2 Korɛ̃tɩ 6
6
1Ɛ́ tɩ na lãw nɩ a Naaŋmɩn tone a, tɩ zɛlɛ nyɩ na kɛ́ nyɩ ta bɛr a ʋ maalʋ nyɩ na páw a lo tẽw wɛ ɩ. 2Bʋ̃ʋ n'ʋ vɛ̃, Naaŋmɩn yere na:
«A daar na wa ta a,
ɩ̃ sàw nɩ a fʋ zɛlʋ,
ɛ́ a faafʋ bibir na wa vɩɛ a,
ɩ̃ sõw fʋ na#6:2 Nyɛ̃ Ɩza 49.8..»
Ɛcɛ a daar'ɩ à ŋà na ta a, a faafʋ bibir'ɩ à ŋà na vɩɛ a.
3Tɩ bɛ bɔbr k'aa tɩ tõ-nʋɔr tɛr sãwna bɛ yere ɩ, alɛ so tɩ tone kɛ́ tɩ ta ɩ nɩr kãw za maalɩ yel-bier ɛ. 4Tɩ nɩ̃ɛ na bɔbr kɛ́ tɩ sɩrɩ sãá ɩ Naaŋmɩn tõ-tõ-biir a yele za pʋɔ: tɩ dɩrɛ nɩ kanyir yaga ɛ́ tɛr tʋɔra-nyɔwfʋ a kpɩɛrʋ pʋɔ, a fɛrʋ pʋɔ nɩ a pʋl-vʋ̃ɔ daar. 5Bɛ pɔb tɩ na, ɛ́ nyɔw tɩ ƴãw gaso pʋɔ. Bɛ dam'ɩ a zu-sɛbla ƴãw ʋ ìr a tɩ ƴãw, tɩ tõ na tɩ bàl, tɩ bɛ ũù mimir ɛ, tɩ bɛ dɩ bom ɛ. 6Tɩ bɔbr'a k'aa tɩ vɩɛlʋ nɩ a tɩ bãwfʋ, a tʋɔra-nyɔwfʋ nɩ a ɩ-vɩɛlɩ, a Vʋʋrʋ Sõw tome nɩ a nɔ̃wfʋ sɩza tɩ na nɔnɛ a nɩbɛ a, tɩ bɔbr'a k'aa wul a sãá kɛ́ tɩ ɩ n Naaŋmɩn tõ-tõ-biir. 7A yel-mɩŋa tɩ na kanɛ kʋ̀rɛ a nɩbɛ a pʋɔ n'a, nɩ a Naaŋmɩn fãw zũú n'a tɩ bɔbr kɛ́ tɩ wul kɛ́ tɩ ɩ n Naaŋmɩn tõ-tõ-biir. A mɩnʋ ɩ-ɩrɩ a Naaŋmɩn niŋé n'ɩ a zɛbr bome tɩ na tɛr zɛbr'ɩ, ɛ́ gùre nɩ tɩ tʋɔra a. 8Bɛ mɩ́ ƴãwnɛ tɩ na bɩɩ jewre tɩ, bɛ mɩ́ pore nɩ a tɩ yúor yo-vla bɩɩ pore a tɩ yúor yo-faa. Zir-ŋmarbɛ n'ɩ tɩ a nɩbɛ zie, zɩ̃ kɛ́ yel-mɩŋa n'a tɩ yere. 9Tɩ sãá na mɛ̃ nɩbɛ bɛ na bɛ bãw a, ɛ́ tɩ ɩ nɩbɛ bɛ na bãw vla a. Bɛ de tɩ na bʋɔlɛ na-kpi-bio mɩnɛ, ɛ́ tɩɩm n'ɩ bɛ ŋan vʋʋrɛ. Bɛ dɔwrɩ tɩ na, ɛ́ bɛ kʋ tɩ ɛ. 10Bɛ ƴãwnɛ tɩ nɩ pʋ-sãwna, ɛ́ nʋ̃ɔ̀ kpɩɛr tɩ bibie za. Tɩ ɩ n nan dem, ɛ́ ɩrɛ nɩ-yaga lɩɛbɛ na-mɩnɛ. Tɩɩm na tɛr bom za a, a sãá na mɛ̃ tɩ bɛ tɛr bom a.
