যোহন 20
20
প্রভু যীশু মরণত্তুন্ জেদা অলঅ
(মথি ২৮:১-৮; মার্ক ১৬:১-৮; লূক ২৪:১-১২)
1সাপ্তার্ পত্তম্ দিনোর্ বেন্ন্যে মাদান্, আন্ধার্ থাগদে মগ্দলীনী মরিয়মে সেই কবর ইধু গেলঅ। তে দেগিলোদে, গোরান মুয়োনত্তুন্ পাত্তর্বো সরা ওইয়্যে। 2সেনত্তে তে শিমোন-পিতর আর যে শিচ্চ্যবোরে যীশু কোচ্পেদঅ সেই শিচ্চ্যবো ইধু ধাবা যেইনে কলঅ, “মানুচ্চুনে প্রভুরে গোরত্তুন্ নেযেয়োন। তারে কুধু থোইয়োন্ আমি সিয়েন হবর্ ন-পেই।”
3পিতরে আর সেই অন্য শিচ্চ্যবো সেক্কে নিগিলিনে কবর ইন্দি যাহ্ ধল্লাক্। 4দ্বিজনে একসমারে ধাবা দেদন্। অন্য শিচ্চ্যবো পিতর আগে আগে আরঅ সবরে ধাবা দিইনে পত্তমে গোর ইধু এলঅ, মাত্তর্ তে গোর ভিদিরে ন-গেলঅ। 5তে মাঢা নিগিরিনে চেলঅ, যীশুর কিয়্যেনত্ যে কাবড়ানি বেড়েয়্যে এলঅ সিয়েনি পড়ি আঘে। 6শিমোন-পিতরেয়ো তা পিজে পিজে এইনে কবর ভিদিরে সোমেল আর কাবড়ানি পোজ্যে আগেদে দেগিলো। 7তে আরঅ দেগিলো, তা মাঢাবোত্ যে রুমোলান্ বেড়েয়্যে এলঅ সিয়েন্ অন্য কাবড় সমারে নেই, মাত্তর্ যুদো গুরিনে এক জাগাত্ গুজেই রাগা ওইয়্যে। 8যে শিচ্চ্যবো পত্তমে কবরত্ যেয়্যে তেয়ো সেক্কে ভিদিরে সোমেল আর দেগিনে বিশ্বেজ্ গুরিলো। 9মরণত্তুন্ যীশুর জেদা ওই উদিবার্ যে দরকার্ আঘে, পবিত্র বোইবোর্ সে কধাগান্ তারা আগেদি বুঝি ন-পারন্।
প্রভু যীশু মরিয়মরে দেগা দিলো
10ইয়েন পরেদি শিচ্চ্যগুনে ঘরত্ ফিরি গেলাক্, 11মাত্তর্ মরিয়মে কবর বারেদি থিয়্যেইনে কানা ধুরিলো। তে কানদে কানদে নিগিরিনে কবর ভিদিরে রিনি চেলঅ, 12যীশুর্ কিয়্যেগান্ যিয়েনত্ পোজ্যে এলঅ সিয়েনত্ ধুব্ কাবড় উজ্যে দ্বিজন্ স্বর্গদূত্ বৈই আঘন্-এক্কো মাধাবো ইন্দি আর এক্কো ঠেঙদি। 13তারা মরিয়মরে কলাক্, “কিত্ত্যেই কানর্?”
মরিয়মে তারারে কলঅ, “মানুচ্চুনে মঅ প্রভুরে নেযেয়োন আর তারে কুধু থোইয়োন্ কোই ন-পারং।”
14এ কধাগান্ কোইনে মরিয়মে পিজেদি ফিরিনে রিনি চেলঅ যীশু থিয়্যেই আঘে, মাত্তর্ তে যে যীশু সিয়েন্ বুঝি ন-পারিলো।
15যীশু তারে কলঅ, “কিত্ত্যেই কানর্? কারে তগর্?”
