Zã 4
4
A Yeezu nɩ a Samaari tẽw pɔw tuor-taa yele
1A Faarizɩ̃ɛ mɩnɛ tɩ wõ na kɛ́ a Yeezu páwr'ɩ po-tuurbɛ, ɛ́ kʋ̀rɛ bɛ a suob zuo a Zã. 2Ɛcɛ yel-mɩŋa sa ziri, a Yeezu tɔr za bɛ tɩ tɩrɛ suob ɛ, a ʋ po-tuurbɛ nɛbɛ tɩ tɩrɛ a suob. A Yeezu na tɩ wõ bɛ manɛ à à ŋá a, 3ʋ bɛr'ɩ a Zude tẽw ɛ́ lɛb cen a Galile tẽw lowr. 4A tɩ fɛr'a k'ʋʋ tu tɔl a Samaari tẽw pʋɔ. 5Lɛ n'a ʋ tɩ ta Samaari tẽw kãw pʋɔ bɛ na bʋɔlɛ kɛ́ Sɩkaar a, na pɩɛlɩ a zie ʋl a Zakɔb na kʋ̀ a ʋ bie Zuzɛb a. 6Be n'a a Zakɔb bule mɩ̀ tɩ be. A Yeezu na tɩ cen bàl a, ʋ tɩ zɩ̃ n a be, a bule nʋɔr. A tɩ man nɩ nɩ a mʋ̃tɔ̃w na põ-zɛ̃-taa a.
7Samaari tẽw pɔw kãw tɩ wa n kʋ̃ɔ 'wɔ̃wfʋ, a Yeezu wa yel ʋ: «Ɩ kʋ̃ɔ kʋ̀ m ɩ̃ nyũ.» 8A ʋ po-tuurbɛ tɩ cen nɩ a tẽw pʋɔ bʋ̃-dɩrɩ dab. 9Ɛcɛ a pɔw ʋl, a Samaari tẽw pɔw nɛ, tɩ lɛb'a yel ʋ: «Ŋmɩŋmɩn za n'a fʋ ɩ Zifʋ, ɛ́ zɛlɛ kʋ̃ɔ a ɩ̃ zie, mãa na ɩ Samaari tẽw pɔw a?» A Zifʋ mɩnɛ nɩ a Samaari tẽw nɩbɛ bɛ tɩ tuore ɩ. 10A Yeezu tɩ sɔw ʋ na yel: «Fʋ̃ʋ tɩ ɩ mɛ̃ fʋ bãw nɩ a Naaŋmɩn bʋ̃-kʋ̀ra a, nɩ ãa n'ɩ a sob ŋa na yere a fʋ zie: “Kʋ̀ m kʋ̃ɔ ɩ̃ nyũ” a, fʋ̃ʋ n'ʋ nãá nɩ̃ɛ zɛlɩ ʋ, ʋʋ nãá kʋ̀ b'ɩ kʋ̃ɔ na bùle yire a.» 11A pɔw lɛb yel a Yeezu: «Sore e, fʋ bɛ tɛr bʋ̃-'wɔ̃wna ɩ, ɛ́ a bule zulme, nyɩnɛ n'a fʋ na páw a kʋ̃ɔ na bùle yire a? 12Fʋ nɔ̃w ɩ n kpɛ̃ɛ zuo a tɩ sãàkʋm Zakɔb na kʋ̀ tɩ a bule ŋa a, ɛ́ nyũ a ʋ kʋ̃ɔ, ʋlɛ nɩ a ʋ bibiir nɩ a ʋ dʋn za a?» 13A Yeezu tɩ sɔw ʋ na: «Sob nɛ za na nyúur a kʋ̃ɔ á ŋá a, kʋ̃ɔ-nyúur na lɛb'a kpɩɛr ʋ. 14Ɛcɛ nɩr nãà wa nyũ a kʋ̃ɔ ɩ̃ na na kʋ̀ ʋ a, kʋ̃ɔ-nyúur kʋ̃ lɛb kpɛ ʋ towtow ɛ. Ɛ́ a kʋ̃ɔ ɩ̃ na na kʋ̀ ʋ a, a na lɩɛb'ɩ bul-nʋɔr a ʋ pʋɔ, a nyɔ-vʋʋrʋ na be kʋralɛ a bùle yire.» 15A pɔw tɩ lɛb'a yel a Yeezu: «Sore e, kʋ̀ m a kʋ̃ɔ al bʋʋrɛ, kʋ̃ɔ-nyúur taa lɛb kpɩɛr mɛ̃ ɩ, ɩ̃ɩ mɩ̀ ta mɩ́ lɛb waar ka kʋ̃ɔ 'wɔ̃wfʋ ɛ.»
