Zã 10
10
A pi-cɩ̃ɩnɛ nɩ a ʋ píir zʋkpar
1«Yel-mɩŋa sɩza sɩza n'a ɩ̃ yere kʋ̀rɛ nyɩ, ʋlɩ sob na bɛ tuur a zaw dɩ̃dɔr ƴãw kpɩɛr a píir zaw pʋɔ, ɛ́ mɩ́ tu zi-yoru do kpɛ a, ʋ ɩ n nyãnyuge, nyãnyu-nɩ-kʋrɛ. 2Ɛcɛ ʋlɩ sob na mɩ́ tu a dɩ̃dɔr ƴãw kpɛ a, ʋlɛ n'ɩ a pi-cɩ̃ɩnɛ. 3A dɩ̃dɔ-gùre mɩ́ yuo ʋ nɩ a dɩ̃dɔr, ɛ́ a píir bɛrɛ wone a ʋ kɔkɔr. Ʋ mɩ́ bʋɔl'ɩ a ʋ píir yée been been, ɛ́ kpa a yi n. 4Ɛ́ ʋlɛ wa kpa a za yi n baar'a, ʋ mɩ́ de a nɩ niwn, ɛ́ a tuur ʋ, a na bãw a ʋ kɔkɔr a ƴãw. 5A bɛ be za na tu nɩ-sãan ɛ, a na nɩ̃ɛ na mɩ́ zɔ, a na bɛ bãw a nɩ-sãanbɛ kɔkɔr a ƴãw.»
6A zʋkpar ŋa n'ʋ a Yeezu tɩ lɔb kʋ̀ bɛ, ɛcɛ bɛ bɛ tɩ bãw bʋ̃ʋ n'ʋ ʋ bɔbr k'ʋʋ yel kʋ̀ bɛ a ɩ.
A Yeezu n'ɩ a pi-cɩ̃ɩn-vla
7A Yeezu tɩ lɛb'a yel bɛ: «Yel-mɩŋa sɩza sɩza n'a ɩ̃ yere kʋ̀rɛ nyɩ: mãa n'ɩ a píir zaw dɩ̃dɔr. 8A bɛlɩ dem za na de niwn wa a ɩ̃ ƴãw a, bɛ ɩ n nyãnyuwr, nyãnyu-nɩ-kʋrbɛ, ɛcɛ a píir bɛ bɛr wõ a bɛ ƴɛ̀rʋ ɛ. 9Mãa n'ɩ a dɩ̃dɔr. Nɩr wa tuur a ɩ̃ zie kpɩɛr a, ʋ na nyɛ̃ nɩ faafʋ. Ʋ na mɩ́ kpɛ na ɛ́ yi, ʋʋ na nyɛ̃ nɩ bʋ̃-dɩrɩ. 10Nyãnyuge bɛ waar, a bɛ ɩ zub nɩ kʋb nɩ sãw-bɛrʋ tɛwr ƴãw ɛ. Mãa wa na kɛ́ a nɩsaalbɛ wa tʋ̃ɔ́ páw a nyɔ-vʋʋrʋ, ɛ́ páw ʋ gʋr bɛr. 11Mãa n'ɩ a pi-cɩ̃ɩn-vla. A pi-cɩ̃ɩn-vla mɩ́ de nɩ a ʋ nyɔ-vʋʋrʋ tɩr a ʋ píir ƴãw. 12A libi-bɔbrɛ na bɛ ɩ a pi-cɩ̃ɩnɛ tɔr za a, ɛ́ mɩ̀ bɛ so a píir a, ʋlɛ mɩ́ wa nyɛ̃ a wɛ-baa ʋ waar a, ʋ mɩ́ zɔ na ɛ́ bɛr a píir, a wɛ-baa nyɔw a, ɛ́ diw a yaarɩ bɛr. 13Libi-bɔbrɛ n'ʋ, ʋʋ tobr bɛ ka a píir ƴãw ɛ. 14Mãa n'ɩ a pi-cɩ̃ɩn-vla. Ɩ̃ bãw nɩ a ɩ̃ píir ɛ́ a ɩ̃ píir bãw mɛ̃, 15mɛ̃ a lɛ a ɩ̃ Sãà na bãw mɛ̃ ɩ̃ɩ bãw a ɩ̃ Sãà a. Ɩ̃ɩ dier'ɩ a ɩ̃ nyɔ-vʋʋrʋ tɩrɛ a ɩ̃ píir ƴãw. 16Ɩ̃ cãà na tɛr píir a mɩnɛ na bɛ ɩ a zaw ŋa píir a, a fɛr'a k'ɩ̃ɩ mɩ̀ cɩ̃ɩnɛ a. A na bɛrɛ na wone a ɩ̃ ƴɛ̀rʋ, lɛ n'a zaw been yõ nɩ pi-cɩ̃ɩn-been yõ na be be.»
