Zã 3
3
A Yeezu nɩ a Nikodem na ƴɛ̀r sɔw taa a
1Nɩr kãw tɩ be n be pʋɔ a Faarizɩ̃ɛ mɩnɛ lãw pʋɔ, a yúor dɩ kɛ́ Nikodem. Ʋ tɩ ɩ n a Zifʋ mɩnɛ nɩ-kpɛ̃ɛ kãw. 2Ʋ tɩ wa n tɩ̃ɩsɔw kãw wa páw a Yeezu yel ʋ: «Wul-wul-kara a, tɩ bãw na kɛ́ fʋ ɩ n wul-wule na yi Naaŋmɩn zie wa a. Alɛ bɛ ɩ lɛ, nɩsaalɛ za kʋ̃ tʋ̃ɔ́ maalɩ a yele-na-ɩ-bãwfʋ-sãá fʋ na maalɛ, Naaŋmɩn bɛ wa be a ʋ sob zie a ɩ.» 3A Yeezu tɩ sɔw ʋ na: «Yel-mɩŋa sɩza sɩza n'a ɩ̃ yere kʋ̀rɛ fʋ: nɩr bɛ wa lɛb dɔw a, ʋ kʋ̃ tʋ̃ɔ́ nyɛ̃ a Naaŋmɩn Naalʋ ɛ.» 4A Nikodem tɩ sowr'ʋ na: «Nɩr na kor a, ŋmɩŋmɩn n'a bɛ na ɩ lɛb dɔw ʋ? Ʋ na tʋ̃ɔ́ na lɛb kpɛ a ʋ mã púorí wa yi bɩɩ?» 5A Yeezu tɩ sɔw na: «Yel-mɩŋa sɩza sɩza n'a ɩ̃ yere kʋ̀rɛ fʋ: sob nɛ za na bɛ lɛb dɔw kʋ̃ɔ nɩ Vʋʋrʋ Sõw pʋɔ dɔwfʋ a, ʋ kʋ̃ tʋ̃ɔ́ kpɛ a Naaŋmɩn Naalʋ pʋɔ ɩ. 6A nɩsaal bʋ̃-dɔwra mɩ́ ɩ n nɩsaal, ɛ́ a Vʋʋrʋ Sõw bʋ̃-dɔwra ɩ vʋʋrʋ. 7Ta ɩ nɔ-ɓãa nyɔw fʋ, ɩ̃ na yel kʋ̀ b kɛ́ a fɛr'a kɛ́ nyɩ lɛb dɔw a ɩ. 8A sɛsɛb mɩ́ fure nɩ be za ʋ na bɔbr a, fʋ mɩ́ wone nɩ a ʋ damnʋ, ɛcɛ fʋ bɛ mɩ́ bãw be ʋ na yi waar nɩ be ʋ na cere a ɩ. A sob nɛ na lɛb dɔw a Vʋʋrʋ Sõw pʋɔ a, à ŋá n'a a mɩ́ ŋmɛ̃ a ʋ zie.» 9A Nikodem tɩ lɛb'a sowr'ʋ: «Ŋmɩŋmɩn n'a a na tʋ̃ɔ́ ɩ à à ŋá?» 10A Yeezu sɔw ʋ: «Fʋ ɩ n wul-wule a Ɩsɩrayɛl biir pʋɔ ɛ́ bɛ bãw a yele á ŋá ɩ? 11Yel-mɩŋa sɩza sɩza, ɩ̃ yere na kʋ̀rɛ fʋ: bom tɩ na bãw a ƴɛ̀rʋ n'a tɩ ƴɛ̀rɛ, bom tɩ na nyɛ̃ a dãsɩɛ n'a tɩ dɩrɛ, ɛ́ nyɩ bɛ sàw dier a tɩ dãsɩɛ ɩ. 12Mãa mɩ́ wa manɛ a tẽw zu yele kʋ̀rɛ nyɩ ɛ́ nyɩ bɛ sàw dier a, ŋmɩŋmɩn n'a nyɩ na sàw de a tẽ-vla pʋɔ yele ɩ̃ nãà wa yere kʋ̀rɛ nyɩ a? 13Nɩr za bɛ do a tẽ-vla pʋɔ ɩ, a bɛ ɩ a ʋlɩ nɩr nɛ yõ na yi a tẽ-vla pʋɔ siw wa a, a Nɩsaal Bie. 14Mɛ̃ a lɛ a Moyiir na tɩ bà a dàa a wɛja-kpalɛ pʋɔ yawlɩ a kure waab, ʋ zɛw a, lɛ n'a a fɛr kɛ́ bɛ mɩ̀ bà a Nɩsaal Bie k'ʋ zɛw, 15kɛ́ nɩr za na sàw de a ʋ yele a, ʋ páw a nyɔ-vʋʋrʋ na be kʋralɛ a. 16Naaŋmɩn sɩrɩ na nɔ̃w a tẽ-daa yaga za, tɩ de a ʋ Bie, ʋ Bi-been kʋ̀ ʋ, kɛ́ nɩr za na sàw de ʋ a, ta kpi ɛ, ɛ́ páw a nyɔ-vʋʋrʋ na be kʋralɛ a. 17A Naaŋmɩn bɛ tõ a ʋ Bie a tẽ-daa zu k'ʋʋ wa maal'ɩ a tẽ-daa ƴɛ̀rʋ ɛ, ʋ tõ ʋ na kɛ́ a tẽ-daa wa tʋ̃ɔ́ nyɛ̃ a faafʋ a ʋ ƴãw. 18Ʋlɩ sob na sàw de a ʋ yele a, ʋ yi na zaa ƴɛ̀rʋ-maalʋ pʋɔ. Ʋlɩ sob na bɛ sàw de a, ʋ ɩ n sãwna sob baarɩ, a ʋ na bɛ sàw de a Naaŋmɩn Bi-been yõ a ƴãw. 19A ƴɛ̀rʋ bɛ na na maalɩ a n'ɩ ŋa: a cãà wa n a tẽ-daa zu, ɛ́ a nɩsaalbɛ wa nɔ̃w a lige gãw a cãà, a bɛ ɩ-ɩrɩ na bɛ vɩɛl a zũú. 20Yel-mɩŋa n'a, sob nɛ za na ɩrɛ faa a, ʋ bɛ nɔnɛ a cãà ɩ, ɛ́ bɛ yire cãà pʋɔ ɩ, kɛ́ a ʋ ɩ-ɩrɩ taa wa mab sãá ɩ. 21Ɛcɛ ʋlɩ sob ɩb na tu a yel-mɩŋa a, ʋ mɩ́ yire nɩ cãà pʋɔ, kɛ́ bɛ tʋ̃ɔ́ mɩ́ nyɛ̃ a sãá kɛ́ a ʋ ɩ-ɩrɩ tu n a lɛ a Naaŋmɩn na bɔbr a.»
