Galasi 5
5
Kɩrɩta-nɩr tʋɔra-sob yele
1A Kɩrɩta ír tɩ na bɛr a gbãgbaalʋ pʋɔ, kɛ́ tɩ sɩrɩ so tɩ tʋɔra. A na ɩ à ŋá a, nyɩ ƴãw fãw ta lɛb de a gbãgba-mie ɩ.
2Nyɩ nyɛ̃, a mãa Pol, ɩ̃ yere na kʋ̀rɛ nyɩ: nyɩmɛ wa ƴãw bɛ ŋma nyɩ a yɛɛ a, a Kɩrɩta kʋ̃ cãà tɛr yel-ɩra kãw za a nyɩ zie ɩ. 3Ɩ̃ɩ lɛb'a maal yere kʋ̀rɛ nɩsaal za na ƴãw bɛ ŋmãa ʋ a yʋ̀ɔr a, k'aa fɛr'a k'ʋʋ sàwr a Wulu ʋ za. 4Nyɩɩm na bɔbr k'aa Wulu ɩ nyɩ ɩ nɩ-mɩn a, a baar'a nyɩɩm nɩ a Kɩrɩta cara pʋɔ, ɛ́ nyɩ mɩ̀ kʋ̃ lɛb páw a Naaŋmɩn maalʋ ɛ. 5Ɛcɛ a tɩɩm a, tɩ ƴãw nɩ a tɩ tɩɛrʋ a Naaŋmɩn ƴãw, ʋl na na ɩ tɩ ɩ nɩ-mɩn a ʋ niŋé a. A yel ŋa n'ʋ tɩ gùre nɩ a Vʋʋrʋ Sõw fãw, ʋl na tone a tɩ naaŋmɩn-sàw-deb pʋɔ a. 6Bʋ̃ʋ n'ʋ vɛ̃, sob nɛ na lãw nɩ a Yeezu Kɩrɩta a, a yʋɔr-ŋmãafʋ bɩɩ a bɛ-ŋmãafʋ bɛ ɩ bom za ɩ, a bom'ɩ a naaŋmɩn-sàw-deb na tɛr nɔ̃wfʋ ɩ-ɩrɩ a.
7Nyɩ tɩ tĩ na zɔrɛ vla za! Ãa n'ʋ wa piw nyɩ a sɔ́r, bɛ bɔbr kɛ́ nyɩ tuur a yel-mɩŋa? 8À à ŋá bɛ na ƴɛ̀r nyɩ sàw a, a bɛ yi a Naaŋmɩn na bʋɔlɛ nyɩ a zie ɩ. 9Mɛ̃ a lɛ bɛ na mɩ́ yel a: «Dãbɩl blã mɩ́ ɩ n a zɔ̃-bura za ír.» 10Mãa a, a Sore ɩ na ɩ̃ bɛr tɩɛrʋ a nyɩ ƴãw: ɩ̃ bãwnɩ a na nyɩ na kʋ̃ tɩɛrɛ bʋ̃-yoru a. Ɛcɛ a sob nɛ na ƴãwnɛ a damnʋ a nyɩ pʋɔ a na páw nɩ dɔwrʋ, ʋlɛ saa ŋmɛ̃ ŋmɩŋmɩn a.
11Mãa ƴãw a, yɛbr i, mãa tɩ ɩ mɛ̃ ɩ̃ cãà na kanɛ k'aa fɛr'a kɛ́ bɛ mɩ́ ŋmãa a yʋ̀ɔr a, bʋ̃ʋ ƴãw n'a bɛ nãá cãà dɔwrɛ mɛ̃? A lɛ pʋɔ a, a Kɩrɩta da-gara zu kũu ƴɛ̀rʋ kʋ̃ʋ damnɛ nɩr za ɩ. 12A bɛlɩ dem na ƴãwnɛ a damnʋ a nyɩ pʋɔ a, bɛ nãá mɩ́ tɛr lɛɛɛ tɩ ír a bɛ lamɛ mɩ̀.
