাগান্ ফগদাং গুরিবাত্তে পিতরে কেধোক্ক্যেন্ গুরি মুরিবো সিয়েন্ বুঝেবাত্তে যেইনে যীশু এ কধাগান্ কলঅ।
এ কধাগান্ কনার্ পরেদি যীশু পিতররে কলঅ, “মঅ লগে আয়।”
20পিতরে পিজেদি ফিরিনে রিনি চেলঅ, যীশু যিবেরে কোচ্পেদ সেই শিচ্চ্যবো পিজে পিজে এজের্। ইবে সেই শিচ্চ্য, যিবে হেবার্ অক্তত্ যীশু ইন্দি এলান্ দিইনে কোইয়্যে, “প্রভু, তরে যে শত্রুগুনো আঢত্ ধুরি দিবো, তে কন্না?” 21পিতরে তারে দেগিনে যীশুরে কলঅ, “প্রভু, ইবের্ কি অবঅ?”
22যীশু পিতররে কলঅ, “মুই যুনি চাং ইতে মর্ ফিরি ন-এজানা সং থায়, সিয়েনত্ তর্ কি? তুই মঅ লগে আয়।”
23ইয়েনত্যে ভেইউনো ভিদিরে এ কধাগান্ ছিদি গেলঅ যে, সেই শিচ্চ্যবো ন-মুরিবো। মাত্তর্ যীশু পিতররে ন-কয় সেই শিচ্চ্যবো ন-মুরিবো। তে বরং কোইয়্যেদে, “মুই যুনি চাং তে মর্ ফিরি ন-এজানা সং থায়, সালে তর্ কি?”
যোহনর্ সাক্ষ্য
24সেই শিচ্চ্যবো ইয়েনি বেক্কানি সাক্ষি দের্ আর ইয়েনি বেক্কানি লেক্ক্যে। আমি হবর্ পেই তা সাক্ষিগান্ সত্য।
25যীশু আরঅ ভালোক্কানি কাম্ গোজ্যে। যুনি সিয়েনি এক্কান্ এক্কান্ গুরি লেগা অদঅ সালে এদক্ বোই অদঅ যে, মর্ মনে অয় সিবে এ পিত্থিমীত্ ন-আঢিদো।
Đang chọn:
যোহন 21: CBT
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Copyright © 2021 Bangladesh Bible Society