16A Yeezu yel ʋ: «Cen tɩ bʋɔlɩ a fʋ sɩr, ɛ́ lɛb wa a ka.» 17A pɔw tɩ sɔw na: «Ɩ̃ bɛ tɛr sɩr ɛ.» A Yeezu yel ʋ: «Yel-mɩŋa n'a fʋ yel, fʋ na yel kɛ́ fʋ bɛ tɛr sɩr a. 18Sɩrbɛ anũu n'a fʋ kul, ɛ́ a dɛb ʋl fʋ na lãw kpɩɛr'ɩ a ƴɛrɛŋa a, bɛ ɩ a fʋ sɩr ɛ. A ka a, fʋ yel'ɩ yel-mɩŋa.» 19A pɔw lɛb yel ʋ: «Sore e, ɩ̃ nyɛ̃ na kɛ́ fʋ ɩ n naaŋmɩn-ƴɛ̀r-manɛ. 20Tãw ŋa na àr a zu n'a a tɩ sãàkʋm-kore tɩ dãw puore, ɛ́ a nyɩɩm Zifʋ mɩnɛ wa yel kɛ́ Zerizalɛm'a a fɛr kɛ́ a Naaŋmɩn puoru zie be.» 21A Yeezu sɔw yel: «Pɔw i, sàw a lɛ ɩ̃ na yere kʋ̀rɛ fʋ a, a daar tarɛ na, nyɩ na kʋ̃ mɩ́ cãà do a tãw ŋa zu, bɩɩ cen a Zerizalɛm tɩ puori a Naaŋmɩn Sãà a ɩ. 22A nyɩɩm n'a, nyɩ puore nɩ a Naaŋmɩn ɛ́ bɛ bãw ʋ ɛ, tɩɩm puore ʋ na ɛ́ bãw ʋ: Zifʋ mɩnɛ zie n'a a faafʋ yi. 23Ɛcɛ a daar tarɛ na, ʋ ta na mɔ̃ mɩ̀, a puor-puor-mɩn na puore a Sãà tu n vʋʋrʋ nɩ yel-mɩŋa. A puor-puorbɛ bɛ ŋa taabɛ nɛbɛ a Naaŋmɩn Sãà bɔbr. 24Naaŋmɩn ɩ n Vʋʋrʋ, ɛ́ a bɛlɩ dem na puore ʋ a, a fɛr'a kɛ́ bɛ puore ʋ tu n vʋʋrʋ nɩ yel-mɩŋa.» 25A pɔw tɩ lɛb'a yel ʋ: «Ɩ̃ bãw na kɛ́ a Naaŋmɩn Nɩ-kabra waar'a, a ʋl bɛ na bʋɔlɛ a Kɩrɩta a. Ʋlɛ wa wa a, ʋlɛ n'ʋ na ɩ tɩ bãw bom za.» 26A Yeezu yel ʋ: «Mãa n'ʋ, a mãa na ƴɛ̀rɛ nɩ fʋ a.»
