मर्कूस 6
6
नासरतम येशूह इन्कार
मत्ती १३:५३-५८
1येशू उ ठाउँ छोर्क चेलन्हकसँग अप्न बहर्लक सहर नासरतम घुम्क गैल। 2बिसैना दिन येशू सभाघर जाक मनैन सिखाइलग्ल। उहाँक बात सुनुइया बहुत मनै अचम्म मन्टी कल, “असिन बुद्धि ओ अचम्मक काम कर्ना शक्ति यी मनैया कहाँसे पाइलहुई? 3यी उह कट्ठोक काम करुइया त हो। मरियमक छावा त हो। यी याकूब, योसेफ, यहूदा, ओ सिमोनक दादु त हो। याकर बहिनेन फे हमारसँग त रठ।” असिक कह्टी हुँक्र उहाँकपर बिह्रमुल ओ उहाँह इन्कार कर्ल।
4तब येशू हुँकन कल, “आपन गाउँघर, नातपात ओ परिवारम बाहेक अगमवक्तन्हक सक्कुओर आदर हुइठा।”#यूह ४:४४ 5हुँक्र विश्वास नैकर्लक कारण येशू कुछ रोग्यन छुक चोखैना बाहेक और अचम्मक काम कर नैसेक्ल। 6हुँकन्हक विश्वास नैदेख्लक कारण उहाँ अचम्म मन्ल।
बाह्र जन चेलन पठैलक
मत्ती १०:५-१५; लूका ९:१-६
तब येशू उहाँसे चेलन्हकसँग निकर्क गाउँ-गाउँ घुम्टी सिखाइलग्ल। 7उहाँ आपन बाह्र जन चेलन बलैल ओ हुँकन भूतन निक्रैना अधिकार देक दुइ-दुइ जहन प्रचार कर पठैल। 8उहाँ हुँकन असिन आज्ञा देल, “यात्रम टेक्ना लट्ठी बाहेक और कुछु जिन लैजैहो। और खैना चिज, झ्वाला, फाँर कस्ना लुगम पैँसा जिन बोकहो। 9चप्पलभर घलहो, फेर्ना लुगालत्ता समेत जिन बोकहो।#लूक १०:४-११ 10जब कौनो गाउँम पैँठ्बो, उ गाउँसे नैनिक्रट्सम, एक्कठो घरम बास बैठ्लरहहो। 11यदि कौनो ठाउँम टुन्हक स्वागत नैहुई या मनै टुन्हक बात नैसुनहीँ कलसे, उहाँसे जाइबेर परमेश्वरक न्यायक चिन्ह देखाइक लाग आपन ग्वारक धूर झराअइहो।”#प्रे १३:५१
12तब चेलावँ निकर्क गैल ओ मनैन्हकठे असिक प्रचार कर्ल, “आपन-आपन पापी मन परिवर्तन कैक परमेश्वरकठे घुमो।” 13हुँक्र धेर भूत निक्रैल, ओ धेर रोग्यन फे त्याल लगाक चोखैल।#याक ५:१४
बप्तिस्मा देहुइया यूहन्नक मृत्यु
मत्ती १४:१-१२; लूका ९:७-९
14राजा हेरोद एन्टिपास येशूक बारेम सुन्ल, काकरकि मनै जहोँरतहोँर उहाँक बारेम बट्वाइँट्। कुई कहँट्, “बप्तिस्मा देहुइया यूहन्ना मुवलमसे जिरल, उहओर्से त ऊ परमेश्वरक शक्तिले अचम्म-अचम्मक काम करसेक्ठ।” 15कुई “यी त एलिया हुइट” कहँट्। कुईजुन “यी त अघट्टेक अगमवक्तामध्येक एक जन हुइट” कहँट्। 16राजा हेरोद एन्टिपास यी बात सुन्ल त कल, “येशू कलक वास्तवम यूहन्नऽ हुइट, ज्याकर मुन्टा मै काट लगैनहुँ। ऊ मुवलमसे पक्क फे जिगैल।”#मत्ती १६:१४; मर्क ८:२८; लूक ९:१९
17हेरोद आपन भैया फिलिपक गोसिन्या हेरोदियासह लेरख्लह। ऊ यूहन्नह पकर्क झेलखानम डाररख्लह। 18काकरकि यूहन्ना हुँकहीन कैरख्लह, “अप्न आपन भैयक गोसिन्यह लेना ठीक नैहो।” 19हेरोदियास यूहन्नकम रिस ढर्लरलही ओ हुँकहीन मुवाइ चाहँट्, तर मुवाइ नैसेक्लरलही।#लूक ३:१९-२० 20हेरोद यूहन्नह “धर्मी ओ पवित्र मनै हुइट” कैक धेर आदर करँट्। उहओर्से हुँकहीन झेलखानम सुरक्षित ढर्लरलह। यूहन्नक बात सुन्क हेरोदह मनम छट्पटी लागन्, तर फे हुँकहार बात ध्यान देक सुनँट्।
