Galasi 3
3
A Naaŋmɩn wulu bɩɩ a naaŋmɩn-sàw-deb
1'Woi Galasi tẽw dãbole bɛ ŋan i! Ãa n'ʋ ɩ a ʋ sɔ-ɩb nyɔw nɩ nyɩ? Nyɩɩm na wõ a Yeezu Kɩrɩta yele vla, a ɩ mɛ̃ a nyɩ mimié n'a bɛ kpa ʋ a da-gara zu a! 2Nyɩ caalɩ mɛ̃ niwn a yel ŋa tɛwr ƴãw: a Naaŋmɩn wulu sàwfʋ zũú n'a nyɩ páw a Vʋʋrʋ Sõw bɩɩ nyɩ na bɛr wõ ɛ́ sàw de a Yel-nʋ̃ɔ̀ a ƴãw n'a? 3À ŋá n'a nyɩ bol sɛw ɩ? A yel nyɩ na tĩ nɩ a Naaŋmɩn Vʋʋrʋ a, ƴɛrɛŋa nyɩ bɔbr'a kɛ́ nyɩ baar'ʋ nɩ nyɩ mɩŋa fãw ʋ? 4Zawlalɛ ƴãw n'a nyɩ bãw a yele sɛw à ŋá bɩɩ? A kʋ̃ tʋ̃ɔ́ ɩ zawlalɛ ɩ! 5A Naaŋmɩn na kʋ̀rɛ nyɩ a ʋ Vʋʋrʋ ɛ́ maalɛ a nɔ-ɓãa-yele a nyɩ sɔgɔ a, a Wulu sàwfʋ zũú n'a bɩɩ nyɩ na bɛr wõ ɛ́ sàw de a Yel-nʋ̃ɔ̀ a n'a so?
6À ŋá n'a a tɩ ŋmɛ̃ a Abraham zie. Bʋ̃ʋ n'ʋ vɛ̃, a Sɛb-sõw yel'a: «A Abraham tɩ sàw na de a Naaŋmɩn, a Naaŋmɩn sàw k'ʋʋ ɩ n nɩ-mɩŋa, a ʋ naaŋmɩn-sàw-deb zũú#3:6 Nyɛ̃ Yzt 15.6..» 7A na ɩ à ŋá a, nyɩ bãw vla: a bɛlɩ dem na sàw de a Naaŋmɩn a, bɛlɛ nɛbɛ sɩrɩ ɩ a Abraham bibiir. 8A Sɛb-sõw na tɩ bãw kɛ́ Naaŋmɩn na ɩ n a nɩ-bʋʋr-yoru bɛ ɩ nɩ-mɩn a bɛ naaŋmɩn-sàw-deb zũú a, ʋ tɩ de nɩ niwn yel a yel-vla ŋa kʋ̀ a Abraham: «A nɩ-bʋʋrɛ za na páw nɩ maalʋ a fʋ zũú#3:8 Nyɛ̃ Yzt 12.3..» 9A Abraham tɩ sàw na de ɛ́ páw a maalʋ. Lɛ mɩ̀ n'a a bɛlɩ dem na sàw de a, mɩ́ páw a maalʋ mɛ̃ a Abraham.
10Ɛcɛ a bɛlɩ dem na ɩrɛ ƴãwn a Naaŋmɩn wulu sàwfʋ ƴãw tɛwr'a, ŋmɛ-ƴãw tuur bɛ na. Mɛ̃ a Sɛb-sõw taa yel à ŋá: «Sob nɛ za na bɛ tuur a al za na sɛb a Wulu sɛbɛ pʋɔ kʋralɛ a, ŋmɛ-ƴãw a páw ʋ!#3:10 Nyɛ̃ Wl-ayi 27.26.» 11A mɔ̃ mɩ̀ ɩ n cãà kɛ́ nɩr kʋ̃ tʋ̃ɔ́ ɩ nɩ-mɩŋa a Naaŋmɩn wulu sàwfʋ tɛwr zũú ɛ. Bʋ̃ʋ n'ʋ vɛ̃, bɛ sɛb'ɩ à ŋá: «Sob nɛ na ɩ nɩ-mɩŋa a sàw-deb zũú a, ʋ na vʋʋrɛ na#3:11 Nyɛ̃ Hab 2.4..» 12Ɛcɛ a Naaŋmɩn wulu bɛ yi a naaŋmɩn-sàw-deb pʋɔ ɩ, bɛ nɩ̃ɛ na mɩ̀ cãà sɛb: «Sob nɛ na tuur a Wulu nɛ-ƴãwnɩ a, a na ɩ na ʋ vʋʋrɛ#3:12 Nyɛ̃ Lev 18.5, Ʋr 10.5..»