17«A ɩ̃ Sãà nɔnɛ mɛ̃ na, ɩ̃ na dier a ɩ̃ nyɔ-vʋʋrʋ tɩrɛ k'ɩ̃ɩ tʋ̃ɔ́ lɛb páw ʋ a pùorí a ƴãw. 18Nɩr za bɛ n'ʋ íre a ɩ̃ nyɔ-vʋʋrʋ ɛ, mãa mɩŋa n'ʋ dier a ɩ̃ nyɔ-vʋʋrʋ tɩrɛ. Ɩ̃ tɛr'ɩ fãw na tʋ̃ɔ́ de a ɩ̃ nyɔ-vʋʋrʋ tɩr, ɛ́ tɛr fãw na tʋ̃ɔ́ lɛb páw ʋ: a nʋɔr'ɩ à ŋà a ɩ̃ Sãà na ƴãw kʋ̀ m a.»
19A ƴɛ̀r-bie á ŋá tɩ lɛb'a maal ƴãw bʋ́r-taa a Zifʋ mɩnɛ cara pʋɔ. 20A bɛ pʋɔ a, yaga tɩ yere na: «Ʋ ìre nɩ kɔ̃tɔmɛ! Ʋ yarɛ na! Bʋ̃ʋ n'ʋ so nyɩ bɛrɛ wone a ʋ ƴɛ̀rʋ?» 21Ɛcɛ bɛ mɩnɛ tɩ yere na: «Kɔ̃tɔ̃-ìre ƴɛ̀rʋ bɛ n'ɩ à á ŋá ɩ. Kɔ̃tɔ̃-faa na tʋ̃ɔ́ na yuo zɔn mimie e?»
A Zifʋ mɩnɛ bɛ sàw de a Yeezu ɛ
22A lɛn daar, bɛ tɩ maalɛ nɩ a Ŋmɩn-yir-kpɛ̃ɛ maalʋ cuw a Zerizalɛm. Ũo-yi-paala tɩ n'a. 23A Yeezu tɩ be n a Ŋmɩn-yir-kpɛ̃ɛ pʋɔ cɔlɛ viire a Salomɔ̃ bɛ-caar pʋɔ. 24A Zifʋ mɩnɛ tɩ ŋmãa na viiri koli ʋ ɛ́ sowr'ʋ: «Fʋ bɔbr'a kɛ́ tɩ bʋ́nɛ à ŋá a fʋ ƴãw ɛ́ gù debor? Fʋ̃ʋ wa n'ɩ a Kɩrɩta a, fʋ̃ʋ yel kʋ̀ tɩ daadaa!» 25A Yeezu tɩ sɔw bɛ na: «Ɩ̃ yel'a kʋ̀ nyɩ, ɛ́ nyɩ bɛ sàw de ɩ. A tome ɩ̃ na tone a ɩ̃ Sãà yúor ƴãw a, alɛ n'a dɩrɛ a ɩ̃ dãsɩɛ. 26Ɛcɛ nyɩ bɛ sàw de m ɛ, nyɩ na bɛ pʋɔ a ɩ̃ píir pʋɔ a ƴãw. 27A ɩ̃ píir bɛrɛ na wone a ɩ̃ ƴɛ̀rʋ, ɩ̃ bãw a na ɛ́ a tuur mɛ̃. 28Ɩ̃ kʋ̀rɛ nɩ a ɩ̃ píir a nyɔ-vʋʋrʋ na be kʋralɛ a: a kʋ̃ kpi towtow ɛ, ɛ́ nɩr kʋ̃ tʋ̃ɔ́ faa a a ɩ̃ nũú ɛ. 29A ɩ̃ Sãà na kʋ̀ m a píir a ɩ n kpɛ̃ɛ zuo bom za, ɛ́ nɩr za kʋ̃ tʋ̃ɔ́ faa bom a ɩ̃ Sãà nũú ɛ: 30mãa nɩ a ɩ̃ Sãà za ɩ n been.»