21आखिरम हेरोदियासक यूहन्नसे बद्ला लेना दिन अइलन। हेरोद आपन जन्म दिनिक उपलक्ष्यम एकठो खुशीयालीक आयोजना कैरख्लह। उ दिन हाकिमहुँकन्, राष्ट्र सेवक प्रमुखहुँकन्, ओ गालील क्षेत्रक और गन्यमान्य मनैन निउटा देरख्लह। 22उ खुशीयालीम हेरोदियासक छाई आक नाचल। वाकर नाच देख्क राजा हेरोद ओ हुँकहार सक्कु पौन्हाओँ खुशी हुइल।
तब हेरोद ओहीह कल, “टुँहीन ज्या मङ्ग्नास लागटा, माङ्गो, मै देबु।” 23हेरोद प्रतिज्ञा कर्ल, “टुँ आधा राज्य मङ्ग्बो कलसे फे मै देनेबाटुँ।”
24तब हेरोदियासक छाई आपन डाईकठे जाक पुछल्, “मै का माङ्गु?”
वाकर डाई कली, “बप्तिस्मा देहुइया यूहन्नक मुन्टा माङ्ग।”
25हेरोदियासक छाई हड्बडैटी राजा हेरोदकठे जाक कहल, “महीह बप्तिस्मा देहुइया यूहन्नक मुन्टा टठ्यम दिई।”
26यी माग सुन्क राजा हेरोद बरा दुःखी हुइल, तर पौनन्हक आघ हेरोदियासक छाईह देहल वचन फाँक नैसेक्ल। 27उहओर्से राजा “यूहन्नक मुन्टा काट्क आनो” कैक आपन सिपैहेह हुकुम देल। तबहेँ उ सिपैह्या झेलखानम जाक यूहन्नक मुन्टा काटल, 28ओ टठ्यम ढैक हेरोदियासक छाईह देहल। मुन्टा लैजाक ऊ आपन डाईह देहल। 29यूहन्नक चेलावँ यी बात सुन्ल त अइल ओ हुँक्र उहाँक मुवल शरीर लैजाक गर्यम ढर्ल।
पाँच हजार मनैन खवैलक
मत्ती १४:१३-२१; लूका ९:१०-१७; यूहन्ना ६:१-१४
30प्रेरितक रूपम पठागैल् चेलावँ येशूकठे घुम्ल। हुँक्र जौन-जौन काम कैरख्लह ओ सिखारख्लह, उ सक्कु बात येशूकठे बटोइल। 31ओठे धेर मनै अइना-जैना हुइलकओर्से, हुँकन खैनापिना फे फुर्सद नैरलहन। उहओर्से येशू चेलन कल, “म्वारसँग कहोँरे सुनसान ठाउँम बिसाए चोलो।”
32तब उहाँहुँक्र लाऊम चिहुर्क सुनसान ठाउँम जाइलग्ल। 33तर धेर मनै उहाँहुँकन जाइट् देख्क चिह्न्डर्ल। उहाँहुँकन्हक जैना ठाउँ थाहाँ पाक बहुत गाउँक मनै दगुर्टी गैल ओ उहाँ हुँकनसे आघहेँ उ ठाउँम पुग्गैल। 34येशू लाऊमसे उत्रल त, बहुत मनै जम्मा होरलह। हुँकन देख्क उहाँह स्वाग लग्लन, काकरकि हुँक्र बिना चह्रुइयक भेँरीअस रलह। उहओर्से येशू हुँकन परमेश्वरक बारेम धेर बात सिखाइलग्ल।#गन्ती २७:१७; १ राज २२:१७; २ इति १८:१६; इज ३४:५; मत्ती ९:३६
35जब दिन बुरलागल त, येशूक चेलावँ उहाँकठे जाक कल, “हम्र गाउँसे दूर बाटी, ओ दिन फे बुरलागल। 36मनैन बिदा दी, त हिँक्र गाउँबस्तीओर जैहीँ ओ कुछुकुछु किन्क खैहीँ।”
37तर येशू जवाफ देल, “टुह्रहे हिँकन खैना देओ।”
चेलावँ उहाँह कल, “का हम्रहे दुइ सय चाँदीक पैँसले#६:३७ चाँदीक पैँसले यी पदम ग्रीक भाषम “चाँदीक पैँसक” ठाउँम “दिनारी” लिखल बा। उ ब्यालम मञ्जोरी कर्ना एकठो मनैयक एक दिनिक ज्याला एकठो दिनारी रह। रोटी किन्क आनी ओ हिँकन खाइक लाग दी?”
