Ʋrɔm 6

Nyɩ kpi na bɛ cãà pʋɔ a yel-bier pʋɔ ɩ, ɛ́ vʋʋrɛ a Kɩrɩta ƴãw

1A na ɩ à ŋá a, tɩ na yel'a kɛ́ bo? Kɛ́ tɩ cãà be a yel-bier pʋɔ a Naaŋmɩn maalʋ tʋ̃ɔ́ ʋr bɩɩ? 2Lɛ bɛ n'a towtow ɛ! Tɩ kpi na, bɛ cãà pʋɔ yel-bier pʋɔ ɩ: ŋmɩŋmɩn n'a tɩ na tʋ̃ɔ́ cãà be a yel-bier pʋɔ? 3Bɩɩ nyɩ bɛ bãw k'aa tɩɩm za na de a suob kɛ́ tɩ lãw nɩ a Yeezu Kɩrɩta a, tɩ de nɩ a suob lãw nɩ ʋ kpi ʋ? 4A na ɩ à ŋá a, a suob tɩ na de a zũú, tɩ lãw nɩ nɩ a Kɩrɩta kpi, bɛ ũù tɩ lãwnɩ ʋ, kɛ́ mɛ̃ a lɛ a Kɩrɩta na lɛb yi a kũuni pʋɔ nɩ a ʋ Sãà yúor-vɩɛlʋ-danʋ fãw a, a tɩɩm mɩ̀, tɩ vʋʋrɛ nɩ nyɔ-vʋʋr-paala.

5Bʋ̃ʋ n'ʋ vɛ̃, tɩmɛ wa lãw nɩ ʋ kpi kũu na ŋmɛ̃ taa nɩ a ʋ dem a, tɩ mɩ̀ na lãw nɩ ʋ na kũu-pʋɔ-lɛb-yibu pʋɔ na ŋmɛ̃ taa nɩ a ʋ dem a. 6Tɩ bãwnɩ a yel ŋa vla: a nɩsaal ʋl tɩ na tɩ ɩ a koro za a, bɛ kpa ʋ nɩ a da-gara zu lãwnɩ a Kɩrɩta, k'aa yel-bier nɩr ʋl tɩ na ɩ a, ta cãà ɩ, ɛ́ tɩ mɩ̀ ta cãà ɩ a yel-bier gbãgbaar ɛ. 7Bʋ̃ʋ n'ʋ vɛ̃, sob nɛ na kpi a, ʋ bɛ cãà dɩ a yel-bier san a Naaŋmɩn wulu zie ɩ. 8Ɛ́ tɩ na lãw nɩ a Kɩrɩta kpi a, tɩ bãwnɩ a na kɛ́ tɩ mɩ̀ na lãw nɩ ʋ na vʋʋrɛ. 9Bʋ̃ʋ n'ʋ vɛ̃, tɩ bãw na k'aa Kɩrɩta na lɛb yi a kũu pʋɔ a, ʋ bɛ lɛb kpiir ɛ, a kũu bɛ cãà dɩ naalʋ a ʋ zu ɛ. 10Ʋ kpi n gb'a been daadaa k'ʋʋ tʋ̃ɔ́ a yel-bier, ʋʋ na vʋʋrɛ a, Naaŋmɩn ƴãw n'a ʋ vʋʋrɛ. 11A nyɩɩm mɩ̀ a, nyɩ bãw kɛ́ nyɩ kpi na bɛ cãà pʋɔ a yel-bier pʋɔ ɩ, ɛ́ vʋʋrɛ a Naaŋmɩn ƴãw lãwnɩ a Yeezu Kɩrɩta.

12A na ɩ à ŋá a, a yel-bier bɛ tɛr sɔ́r k'ʋʋ cãà dɩrɛ naalʋ a nyɩ ƴã-gan na ɩ bʋ̃-kpiira a zu, ƴãw kɛ̀ nyɩ tuur a ƴã-gan ŋa yel-bɔbrɩ ɛ. 13Nyɩ ta cãà dier a nyɩ ƴã-gã-ɓɛrmɛ a lɩɛbɩ yel-bier tõ-tõ-bome, nyɩ ɩrɛ nɩ a lɛ na bɛ tu sɔ́r a ɩ. Nyɩ nɩ̃ɛ vɛ̃ kɛ́ de nyɩ mɩŋa kʋ̀ a Naaŋmɩn, mɛ̃ nɩbɛ na tɩ kpi ɛ́ lɛb wa vʋʋrɛ a, ɛ́ nyɩ tone a ʋ tome, ɩ mɛ̃ tõ-tõ-bome a yel-vla maalʋ ƴãw a. 14Bʋ̃ʋ n'ʋ vɛ̃, a yel-bier kʋ̃ cãà dɩrɛ naalʋ a nyɩ zu ɛ, a Naaŋmɩn wulu na bɛ cãà so nyɩ, ɛ́ Naaŋmɩn maalʋ so nyɩ a ƴãw.