13A Kɩrɩta ya na ír tɩ bɛr a Naaŋmɩn wulu ŋmɛ-ƴãw pʋɔ, ʋl mɩŋa na lɩɛbɩ nɩ-ŋmɛ-ƴãwna a tɩ ƴãw a. Bʋ̃ʋ n'ʋ vɛ̃, a Sɛb-sõw yel'ɩ à ŋá: «Nɩr za na yawlɩ dàa zu a ɩ n nɩ-ŋmɛ-ƴãwna#3:13 Nyɛ̃ Wl-ayi 21.23..» 14À ŋá n'a a ɩ, k'aa maalʋ a Naaŋmɩn na yel k'ʋʋ na kʋ̀ n a Abraham a, mɩ̀ ta a nɩ-bʋʋr-yoru a Yeezu Kɩrɩta ƴãw, ɛ́ a sàw-deb zũú, tɩ za páw a Vʋʋrʋ a Naaŋmɩn na yel k'ʋʋ na tɩr'a a.
A Naaŋmɩn wulu nɩ a maalʋ a Naaŋmɩn na yel k'ʋʋ na tɩr'a a
15 Yɛbr i, ɩ̃ na de nɩ manʋ a nɩsaalbɛ ɩ-ɩrɩ pʋɔ: nɩr na maalɩ a ʋ kũu daar pʋ-tɩɛrʋ sɛbɛ mɛ̃ a lɛ a na tu sɔ́r a, nɩr kʋ̃ tʋ̃ɔ́ sãw a sɛbɛ ŋa bɛr bɩɩ ƴãw bom dɔwlɩ ɛ. 16Ɛcɛ, a Abraham nɩ a ʋ bʋ̃-dɔwra nɛbɛ a Naaŋmɩn tɩ ƴãw a ʋ maalʋ nɛ́ɛ kʋ̀. A Sɛb-sõw bɛ yel kɛ́ nɩ a ʋ bʋ̃-dɔwrɩ ɛ, mɛ̃ nɩ-yaga nɛbɛ bɛ yere a ɩ, ʋ yel'a kɛ́: «Nɩ a fʋ bʋ̃-dɔwra#3:16 Nyɛ̃ Yzt 12.7.», a wul kɛ́ nɩ-been yõ n'ʋ bɛ yere, a Kɩrɩta. 17À ŋá n'a ɩ̃ bɔbr k'ɩ̃ɩ yel: Naaŋmɩn tɩ de nɩ niwn maalɩ Wõ-taa ɛ́ yel k'ʋʋ na maal'a tɛr ʋ. A Naaŋmɩn wulu na wa wa yome kɔbr anaar dɔwlɩ lɩzɛr'ɩ pie (430) pùorí a kʋ̃ tʋ̃ɔ́ sãw a wõ-taa bɛr ɛ́ ír a maalʋ nʋɔr a Naaŋmɩn na ƴãw a bɛr ɛ. 18Ɛcɛ, a gbã-dɩ-bom páwfʋ wa yi a Naaŋmɩn wulu sàwfʋ zie a, a bɛ cãà ɩ nʋɔr Naaŋmɩn na ƴãw a zũú n'a ɩ, ɛcɛ nʋɔr Naaŋmɩn na ƴãw a zũú n'a ʋ kʋ̀ a ʋ maalʋ a Abraham.