13 Yɛbr i, a nyɩɩm a, a tʋɔra-sob ƴãw n'a bɛ bʋɔlɩ nyɩ. Ɛcɛ nyɩ taa wa yel kɛ́ a tʋɔra-sob ŋa ƴãw ɛ́ tuur a nyɩ nɩsaal yel-bɔbrɩ na bɛ vɩɛl a ɩ. Nyɩ nɩ̃ɛ mɩ́ kaarɛ taa zie a nɔ̃wfʋ zũú. 14Bʋ̃ʋ n'ʋ vɛ̃, a Naaŋmɩn wulu za zu n'ɩ: «Fʋ na nɔnɛ nɩ a fʋ tɔ sob mɛ̃ a fʋ mɩŋa a#5:14 Nyɛ̃ Lev 19.18..» 15Ɛcɛ, nyɩmɛ wa dʋnɛ taa ɛ́ vɔlɛ taa mɛ̃ wɛ-dʋ̃-faar a, nyɩ gù vla, nyɩ na baar'ɩ taa.
A Vʋʋrʋ Sõw yel-bɔbrɩ nɩ a nɩsaal yel-bɔbrɩ
16A na ɩ à ŋá a, yel ŋa n'ʋ ɩ̃ bɔbr k'ɩ̃ɩ yel kʋ̀ nyɩ: nyɩ bɛr a nyɩ nyɔ-vʋʋrʋ kʋ̀ a Vʋʋrʋ Sõw ɛ́ nyɩ kʋ̃ ɩrɛ a lɛ a nyɩ nɩsaalʋ na bɔbr a ɩ. 17Bʋ̃ʋ n'ʋ vɛ̃, a tɩ nɩsaalʋ yel-bɔbrɩ nɩ a Vʋʋrʋ Sõw dem bɛ lãw taa ɩ, ɛ́ a Vʋʋrʋ Sõw yel-bɔbrɩ nɩ a tɩ nɩsaalʋ dem mɩ̀ bɛ lãw taa ɩ, mɔb'a be a za ayi cara pʋɔ. Alɛ n'a so nyɩ bɛ tʋɔr ɩrɛ a lɛ nyɩ na bɔbr a ɩ. 18A Vʋʋrʋ Sõw wa n'ʋ wule nyɩ a, a Moyiir wulu bɛ cãà fɛrɛ nyɩ ɛ.
19A nɩsaalʋ tõ-toni sãá nɩ nyɩraalɛ, alɛ n'ɩ á ŋá: pɩ̃ɔ-yele, dɛwr, faalʋ, 20tɩbɛ maalʋ, sʋɔlʋ, dɔ̃, zɛb-taa, nyuur, suur, cier-taa, bɛ-wõ-taa, bʋ́r-taa, 21nyɛ̃ a fʋ tɔ bom bɔbr, dãa kuolu, dɩ tɩ gãw nɩ taa, nɩ a yele á ŋá taabɛ. Nyɩ páw bãwnɩ a, mɛ̃ a lɛ ɩ̃ na tɩ dãw yel kʋ̀ nyɩ a, a bɛlɩ dem na tɛr a ɩ-ɩrɩ á ŋá taabɛ a kʋ̃ nyɛ̃ zie a Naaŋmɩn Naalʋ pʋɔ ɩ.
22Ɛcɛ a Vʋʋrʋ Sõw bom'ɩ: nɔ̃wfʋ, nʋ̃ɔ̀, ƴã-ɓaarʋ, su-nyɔwra, vɩɛlʋ, nɩ-vla-ɩb, naaŋmɩn-sàw-deb, 23nɩsaal bàálʋ-ɩb, tʋɔra-nyɔwfʋ. A Moyiir wulu bɛ diwr a yele á ŋá taabɛ bɛrɛ ɩ. 24A bɛlɩ dem a Kɩrɩta na so a, bɛ kpa n a nɩsaalʋ a da-gara zu lãwnɩ a ʋ vʋla bʋʋrɛ na mɩ́ be a ʋ zie a, nɩ a ʋ yel-bɔbrɩ. 25A Vʋʋrʋ na n'ʋ so tɩ vʋʋrɛ a, tɩ mɩ̀ bɛr tɩ tʋɔra kʋ̀ ʋ. 26Tɩ ta mɩ́ pɔrɛ ɩ, a nɔhaarʋ nɩ a nyu-ɩb, a ta be a tɩ cara pʋɔ ɩ.
Đang chọn:
Galasi 5: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.