27A lɛ pʋɔ n'a a ʋ po-tuurbɛ tɩ yi a tẽw pʋɔ ta. A Yeezu na tɩ ƴɛ̀rɛ nɩ a pɔw a, a tɩ ur bɛ na, ɛcɛ bɛ kãw za bɛ tɩ sàw sowr'ʋ: «Bʋ̃ʋ n'ʋ fʋ bɔbr a ʋ zie?» bɩɩ: «Bʋ̃ʋ so fʋ ƴɛ̀rɛ nɩ ʋ» ɛ. 28A lɛ n'a a pɔw tɩ bɛr a ʋ yuor a be, ɛ́ lɛb cen a tẽw pʋɔ tɩ yel a nɩbɛ: 29«Nyɩ wa nyɛ̃ nɩr kãw na yel a alɩ bome nɛ za ɩ̃ na ɩ a kʋ̀ m a, ʋlɛ taa wa n'ɩ a Kɩrɩta ʋ?» 30A nɩbɛ tɩ yi n a tẽw pʋɔ cen a Yeezu zie.
31Bɛ na bɛ tɩ ta sɛr a, a Yeezu po-tuurbɛ tɩ zɛlɛ ʋ na k'ʋʋ dɩ. Bɛ tɩ yel'a: «Wul-wul-kara a, dɩ wɛ!» 32Ɛcɛ a Yeezu tɩ yel bɛ na: «Ɩ̃ tɛr'ɩ bʋ̃-dɩra kãw nyɩ na bɛ bãw a na dɩ.» 33A lɛ n'a, a ʋ po-tuurbɛ tɩ sowre taa: «Nɩr ya wa n nɩ bʋ̃-dɩrɩ wa kʋ̀ ʋ bɩɩ?» 34A Yeezu yel bɛ: «A sob nɛ na tõ m a pʋ-tɩɛrʋ maalʋ nɩ a ʋ tome tob'a ɩ a ɩ̃ bʋ̃-dɩrɩ. 35A nyɩɩm tɛɛ za, nyɩ bɛ tʋ̃ɔ́ mɩ́ yel: “Cuwr anaar'a cɛ, ɛ́ a na ɩ a bʋ̃-dieri deb ɛ?” Ɛcɛ mãa yere na kʋ̀rɛ nyɩ: nyɩ dʋɔ zu jɩ́r nyɛ̃: a póru maal'a baarɩ gù a cɛb. 36A bʋ̃-diere tĩ na páwr a ʋ sã-ya, ʋ dier'ɩ a ʋ bome ɓanɛ taa a nyɔ-vʋʋrʋ na be kʋralɛ a ƴãw. Lɛ so, a bʋ̀r-bʋ̀rɛ nɩ a bʋ̃-diere lãw na cɩlɛ. 37A zʋkpar ʋl na yel kɛ́: “Bʋ̀rɛ be na, cɩɛrɛ be” a, tɛr'ɩ yel-mɩŋa. 38Ɩ̃ tõ nyɩ na nyɩ tɩ de bʋ̃-dieri púo pʋɔ nyɩ na bɛ tõ wõ tuo a, nɩ-yoru nɛbɛ tõ wõ n tuo ɛ́ nyɩ íre a bɛ hanʋ tɔnɛ.»
39Samaari tẽw nɩbɛ yaga, a tẽw ʋl pʋɔ, tɩ sàw na de a Yeezu yele a pɔw ƴɛ̀rʋ zũú, ʋ na tɩ dɩ a dãsɩɛ ŋa a ƴãw: «Ʋ manɩ nɩ a alɩ bome nɛ za ɩ̃ na ɩ a kʋ̀ m.» 40Alɛ so, bɛ na tɩ wa ta a ʋ zie a, bɛ zɛlɩ ʋ na k'ʋʋ tɛw a bɛ zie. A Yeezu tɩ tɛw na maalɩ bibie ayi a be. 41Nɩ-yaga tɩ lɛb'a pʋɔ de a ʋ yele, a ʋl mɩŋa ƴɛ̀rʋ zũú. 42Bɛ tɩ yere nɩ a pɔw zie: «Ƴɛrɛŋa a, fʋ̃ʋ na yel a bɛ cãà n'a so tɩ sàw ɛ. Tɩ mɩ̀ wõ n a ʋ ƴɛ̀rʋ, ɛ́ tɩ bãw na kɛ́ ʋlɛ sɩrɩ n'ɩ a tẽ-daa Faarɛ.»