Nyɩ ɩ Naaŋmɩn yel-mɩnʋ gbãgbaar

15Ɛ́ bʋnʋ? Tɩ na maalɛ nɩ a yel-bier, a Naaŋmɩn wulu na bɛ cãà so tɩ ɛ́ Naaŋmɩn maalʋ so tɩ a bɩɩ? Lɛ bɛ n'a towtow ɛ! 16Nyɩ bɛ bãwnɩ a kɛ́ nyɩmɛ wa de nyɩ tʋɔra kʋ̀ nɩr, kɛ́ nyɩ ɩ gbãgbaar sàwr a ʋ nʋɔr a, nyɩ lɩɛb'ɩ a sob nɛ nʋɔr nyɩ na sàwr a gbãgbaar ɛ? A yel-bier wa n'ʋ a, nyɩ bɛ bãwnɩ a k'ʋʋ wɩɛr'ɩ nyɩ nɩ kũu pʋɔ ɩ? A nʋɔr-sàwfʋ wa n'ʋ a, k'ʋʋ wɩɛr'ɩ nyɩ nɩ a mɩnʋ pʋɔ ɩ? 17Ɛcɛ Naaŋmɩn so puoru: nyɩ tɩ dãw na ɩ a yel-bier gbãgbaar, ƴɛrɛŋa a, a wulu bɛ na wul nyɩ a sɛw kɛ́ nɩbɛ za tuur a, nyɩ sàw na de ʋ nɩ nyɩ pʋɔ za. 18Bɛ faa nyɩ nɩ a yel-bier nuru pʋɔ, nyɩ lɩɛbɩ a mɩnʋ gbãgbaar. 19Nɩsaalʋ n'a ɩ̃ ƴɛ̀rɛ, a nyɩ bãbàalʋ zũú. Mɛ̃ a lɛ nyɩ na tɩ de nyɩ mɩŋa za tu n a faalʋ nɩ a Wulu zawrʋ pùor, ɩ mɛ̃ gbãgbaar a, ɛ́ a ɩ nyɩ ɩ nɩ-gaarɩ a Naaŋmɩn zie a, a ƴɛrɛŋa a, nyɩ mɩ̀ de nyɩ mɩŋa za tu n a mɩnʋ ɩ mɛ̃ gbãgbaar a, kɛ́ nyɩ tʋ̃ɔ́ vʋʋrɛ nyɔ-vʋʋrʋ na ɩ sõw a.

20A lɛn daar nyɩ na tɩ ɩ a yel-bier gbãgbaar a, nyɩ bɛ tɩ ŋmɛlɛ kaar a mɩnʋ ɛ. 21A ɩ-ɩrɩ á ŋá na ɩrɛ nyɩ vĩ a dɩ̃a a, bʋnʋ tɔnɛ n'a nyɩ tɩ nyɛ̃ a pʋɔ, a lɛn daar nyɩ na tɩ tɛr a ɩ-ɩrɩ á ŋá a? Kũu n'a a waar'ɩ. 22Ɛcɛ ƴɛrɛŋa a, bɛ faa nyɩ nɩ a yel-bier nuru pʋɔ, nyɩ lɩɛbɩ Naaŋmɩn gbãgbaar tɛr ɩ-ɩrɩ na tɩrɛ sonu a, ɛ́ a baarʋ daar a waar'ɩ nyɔ-vʋʋrʋ na be kʋralɛ a. 23Bʋ̃ʋ n'ʋ vɛ̃, a yel-bier sã-ya n'ɩ a kũu, ɛcɛ a maalʋ a Naaŋmɩn na tɩrɛ zawla a, ʋlɛ n'ɩ a nyɔ-vʋʋrʋ na be kʋralɛ fʋ na mɩ́ tɛr lãwnɩ a Yeezu Kɩrɩta tɩ Sore a.

Đang chọn:

Ʋrɔm 6: DBDC

Tô màu

Sao chép

So sánh

Chia sẻ