11Korɛ̃tɩ tẽw dem i, tɩ dɔl'ɩ nʋɔr ƴɛ̀r a nyɩ zie nɩ tɩ pʋɔ za. 12Tɩ nɔ̃w nyɩ na nɩ a tɩ pʋɔ za, ɛcɛ nyɩmɛ nɛbɛ bɛ nɔ̃w tɩ nɩ a nyɩ pʋɔ za ɩ. 13Lɛ so ɩ̃ ƴɛ̀rɛ a nyɩ zie mɛ̃ a ɩ̃ bibiir zie a: «Nyɩ mɩ̀ nɔ̃w tɩ nɩ a nyɩ pʋɔ za.»
Nyɩ ɩ nyɩɩm nɩ a faalʋ bʋ́r taa
14Nyɩ ta ɩ nyɩɩm nɩ a naaŋmɩn-bɛ-sàw-dierbɛ lãw taa mɛ̃ ni-kʋ́ɔrɩ bɛ na caw taa nɩ dà-been a nyuru zu a ɩ. Ŋmɩŋmɩn za n'a a mɩnʋ nɩ a faalʋ na tʋ̃ɔ́ lãw taa? Ŋmɩŋmɩn za n'a cãà nɩ lige na tʋ̃ɔ́ lãw taa? 15Bʋ̃ʋ wõ-taa n'a na tʋ̃ɔ́ be a Kɩrɩta nɩ a Beliyaar#6:15 Beliyaar: Ebre ƴɛ̀r-bir'ʋ: a pɛr lɛ kɛ́: nɩr na bɛ tɛr pɛr a. A Gɩrɛkɩ kɔkɔr pʋɔ a, a pɛr'ɩ kɛ́: nɩr na bɛ tuur wulu kãw za a. A Sɩtaana ɩ-ɩrɩ n'a a ƴɛ̀r-bir ŋa manɛ à à ŋá, lɛ so a ƴɛ̀r-bir ŋa ɩ a Sɩtaana yúor kãw. cara pʋɔ? Bʋ̃ʋ n'a naaŋmɩn-sàw-diere nɩ naaŋmɩn-bɛ-sàw-diere na tʋ̃ɔ́ lãw? 16Bʋ̃ʋ wõ-taa n'a na tʋ̃ɔ́ be a Naaŋmɩn yir nɩ a tɩbɛ cara pʋɔ? Bʋ̃ʋ n'ʋ vɛ̃, tɩmɛ nɛbɛ ɩ a Naaŋmɩn na vʋʋrɛ a yir, mɛ̃ a lɛ a Naaŋmɩn tɔr za na yel a:
«Ɩ̃ na kpɩɛr'ɩ a bɛ pʋɔ, ɛ́ cere a bɛ sɔgɔ,
ɩ̃ na ɩ n a bɛ Naaŋmɩn, ɛ́ bɛ ɩ a ɩ̃ nɩ-bʋʋrɛ.»
17Alɛ so a Sore yere:
«Nyɩ yi zaa a nɩbɛ bɛ ŋa pʋɔ,
nyɩ taw zãá nɩ bɛ.
Nyɩ taa tʋɔr bom za na tɛr dɛwr a ɩ,
ɩ̃ɩ na de nyɩ na.
18Ɩ̃ na ɩ n sãà a nyɩ zie,
ɛ́ nyɩ ɩ bidɛbr nɩ pɔwyaar a ɩ̃ zie,
a Sore kpɛnʋ-za-sob'ʋ yel#6:18 A kan-nɛ́ɛ 16 tɩ tɔ a 18 ƴãw a, nyɛ̃ Lev 26.12, Ezek 37.27, Ɩza 52.11, Zer 31.9, 2Sa 7.14, Oze 2.1..»
Đang chọn:
2 Korɛ̃tɩ 6: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.