2 Korɛ̃tɩ 5
5
1Tɩ bãwnɩ a na, a pɛn-sɛw ʋl pʋɔ tɩ na be kpɩɛr a (a pɛr lɛ k'aa tɩ tẽw zu ka ƴã-gan) ʋlɛ wa sãw a, Naaŋmɩn cɔbrɛ nɩ kpɛb zie bɛrɛ tɩ a tẽ-vla pʋɔ, kpɛb zie na bɛ ɩ nɩsaal nuru bʋ̃-maala, ɛ́ be kʋralɛ a. 2Ɛ́ tɩ kone na bɔbr'ɩ tuotuo kɛ́ tɩ ta a tẽ-vla pʋɔ kpɛb zie, a ɩ mɛ̃ kparʋ tɩ na su dɔwlɩ a tẽw zu ka kpɛb zie zu a. 3Bʋ̃ʋ n'ʋ vɛ̃, tɩ na su n bom, tɩ kʋ̃ ɩ ƴã-gã-zawla ɩ. 4Sɩza n'a, a tɩɩm na be a pɛn-sɛw ŋa pʋɔ a, tɩ kone na mɛ̃ nɩbɛ na tuo tuor ìre nɩ guur a. Tɩ bɛ bɔbr kɛ́ tɩ yaa a tẽw zu ka kpɛb zie bɛr ɛ, tɩ bɔbr'a kɛ́ tɩ su a tẽ-vla pʋɔ dem dɔwlɩ, k'aa nyɔ-vʋʋrʋ vɔl a ʋlɩ bom nɛ na ɩ bʋ̃-kpiira. 5A sob nɛ na cɔbrɩ tɩ à á ŋá ƴãw a, ʋlɛ n'ɩ a Naaŋmɩn na kʋ̀ tɩ a Vʋʋrʋ Sõw, ʋ ɩ a maalʋ tɩ nãà páw a bãwfʋ a.
6A na ɩ à ŋá a, bʋnʋ kãw za bɛ ka a tɩ zie towtow ɛ, tɩ bãwnɩ a na, lɛn daar za tɩ na kpɩɛr a ƴã-gan ŋa pʋɔ a, tɩ yi na zaa a tɩ kpɛb zie zãá nɩ a Sore. 7Bʋ̃ʋ n'ʋ vɛ̃, naaŋmɩn-sàw-deb'a so tɩ cere, nyɛ́b bɛ n'a so ɩ. 8Bʋnʋ kãw za bɛ ka a tɩ zie ɩ, ɛ́ tɩ nyɛ̃ a sa kɛ́ tɩ yi ɛ́ bɛr a ƴã-gan ŋa, ɛ́ cen tɩ be a Sore zie. 9Ɛcɛ bom nɛ tɩ na bɔbr zuo a za a n'ɩ kɛ́ tɩ pɛlɩ a ʋ pʋɔ, tɩmɛ saa na be a ƴã-gan ŋa pʋɔ bɩɩ yi kɛ́ bɛr ʋ a. 10Bʋ̃ʋ n'ʋ vɛ̃, a fɛr'a kɛ́ tɩ za cen a Kɩrɩta ƴɛ̀rʋ-maalʋ zie ʋ tɩ maal'ɩ tɩ a ƴɛ̀rʋ. Lɛn daar'a ŋa za na páw bom nɛ na sɛw taa nɩ ʋ a, a vla bɩɩ a faa, a tu a lɛ ʋ na vʋʋrɩ a tẽw zu a.