Tõ-tõ-nɩ-kpɛ̃ɛ kãw bie a Yeezu na sanɩ a
43A Yeezu na tɩ kpɛ a be bibie ayi a, ʋ bɛr'ɩ a be ɛ́ lɛb cen a Galile tẽw. 44Ʋl tɔr za n'ʋ tɩ háa nʋɔr yel kɛ́ naaŋmɩn-ƴɛ̀r-manɛ bɛ nyɛrɛ ƴãwfʋ a ʋ tẽ-dɔwra tɔr za pʋɔ ɩ. 45Ɛcɛ ʋ na wa ta a Galile tẽw a, a be dem tuor'a nyɔw ʋ a sãanʋ vla, bʋ̃ʋ n'ʋ vɛ̃ bɛ mɩ̀ tɩ cen nɩ a Zerizalɛm a cuw, be n'a bɛ tɩ tʋ̃ɔ́ nyɛ̃ a alɩ yele nɛ za a Yeezu na maalɩ a.
46Lɛ n'a a Yeezu tɩ lɛb wa a Kana, Galile tẽw, a be ʋ na tɩ ɩ a kʋ̃ɔ a lɩɛbɩ a divɛ̃ a. Nãà tõ-tõ-nɩ-kpɛ̃ɛ kãw tɩ be n be. A ʋ bidɛb tɩ ɩ n bàal gã a Kafarnawɔm. 47A nɩ-kpɛ̃ɛ ŋa na tɩ wõ kɛ́ a Yeezu yi n a Zude tẽw wa a Galile tẽw a, ʋ wa na wa páw ʋ zɛlɛ ʋ k'ʋʋ wa cen tɩ sanɩ a ʋ bidɛb na ŋmaar vʋʋrʋ a. 48A Yeezu tɩ yel ʋ na: «A ɩ lɛ nyɩmɛ dɛ bɛ nyɛ̃ yele-na-ɩ-bãwfʋ-sãá nɩ yel-bãw-guuri a, nyɩ kʋ̃ sàw de ɩ?» 49A nãà tõ-tõ-nɩ-kpɛ̃ɛ yel ʋ: «Sore e, ta a ɩ̃ yir páw a ɩ̃ bie, ʋʋ bãw kpi!» 50A Yeezu yel ʋ: «Kule, a fʋ bie vʋʋrɛ na.» A nɩ-kpɛ̃ɛ ŋa tɩ sàw na de a Yeezu ƴɛ̀r-bir ŋa ɛ́ lɩɛb kule. 51Ʋ tɩ cãà nɩ a sɔ́r zu, ɛ́ a ʋ tõ-tõ-biir zɔ tuor'ʋ yel ʋ: «A fʋ bie vʋʋrɛ na!» 52Ʋ tɩ sowri bɛ na kɛ́ debor daar'a a tɩ tɛr ʋ a saba. Bɛ sɔw yel ʋ: «Zãa mʋ̃tɔ̃w gɔ̃wfʋ daar'a a ƴã-tʋlʋ bɛr ʋ.» 53A sãà tɩ nyɛ̃ na a ɩ a ʋlɩ tɛm nɛ tɔr za a Yeezu na tɩ yel ʋ a: «A fʋ bie vʋʋrɛ na.» A lɛ n'a ʋlɛ nɩ a ʋ yir dem za tɩ sàw de a Yeezu. 54A yele ayi sob, na ɩ bãwfʋ sãá a, n'ɩ á ŋá a Yeezu na maalɩ, a lɛn daar ʋ na yi a Zude tẽw lɛb wa a Galile tẽw a.
Đang chọn:
Zã 4: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.
