मर्कूस 7

शुद्ध ओ अशुद्ध

मत्ती १५:१-२०

1एक दिनिक बात हो, यरूशलेम सहरसे फरिसी ओ शास्‍त्रीहुँक्र आक येशूक आञ्‍जरपाञ्‍जर जम्‍मा हुइल। 2हुँक्र येशूक कौनो-कौनो चेलावँन हाँठ च्‍वाखा बिना करैल, अर्थात् हाँठ बिना धुइल खाइट्‍ देख्‍ल। 3सब यहूदी, खासकैक फरिसी, हुँकन्‍हक पुर्खासे चलल् रीत अनुसार हाँठ बिना धुइल नैखैट। 4अस्‍तक बजारसे अइलसे रीत अनुसार बिना लहैल नैखैट। अत्र केल नैहोक हुँक्र असिन और धेर परमपरा मन्‍ठ, जस्‍त: लोट्‍या, गग्रा, ओ और भाँराबर्तन फे रीत अनुसार धुइठ।

5उहओर्से फरिसी ओ शास्‍त्रीहुँक्र येशूह पुछ्‌ल, “अप्‍नक चेलावँ बिना हाँठ धुइल खैठ। हुँक्र पुर्खासे चल्‍तीआइल् परम्‍परऽ नैमन्‍ट, काजे?”

6येशू हुँकन जवाफ देल, “परमेश्‍वरक कहल बात धेर आघ यशैया टुह्र कपटीन्‍हक बारेम ठीक लिख्‍रख्‍ल:

‘यी मनै महीह मुहले केल आदर कर्ठ,

तर हुँकन्‍हक मन महीसे धेर दूर बाटन।#यशै २९:१३

7महीह करल हुँकन्‍हक आराधना त बेकार बाटन,

काकरकि हुँक्र त मनैन्‍हक परम्‍परा केल सिखैठ।’

8टुह्र त परमेश्‍वरक आज्ञह छोर्क मनैन्‍हक बनाइल परम्‍परा मन्‍ठो।

9“टुह्र आपन परम्‍परा कायम करक लाग बरा चलाकी कैक परमेश्‍वरक आज्ञह नैमन्‍टो। 10मोशा कैरख्‍ल, ‘आपन डाई-बाबक आदर करो। आपन डाई-बाबक विरोधम दुष्‍ट बात बट्‌वैना मनैया मुवापाई।’#प्रस २०:१२; २१:१७; लेवी २०:९; व्‍य ५:१६ 11तर मनै आपन डाई-बाबह असिक कहल टुह्र ठीक मन्‍ठो, ‘मै टुँहन सहायता कर नैसेक्‍लकम दुःख जिन मनहो, काकरकि मै टुँहन देहपर्ना चिज परमेश्‍वरह देना प्रतिज्ञा कैसेक्‍नु’ (अर्थात् कुर्बान कैसेक्‍नु)। 12टुह्र आपन रीतिथितिओर लाग्‍क परमेश्‍वरक आज्ञह बेकम्‍मा बनैठो। 13असिक टुह्र आपन परम्‍परा मानक लाग परमेश्‍वरक आज्ञह रद्द कर्ठो, ओ औरजहन फे सिखैठो। यी त एक्‍कठो उदाहरण हो। और असिन धेर काम कर्ठो।”

14येशू फेदोस्र भीडक मनैन आपनठे बलाक कल, “सबजन म्‍वार बात सुनो ओ बुझो। 15असिन कुछु खैना चिज नैहो, जौन बाहरसे भित्तर पैँठ्‌क मनैन अशुद्ध बनैठा, तर मनैन्‍हक मनमसे बाहर निक्रना चिजले हुँकन अशुद्ध बनैठा। 16[ज्‍याकर सुन्‍ना कान बा, यी बात उह बुझी।]”

17येशू ओ चेलावँ मनैन छोर्क घरभित्तर पैँठ्‌ल त, हुँक्र उहाँक कहल बातक अर्थ पुछ्‌ल। 18तब येशू हुँकन कल, “का टुह्र आम्‍हीन अबुझ बाटो? खैना चिजले मनैन अशुद्ध बनाए नैस्‍याकट्‍ कैक नैजन्‍टो? 19काकरकि उ मनैन्‍हक मनम नैजाक प्‍याटिम जैठा ओ बाहर निकरजैठा।” (असिक येशू खैना चिज अशुद्ध नैरहट्‍ कैक बट्‌वादेल।)

