Ʋrɔm 5

A ƴã-ɓaarʋ na be tɩɩm nɩ a Naaŋmɩn cara pʋɔ a

1A na ɩ à ŋá tɩ lɩɛbɩ nɩ-mɩn a tɩ sàw-deb ƴãw a, ƴã-ɓaarʋ be n tɩɩm nɩ a Naaŋmɩn cara pʋɔ, a tɩ Sore Yeezu Kɩrɩta zũú. 2Ʋlɛ n'ʋ puo a Naaŋmɩn maalʋ sɔ́r kʋ̀ tɩ, a sàw-deb zũú, ɛ́ tɩ be a maalʋ ŋa pʋɔ. Ɛ́ bom nɛ na ɩrɛ tɩ nʋ̃ɔ̀ a, a ɩ n tɩ na tɩɛrɛ kɛ́ tɩ nãà páw nɩ a Naaŋmɩn yúor-vɩɛlʋ-danʋ a. 3Ɛ́ a za cãà bɛ n'a ɩ, nʋ̃ɔ̀ ɩrɛ tɩ nɩ a tɩ kpɩɛrʋ tɛɛ za ƴãw, tɩ na bãw k'aa kpɩɛrʋ waar'ɩ nɩ a kanyir a, 4a kanyir waar'ɩ bɛ na ɩ b kaa fʋ bɛ dam a, ɛ́ bɛ na ɩ b kaa fʋ bɛ dam a, waar'ɩ tɩɛrʋ fʋ na ƴãw a Naaŋmɩn ƴãw a. 5A tɩɛrʋ ŋa bɛ bɛ̀lɛ ɩ, bʋ̃ʋ n'ʋ vɛ̃, Naaŋmɩn ƴãw nɩ a ʋ nɔ̃wfʋ a tɩ socie pʋɔ, a Vʋʋrʋ Sõw ʋ na kʋ̀ tɩ a zũú.

6Tɩ na bɛ tɩ tɛr fãw na ɩ bom za a, lɛ n'a a Naaŋmɩn daar na wa ta a, a Kɩrɩta kpi yel-bebe dem ƴãw. 7Fʋ na na sàw kpi nɩ-mɩŋa ƴãw a, mɛ̃ a mɩ́ kpɛmɛ na, kapaw fʋ na sàw na kpi nɩ-vla ƴãw. 8Ɛcɛ, a ʋlɩ bom nɛ na wul k'aa Naaŋmɩn nɔnɛ tɩ nɩ yaga za a, ʋlɛ n'ɩ a Kɩrɩta na kpi a tɩ ƴãw, a lɛn daar tɩ na tɩ cãà ɩ yel-bebe dem a. 9Ɛ́ a ʋ zɩ̃ɩ na ɩ tɩ lɩɛbɩ nɩ-mɩn a Naaŋmɩn zie ƴɛrɛŋa a, bʋnʋ bɛ ka be ɩ, ʋ na faa tɩ na zuo lɛ a Naaŋmɩn suur nãà wa ìr a ƴãw. 10Tɩ tɩ ɩ n a Naaŋmɩn dɔ̃ dem, ʋʋ ɩ tɩɩm nɩ ʋl lɛb kpɛ taa a ʋ Bie kũu zũú. Ƴɛrɛŋa tɩɩm nɩ ʋl na lɛb kpɛ taa baarɩ a, bʋnʋ bɛ ka be ɩ, ʋ na faa tɩ nɩ zaalɛ a ʋ Bie nyɔ-vʋʋrʋ ƴãw. 11Ɛ́ a za cãà bɛ n'a ɩ, a Naaŋmɩn ƴãw n'a nʋ̃ɔ̀ ɩrɛ tɩ a tɩ Sore Yeezu Kɩrɩta zũú, ʋl na n'ʋ so tɩɩm nɩ a Naaŋmɩn lɛb kpɛ taa ƴɛrɛŋa a.