19A na ɩ à ŋá a, a Naaŋmɩn wulu yel-ɩra tɩ n'ɩ bo? Bɛ ƴãw ʋ na dɔwlɩ k'ʋʋ tʋ̃ɔ́ mɩ́ wul a nʋɔr-zawrʋ ɩ-ɩrɩ a sãá, gùre nɩ a Abraham bʋ̃-dɔwra ʋl bɛ na ƴãw a maalʋ nʋɔr kʋ̀ a. Malkɩ mɩnɛ nɛbɛ tu lɔ̃lʋɔrɛ ƴãw a Wulu ŋa. 20Ɛcɛ lɔ̃lʋɔrɛ bɛ dãw lɔ̃ nɩ-been yele ɩ. Ɛ́ a yele càar'ɩ Naaŋmɩn yõ#3:20 Nyɛ̃ Wl-ayi 6.4..
A Naaŋmɩn wulu pɛr
21A pãa ɩ lɛ a Wulu diwr a maalʋ nɛ́ɛ a Naaŋmɩn na ƴãw a bɛrɛ bɩɩ? Lɛ bɛ n'a towtow ɛ! Alɛ tɩ ɩ mɛ̃ bɛ tɩr'ɩ wulu kãw na na kʋ̀ a nɩsaalbɛ a nyɔ-vʋʋrʋ a, wulu sàwfʋ pʋɔ sɩrɩ n'a a nɩsaal nãá mɩ́ ɩ nɩ-mɩŋa a Naaŋmɩn niŋé. 22Ɛcɛ a Sɛb-sõw yel a k'aa yel-bier fãw so nɩ a tẽ-daa za, k'aa maalʋ a Naaŋmɩn na yel k'ʋʋ na tɩr'a a, tʋ̃ɔ́ ta a bɛlɩ dem na sàw de a, bɛ na sàw de a Yeezu Kɩrɩta a zũú.
23A naaŋmɩn-sàw-deb na bɛ tɩ wa sɛr a, a Naaŋmɩn wulu tɩ tɛr tɩ nɩ a ʋ gaso pʋɔ gùre nɩ a naaŋmɩn-sàw-deb bɛ nãà wa wul ʋ sãá a. 24A na ɩ à ŋá a, a Naaŋmɩn wulu n'ʋ tɩ piwre tɩ, tɩ ta n a Kɩrɩta waa daar, kɛ́ tɩ ɩ nɩ-mɩn a Naaŋmɩn niŋé, a naaŋmɩn-sàw-deb ƴãw. 25Ɛcɛ a naaŋmɩn-sàw-deb na wa wa baar'a, a sob nɛ na tɩ piwre tɩ a bɛ cãà so tɩ ɛ.
26Bʋ̃ʋ n'ʋ vɛ̃, nyɩ za ɩ n Naaŋmɩn bibiir, a naaŋmɩn-sàw-deb na ɩ nyɩ lãw nɩ a Yeezu Kɩrɩta a ƴãw. 27Nyɩ za na sɩrɩ lãw nɩ a Kɩrɩta a suob deb pʋɔ a, nyɩ su n a Kɩrɩta. 28Nyɩ za lãw nɩ nɩ a Kɩrɩta ɩ nɩ-been. A na ɩ lɛ a, Zifʋ nɩ nɩ-bʋʋr-yoru yele bɛ cãà be ɩ, gbãgbaa nɩ nɩr na so ʋ tʋɔra a yele bɛ cãà be ɩ, dɛb nɩ pɔw yele bɛ cãà be ɩ. 29Ɛ́ a Kɩrɩta wa so nyɩ a, nyɩ ɩ n a Abraham bʋ̃-dɔwrɩ, ɛ́ nyɩ na páw nɩ a gbã-dɩ-bom a Naaŋmɩn na yel k'ʋʋ na tɩr'a a.
Đang chọn:
Galasi 3: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.