যীশুরে বাগান চুগিদার্ মনে গুরিনে মরিয়মে কলঅ, “চাহ্, তুই যুনি তারে নেযেই থাচ্ সালে কঅ কুধু থোইয়োচ্। মুই তারে নেযেম্।”
16যীশু তারে কলঅ, “মরিয়ম।”
সেক্কে মরিয়মে ফিরি থিয়্যেইনে অরামীয় ভাষাদি যীশুরে কলঅ, “রব্বুনি।” রব্বুনি অত্তাৎ মাষ্টরবাবু।
17যীশু মরিয়মরে কলঅ, “মরে ধুরি ন-রাগেচ্, কিয়া মুই এজঅ উগুরে বাবা ইধু ন-যাং। তুই বরং ভেইয়ুনো ইধু যেইনে কঅ, যিবে মর্ আর তমার্ বাপ্, যিবে মর্ আর তমার্ গোজেন, মুই উগুরে তা ইধু যাঙর্।”
18সেক্কে মগ্দলীনী মরিয়মে শিচ্চ্যগুনো ইধু যেইনে হবর্ দিলো, তে প্রভুরে দেক্ক্যে আর প্রভুই তারে এ বেক্ কধানি কোইয়্যে।
প্রভু যীশু শিচ্চ্যগুনোরে দেগা দিলো
(মথি ২৮:১৬-২০; মার্ক ১৬:১৪-১৮; লূক ২৪:৩৬-৪৯)
19সেই একই দিনোত্, সাপ্তার্ পত্তম্ দিনোর্ সাজোন্ন্যে অক্তত্ শিচ্চ্যগুনে যিহূদী নেতাগুনোর্ দরে ঘরর্ বেক্ দুয়োরানি নাঢিনে এক্কান্ জাগাত্ এগত্তর্ ওইয়োন্। সেক্কে যীশু এইনে তারা সংমধ্যে থিয়্যেইনে কলঅ, “তমার্ শান্তি ওক্।” 20এ কধাগান্ কোইনে তে তার্ দ্বিয়েন্ আঢ্ আর বুগো ধাক্কান্ তা শিচ্চ্যগুনোরে দেগেল। প্রভুরে দেগিনে শিচ্চ্যগুনে অমকদ হুজী অলাক্।
21যেরেদি যীশু আরঅ তারারে কলঅ, “তমার্ শান্তি ওক্। বাবা যেধোক্ক্যেনগুরি মরে পাধেয়্যে মুইয়ো সেধোক্ক্যেনগুরি তমারে পাধাঙর্।” 22এ কধাগান্ কোইনে তে শিচ্চ্যগুনো উগুরে ফুন্ দিইনে কলঅ, “পবিত্র আত্মাগানরে গুজি লঅ। 23তুমি যুনি কার পাপ খেমা গরঅ সালে তা পাপ্পান্ খেমা গরা অবঅ, আর যুনি কার পাপ খেমা ন-গরঅ সালে তা পাপ্পান্ খেমা গরা ন-অবঅ।”
অবিশ্বেজি থোমার বিশ্বেজ্
24যীশু যেক্কে এচ্চ্যে সেক্কে থোমা নাঙে সেই বারজন শিচ্চ্য ভিদিরে এক্কো তারা সমারে ন-এলঅ। এই থোমারে দিদুম কুয়ো অদঅ। 25অন্য শিচ্চ্যগুনে যেরেদি থোমারে কলাক্, “আমি প্রভুরে দেক্ক্যেই।”
থোমা তারারে কলঅ, “মুই তা দ্বি আদত্ যুনি জোলোই মাজ্যে চিহ্নো ন-দেগং, সেই চিহ্নোগানত্ আঙুল্ ন-দুয়োং আর তা বুগোত্ আঢ্-দুয়োং, সেধক্কন্ সং কনঅ বাবদে বিশ্বেজ্ ন-গুরিম্।”
26ইয়েনর্ এক সাপ্তা বাদে শিচ্চ্যগুনে আরঅ ঘরঅ ভিদিরে এগত্তর্ অলাক্, আর থোমায়ো তারা সমারে এলঅ। যুনিয়ো বেক্ দুয়োরানি বান্ন্যে এলঅ তো যীশু এইনে তারা সংমধ্যে থিয়্যেইনে কলঅ, “তমার্ শান্তি ওক্।” 27পরেদি তে থোমারে কলঅ “তঅ আঙুলুন্ ইয়োত্ দিইনে মঅ দ্বিয়েন্ আঢ্ চাহ্ আর তঅ আঢ্তানি বাবেইনে মঅ বুগোত্ রাগা। অবিশ্বেজ্ ন-গুরিচ্ বরং বিশ্বেজ্ গর্।”
28সেক্কে থোমা কলঅ, “ও মঅ গিরোজ্, ও মঅ গোজেন।”
29যীশু তারে কলঅ, “থোমা, তুই কি মরে দেক্ক্যচ্ বিলি বিশ্বেজ্ গোজ্যস্? যিগুনে ন-দেগিনে বিশ্বেজ্ গরন্ তারা বর্ পেইয়্যে।”
30যীশু শিচ্চ্যগুনো মুজুঙোত্ চিহ্নো ইজেবে আরঅ ভালোক্কানি আমক্ অবার্ কাম্ গোজ্যে; সিয়েনি এ বোইবোত্ লেগা ন-অয়। 31মাত্তর্ ইয়েনি বেক্কানি লেগা অলঅ যাতে তুমি বিশ্বেজ্ গরঅ, যীশুই মশীহ, গোজেনর্ পুয়ো, আর বিশ্বেজ্ গুরিনে যেন তা মাধ্যমে জিংকানি পঅ।
Đang chọn:
যোহন 20: CBT
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Copyright © 2021 Bangladesh Bible Society