A Adama nɩ a Kɩrɩta yele

12Nɩ-been yõ, a Adama, ʋlɛ n'ʋ so a yel-bier wa a tẽ-daa zu, ɛ́ a yel-bier'ʋ wa n a kũu. Ɛ́ à à ŋá n'a a kũu lʋ̃ɔ a nɩsaalbɛ za, bɛ za na maalɩ a yel-bier a ƴãw. 13A Naaŋmɩn na bɛ tɩ kʋ̀ a ʋ Wulu a Moyiir sɛr a, a yel-bier tɩ de nɩ niwn be a tẽ-daa zu. Ɛcɛ a Wulu na bɛ tɩ be be sɛr a, nɩr bɛ mɩ́ tɩ dɩ yel-bier san ɛ. 14Ɛcɛ a Adama daar tɩ ta n a Moyiir daar a, a kũu dɩ n naalʋ a nɩbɛ za zu, tɩ lãwnɩ a bɛlɩ dem na bɛ maalɩ a nʋɔr zawrʋ yel-bier mɛ̃ a Adama a.

A Adama tɩ n'ɩ a sob nɛ na na wa a pùorí a ŋmɛ̃-ta-tɔ. 15Ɛcɛ a maalʋ a Naaŋmɩn na tɩrɛ zawla a, nɩ a Adama sãwna a, a bɛ zɛ̃ taa ɩ. Yel-mɩŋa n'a, nɩ-yaga kpi n nɩ-been yõ sãwna zũú. Ɛcɛ a Naaŋmɩn maalʋ, a maalʋ ʋ na tu nɩ-been yõ, a Yeezu Kɩrɩta, kʋ̀rɛ nɩ-yaga zawla a, ʋ ɩ n kpɛ̃ɛ tɩ zuo. 16A yele a Naaŋmɩn maalʋ na wa n a, nɩ a yele nɩ-been yõ yel-bier na wa n a, mɩ̀ bɛ zɛ̃ taa ɩ: bʋ̃ʋ n'ʋ vɛ̃, nɩ-been yõ yel-bier ƴãw a, a ƴɛ̀rʋ maal'a, a tɩ yi dɔwrʋ, ɛ́ sãwna yaga yaga ƴãw, a Naaŋmɩn maalʋ ʋ na tɩrɛ zawla a, mɩ́ ɩ na bɛ ɩ nɩ-mɩn. 17Nɩ-been yõ ƴãw sɩrɩ n'a, nɩ-been yõ sãwna n'a so a kũu dɩ naalʋ, ɛcɛ a Yeezu Kɩrɩta, ʋ yõ ƴãw a, a bɛlɩ dem na páwr a Naaŋmɩn maalʋ yaga za a, nɩ a maalʋ na ɩ kɛ́ bɛ lɩɛbɩ nɩ-mɩn a, na vʋʋrɛ na ɛ́ dɩrɛ naalʋ zuo lɛ.

18A na ɩ à ŋá a, mɛ̃ a lɛ a dɔwrʋ na lo a nɩsaalbɛ za zu, nɩ-been yõ sãwna ƴãw a, lɛ mɩ̀ n'a nɩ-been yõ mɩnʋ ɩ a nɩsaalbɛ za ɩ nɩ-mɩn ɛ́ tɛr a nyɔ-vʋʋrʋ. 19Mɛ̃ a lɛ nɩ-yaga yaga na lɩɛbɩ yel-bebe dem nɩ-been yõ na zawrɩ a nʋɔr a ƴãw a, lɛ mɩ̀ n'a nɩ-yaga yaga na lɩɛbɩ nɩ-mɩn nɩ-been yõ na sàw a nʋɔr a ƴãw.

20A Naaŋmɩn wulu wa na k'aa sãwna tʋ̃ɔ́ bʋwlɩ pàw a ziir za#5:20 A Naaŋmɩn wulu wa na k'aa sãwna tʋ̃ɔ́ bʋwlɩ pàw a ziir za: A ka, bɛ mɩ̀ na tʋ̃ɔ́ na yel: a Naaŋmɩn wulu wa na k'ʋʋ ɩ a sãá tɩ na ɩ yel-bebe dem a. , ɛcɛ a be a yel-bier na tɩ bʋwlɩ a, a Naaŋmɩn maalʋ mɩ̀ tɩ ʋr'a tɩ zuo. 21A na ɩ à ŋá a, mɛ̃ a lɛ a yel-bier na tɩ wul a kũu fãw ʋ na tɛr a, lɛ mɩ̀ n'a a Naaŋmɩn maalʋ wule faafʋ fãw, k'ʋʋ tʋ̃ɔ́ tɛr tɩ cen nɩ a nyɔ-vʋʋrʋ na be kʋralɛ a pʋɔ, a Yeezu Kɩrɩta tɩ Sore ƴãw.

Đang chọn:

Ʋrɔm 5: DBDC

Tô màu

Sao chép

So sánh

Chia sẻ