38येशू हुँकन फेदोस्र कल, “टुन्हकठे कैठो रोटी बा? जाक हेरो।”
तब हेर्क आक हुँक्र कल, “पाँचठो रोटी ओ दुइठो मच्छी केल बा।”
39तब येशू “मनैन समूह-समूहम दुबाहा ठाउँम बैठाओ” कैक चेलन कल। 40असिक मनै सय-सय ओ पचास-पचास जन्हक समूह बना-बना बैठ्ल।
41तब येशू पाँचठो रोटी ओ दुइठो मच्छी लेक स्वर्गओर हेर्टी परमेश्वरह धन्यवाद देल। तबदोस्र उहाँ रोटी खन्टा-खन्टा चेलन देल, चेलाहुँक्र मनैन देल। ओसहेँक उहाँ दुइठो मच्छी फे सबजहन बाँटदेल। 42हुँक्र सबजन अघाअघा खैल, 43ओ उब्रल रोटी ओ मच्छीक टुक्रिटुक्रा उठैल त बाह्र छिट्वा हुइल्। 44महिलाहुँक्र ओ लर्कापर्का छोर्क, रोटी खउइया पुरुषहुँक्र केल पाँच हजार रलह।
येशू पानीक उप्रउप्र नेङ्ग्लक
मत्ती १४:२२-३३; यूहन्ना ६:१५-२१
45एकघरी पाछ यी काम कैक सेक्ल त येशू आपन चेलन “लाऊम चिहुर्क महीसे आघ बेथसेदा जाजैहो” कैक अह्रैल। अप्नजुन मनैन विदावारी कैक पठैल। 46हुँकन पठापुठुक येशू परमेश्वरसे प्रार्थना करक लाग पर्वत्वम गैल।
47चेलावँ रात्क समुद्रक बीचम लाऊ चलाइटलह, येशूजुन पर्वत्वम अकल्हे रलह। 48येशू आपन चेलावँन लाऊ चलाइबेर आपत् परल देख्ल, काकरकि हुरी उल्टाओर्से चलटह। रातिक तीन बजेओर येशू पानीक उप्रउप्र नेङ्ग्टी आपन चेलन्हकओर गैल ओ हुँकन्हक पञ्ज्र-पञ्ज्र जाइ खोज्ल। 49हुँक्र उहाँह पानीक उप्रउप्र न्याङ्गट् देख्ल। हुँक्र “यी त भूत्वा हो!” कैक सोँच्ल ओ चिल्लैल, 50काकरकि उहाँह देख्क हुँक्र जातसे डरारलह।
तर झट्टहेँ येशू हुँकन कल, “साँसा जिन छोरो, मै हुइटुँ! जिन डराओ!” 51दोस्र येशू हुँकन्हक लाऊम चिहुर्ल, त हुरी ठम्ह्गैल्। तब हुँक्र बरा अचम्म मन्ल, 52काकरकि परमेश्वरक शक्तिले रोटी बह्राइल अचम्मक बात हुँक्र आम्ही फे बुझ्ल नैरलह काकरकि हुँकन्हक मन कठोर होरलहन।
धेर रोग्याबेरम्हेन चोखैलक
मत्ती १४:३४-३६
53येशू ओ चेलावँ गनेसरेतक क्षेत्रम पुग्ल ओ लाऊ ढिक्वा लगैल। 54उहाँहुँक्र लाऊमसे उत्रटीकि, मनै येशूह चिह्न्डर्ल। 55तब हुँक्र दगुर्टी जाक उ ठाउँक सक्कुओर येशू अइलक खबर फैलैल। मनै येशूकठे रोग्याबेरम्हेन बिस्तारासैँट बोक-बोक आनलग्ल। 56येशू गाउँबस्ती, सहरबजार, जहाँ-जहाँ जाइँट्, उहँ-उहँ मनै रोग्याबेरम्हेन आनँट्। उ बेरम्हेन उहाँक लुगक टुप्प केल हुइलसे फे छुव पाइ कैक येशूसे बिन्ती करँट्। ओ जत्रा जन छुवँट्, सबजन चोखाजाइँट्।
Đang chọn:
मर्कूस 6: thl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2020, Wycliffe Bible Translators, Inc. All rights reserved.