A Zã-Bati nɩ a Yeezu
22A yele á ŋá pùorí, a Yeezu nɩ a ʋ po-tuurbɛ tɩ cen nɩ a Zude tẽw tɩ be a be, ɛ́ a Yeezu tɩrɛ a suob. 23A Zã-Bati tɩ be n a Ayɩnɔn pɩɛlɩ a Salim tẽw, a kʋ̃ɔnɩ na tɩ ʋr a, mɩ̀ tɩrɛ a suob. A nɩbɛ tɩ waar'ɩ a ʋ zie wa dier a suob. 24Bɛ bɛ tɩ nyɔw a Zã ƴãw a gaso pʋɔ sɛr ɛ.
25Lɛ n'a a Zã po-tuurbɛ bɛ mɩnɛ nɩ Zifʋ nɩr kãw tɩ ŋmɩɛr nɔkpɛn a dɛwr-so-bɛrʋ yele ƴãw. 26Bɛ tɩ cen na tɩ páw a Zã yel ʋ: «Wul-wul-kara a, a nɩr nɛ na tɩ be a fʋ zie a Zurdɛ̃ man gãwn a, a ʋl dãsɩɛ fʋ na dɩ a, ʋlɛ n'ɩ ŋan mɩ̀ tɩrɛ a suob, ɛ́ a nɩbɛ za cere a ʋ zie.» 27A Zã tɩ sɔw bɛ na: «Nɩr kʋ̃ tʋ̃ɔ́ yel k'ʋʋ so nɩ bom Naaŋmɩn bɛ wa n'ʋ kʋ̀ ʋ a ɩ. 28A nyɩɩm tɛɛ za, nyɩ dɩ n a ɩ̃ dãsɩɛ k'ɩ̃ɩ yel'a: “Mãa bɛ n'ɩ a Kɩrɩta ɩ. Ɩ̃ ɩ n a sob nɛ bɛ na tõ k'ʋʋ de ʋ niwn a.” 29Ʋlɩ sob na so a pɔw-sãan a, ʋlɛ n'ɩ a dɛb-sãan. Ɛ́ a dɛb-sãan bá a, ʋ mɩ́ àr'a kɔw ʋ, bɛrɛ wone a ʋ ƴɛ̀rʋ, ɛ́ a dɛb-sãan kɔkɔr ɩrɛ ʋ nʋ̃ɔ̀ yaga. A ɩ̃ nʋ̃ɔ̀ n'ɩ à ŋà, ʋ vɩɛl'a bɛ cɛ ɩ. 30A fɛr'a kɛ́ a ʋ yúor yire, ɛ́ a mãa yúor báarɛ.»
A sob nɛ na yi a saa-zu a
31«Sob nɛ na yi a saa-zu waar a do na gãw bɛ za. Sob nɛ na yi tẽw zu a ɩ n tẽw zu nɩr, ɛ́ mɩ́ ƴɛ̀rɛ mɛ̃ tẽw zu nɩr a. Sob nɛ na yi a salom zu waar a [do na gãw bɛ za]: 32ʋ dɩrɛ nɩ a bom nɛ ʋ na nyɛ̃ ɛ́ wõ a dãsɩɛ, ɛ́ nɩr za bɛ sàwr dier a ʋ dãsɩɛ ɩ. 33Nɩr na sàw de a ʋ dãsɩɛ a, wul'a kɛ́ Naaŋmɩn ɩ n yel-mɩŋa sob. 34Bʋ̃ʋ n'ʋ vɛ̃, sob nɛ a Naaŋmɩn na tõ a yere nɩ a Naaŋmɩn ƴɛ̀r-bie, a Naaŋmɩn kʋ̀rɛ ʋ nɩ a ʋ Vʋʋrʋ bɛ tɛr manʋ ɛ. 35A Sãà nɔnɛ nɩ a Bie, ɛ́ de bom za ƴãw a ʋ nuru pʋɔ. 36Sob nɛ na sàw de a Bie a páw nɩ a nyɔ-vʋʋrʋ na be kʋralɛ a. Ɛcɛ sob nɛ bɛ wa sàw de a Bie a, ʋ kʋ̃ páw a nyɔ-vʋʋrʋ ŋa ɩ, ɛ́ a Naaŋmɩn suur be n a ʋ sob ƴãw.»
Đang chọn:
Zã 3: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.