31A Zifʋ mɩnɛ tɩ lɛb'a maal wob kʋsɛbɛ kɛ́ bɛ lɔb'ɩ ʋ. 32Ɛcɛ a Yeezu tɩ lɛb'a yel bɛ: «Ɩ̃ wul nyɩ nɩ tõ-vɩɛlɩ yaga na yi a ɩ̃ Sãà zie a. A tõ-vɩɛlɩ á ŋá buor sob ƴãw n'a nyɩ bɔbr kɛ́ nyɩ lɔb'ɩ mɛ̃ a kʋsɛbɛ?» 33A Zifʋ mɩnɛ tɩ sɔw ʋ na: «Tõ-vla ƴãw bɛ n'a tɩ bɔbr kɛ́ tɩ lɔb'ɩ fʋ a kʋsɛbɛ ɩ. Fʋ na tʋ a Naaŋmɩn a n'a so: fʋ̃ʋ na ɩ nɩsaal a, fʋ de nɩ fʋ tʋɔra bʋɔlɛ Naaŋmɩn.» 34A Yeezu tɩ sɔw bɛ na: «A nyɩ Naaŋmɩn wulu sɛbɛ pʋɔ bɛ bɛ tʋ̃ɔ́ sɛb: “Ɩ̃ yel'a: nyɩ ɩ n naaŋmɩmɛ” ɩ#10:34 Nyɛ̃ Ssy 82.6.? 35A na ɩ à ŋá a, a bɛlɩ dem na bɛrɛ wone a Naaŋmɩn ƴɛ̀rʋ a, a Naaŋmɩn wulu mɩ́ tʋ̃ɔ́ na bʋɔlɛ bɛ ŋmɩmɛ. Ɛcɛ nɩr kʋ̃ tʋ̃ɔ́ lɩɛbɩ a Sɛb-sõw ƴɛ̀rʋ bɛr ɛ. 36Ɛ́ a sob nɛ a Sãà na maalɩ ʋ ɩ sõw, ʋʋ tõ ʋ a tẽ-daa zu a, nyɩ yel ʋ na: “Fʋ tʋʋr'ɩ Naaŋmɩn”, ɩ̃ na háa nʋɔr yel k'ɩ̃ɩ ɩ n Naaŋmɩn Bie a ƴãw. 37Mãa bɛ wa tone a ɩ̃ Sãà tome a, nyɩɩm ta sàw de m ɛ! 38Ɛcɛ mãa wa tone a a, nyɩmɛ saa bɛ sàw de m a, nyɩɩm sàw de a tome á ŋá, kɛ́ nyɩ tʋ̃ɔ́ bãw ɛ́ sàw kɛ́ a ɩ̃ Sãà sɩrɩ na lãw nɩ mɛ̃, mɛ̃ a lɛ ɩ̃ na lãw nɩ a ɩ̃ Sãà a.» 39A lɛ n'a bɛ lɛb tɩ maal bɔbr a ʋ nyɔwfʋ, ɛcɛ bɛ bɛ tɩ páw ʋ nyɔw ɛ. 40A Yeezu tɩ lɛb'a cen a Zurdɛ̃ man gãwn, tɩ be a be a Zã na tɩ tĩ tɩrɛ a suob a. 41Nɩ-yaga tɩ cen nɩ a ʋ zie, ɛ́ tɩ yere: «Sɩza n'a, a Zã bɛ maalɩ yel kãw za na ɩ bãwfʋ sãá a ɩ, ɛcɛ a yele al za ʋ na tɩ yel a nɩr ŋa ƴãw a ɩ n sɩza.» 42Nɩ-yaga tɩ sàw na de ʋ a be.
Đang chọn:
Zã 10: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.