20तब उहाँ कल, “मनमसे निक्रना चिज मनैन अशुद्ध बनैठा, 21काकरकि यी सब चिज मनमसे निक्रठा: दुष्‍ट विचार कर्ना, बेश्‍या काम कर्ना, चोर्ना, ज्‍यान मर्ना, 22व्‍यभिचार कर्ना, ल्‍वाभ कर्ना, खराबी कर्ना, छलकपट कर्ना, छट्‌टैना-मट्‌टैना, बिह्र मुना, बदनाम कर्ना, ओ घमण्‍डी ओ मूर्ख हुइना। 23यी सक्‍कु खराब चिज मनैयक मनमसे अइठा ओ ओहीह अशुद्ध बनैठा।”

एकठो जन्‍नीमनैयक विश्‍वास

मत्ती १५:२१-२८

24तबदोस्र येशू उहाँसे टुरोस क्षेत्रम#७:२४ कौनो-कौनो ग्रीक भाषक स्रोतम टुरोस ओ सीदोन लिखल बा। गैल। उहाँ पुग्‍टीकि, येशू एकठो घरम पैँठगैल। उ ठाउँम गैलक कुई फे थाहाँ नैपाए कना येशूक चाहना रलहन, तर फे मनै थाहाँ पाडर्ल। 25भूत्‍वा लागल एकठो लौँर्‍यक डाई येशूक बारेम सुन्‍टीकि, उहाँकठे अइली। उहाँक पाउप्‍पर्टी उ जन्‍नीमनैया 26“म्‍वार छाईकमसे भूत्‍वा निकारदी” कैक बिन्‍ती कर्ली। हुँकहार जन्‍म सिरिया क्षेत्रक फोनिके कना ठाउँम हुइलहन।

27येशू उ जन्‍नीमनैयह जाँच कर्टी कल, “पैल्‍ह मै आपन लर्कापर्कन खवाइपर्ठा, काकरकि लर्कन्‍हक रोटी कुक्‍कुरीन्‍हक आघ फँक्‍ना ठीक नैहो।”

28उ जन्‍नीमनैया कली, “ठीक हो, प्रभु, तर कुक्‍कुर फे त लर्कापर्कन्‍हक खसाइल टुक्रिटुक्रा खैठ।”

29येशू उ जन्‍नीमनैयह कल, “टुँ म्‍वारम विश्‍वास करल बात बट्‌वैलो। उहओर्से मै टुँहार छाईह चोखादेरख्‍नु। आब मजासे घर जाओ।”

30तब उ घर गैली त, आपन छाईह बिस्‍तारम मजासे सुतल् भेँटैली, ओ हुँकाहारमसे भूत्‍वा निकर्क गैरलहा।

बहिर ओ लाट मनैया चोखैलक

31येशू टुरोससे सीदोन हुइटी दश सहरक क्षेत्रओर्से गालील समुद्रम गैल। 32मनै एकठो लाट मनैयह येशूकठे अन्‍ल ओ मजा बनामङ्‌ग्‍ल।

33येशू ओहीह मनैन्‍हक भीडसे टनिक दूर लैजाक आपन अङ्‌ग्री वाकर कानक फ्‍वाङघिम लगैल। तबदोस्र अङ्‌ग्रीम थुक्‍क वाकर जीभ फे छुल।#७:३३ येशू ऊ लाट मनैयह “चोखैना काम हुइलागल” कना संकेत देहक लाग वाकर कान ओ जीभ छुवलहुइहीँ। यहूदी संस्‍कृतिम आपन हाँठम थुक्‍क आनकम लगैलसे, अपमान करल अर्थ नैलागऽ। 34येशू स्‍वर्गओर हेर्ल ओ स्‍वागकमार नम्‍मा साँस लेटी कल, “इफ्‍फाता।” याकर अर्थ “खुल्‍जा” हो। 35तबहेँ उ मनैया सुन्‍ना ओ ब्‍वाल सेक्‍ना होगैल्।

36येशू “यी बात किहुह जिन कहहो” कैक ओठे रहल मनैन कल। तर जत्रा “यी बात जिन फैलैहो” कल, हुँक्र उ बात झन् फैलैटीगैल। 37काकरकि मनै यी देख्‍क अचम्‍म मन्‍लरलह। ओ हुँक्र कल, “येशू सब काम मजऽ कर्ठ। उहाँ बहिर मनैन सुन्‍ना ओ लाट मनैन बोल्‍ना बनैठ।”

Đang chọn:

मर्कूस 7: thl

Tô màu

Sao chép

So sánh

Chia sẻ