A Kɩrɩta ɩ na tɩɩm nɩ a Naaŋmɩn lɛb kpɛ taa
11A na ɩ à ŋá tɩ bãw ʋlɩ bom nɛ na n'ɩ a zɔrɛ-a-Sore a, tɩ bɔbr'a kɛ́ tɩ ɩ a nɩsaalbɛ za sàw kɛ́ sɩza n'a. Naaŋmɩn bãw tɩ na tɩ tɔ, ɩ̃ɩ tɩɛr kɛ́ nyɩ mɩ̀ bãw mɛ̃ na nɩ a nyɩ pʋɔ tɩ tɔ. 12Tɩ bɛ lɛb maal tĩ wule nyɩ tɩ na ɩ nɩ-vɩɛlɩ a ɩ, tɩ bɔbr'a kɛ́ tɩ ɩ nyɩ nyʋʋr a tɩ ƴãw, kɛ́ nyɩ tʋ̃ɔ́ mɩ́ tɛr sɔwfʋ sɔw kʋ̀ a bɛlɩ dem na nyʋʋr ɩ-ɩrɩ na sãá a ƴãw, ɛ́ bɛ nyʋʋr a socir pʋɔ ɩ-ɩrɩ ƴãw a ɩ. 13Tɩmɛ wa ɩ dãbol-ɩb a, Naaŋmɩn ƴãw n'a tɩ ɩ a dãbol-ɩb, ɛcɛ tɩmɛ wa ɩ yã-bãw-ɩb a, nyɩɩm ƴãw n'a. 14Bʋ̃ʋ n'ʋ vɛ̃, a Kɩrɩta nɔ̃wfʋ fɩɩrɩ tɩ na tɛr, tɩɩm na bãw kɛ́ nɩ-been yõ kpi n a nɩbɛ za ƴãw a, ɛ́ k'aa na ɩ lɛ a, bɛ za lãw nɩ ʋ na kpi a. 15Ʋʋ kpi n a bɛ za ƴãw, k'aa nɩ-vʋʋrɩ ta cãà vʋʋrɛ bɛl mɩŋa ƴãw ɛ, ɛ́ vʋʋrɛ a ʋlɩ sob nɛ ƴãw na kpi ɛ́ lɛb yi a bɛ ƴãw a.
16Lɛ n'a so tɩ bɛ cãà bãw nɩr za nɩsaalʋ bãwfʋ tɛwr ɛ. Tɩmɛ saa tɩ dãw bãw a Kɩrɩta nɩsaalʋ bãwfʋ a, ƴɛrɛŋa a, tɩ bɛ cãà bãw ʋ a lɛ ɩ. 17Lɛ so nɩr wa lãw nɩ a Kɩrɩta a, ʋ lɩɛb'ɩ nɩ-paala. Bʋ̃-kʋra tɔl'a, ɛ́ bʋ̃-paala n'ʋ be be. 18Naaŋmɩn zie n'a a za yi, ʋl na ɩ tɩɩm nɩ ʋl lɛb kpɛ taa a Kɩrɩta ƴãw, ʋʋ de ʋlɛ nɩ a nɩbɛ lɛb-kpɛ-taa tõ-nʋɔr kʋ̀ tɩ a. 19Bʋ̃ʋ n'ʋ vɛ̃, a Kɩrɩta zũú, a Naaŋmɩn n'ʋ tone kɛ́ ʋlɛ nɩ a nɩsaalbɛ za lɛb kpɛ taa, lɛ so ʋ mɩ́ tɩ de a bɛ sãwna bɛr a baarɩ, ɛ́ ƴãw a lɛb-kpɛ-taa ƴɛ̀r-bie a tɩ nʋɔrɩ́.
20A na ɩ à ŋá a, a Kɩrɩta n'ʋ tõ n tɩ a tõ-nʋɔr ŋa a nyɩ zie, ɛ́ a ɩ mɛ̃ a Naaŋmɩn mɩŋa n'ʋ yere kʋ̀rɛ nyɩ nɩ a tɩ nʋɔr a: tɩ zɛlɛ nyɩ nɩ yãayãa, a Kɩrɩta yúor ƴãw, nyɩ sàw kɛ̀ nyɩɩm nɩ a Naaŋmɩn lɛb kpɛ taa. 21A Kɩrɩta bɛ tɩ tɛr yel-bier ɛ, ɛ́ a Naaŋmɩn tuo ʋ a tɩ yel-bier, kɛ́ tɩ tʋ̃ɔ́ lãw nɩ ʋ lɩɛbɩ nɩ-mɩn a Naaŋmɩn niŋé.
Đang chọn:
2 Korɛ̃tɩ 5: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.