1 Korɛ̃tɩ 8
8
A tɩbɛ bàwr-nɛnɛ yele
1Ɛ́ a nɛnɛ al bɛ na mɩ́ kʋ ƴãw a tɩbɛ ƴãw a, «tɩ za tɛr'ɩ a yele bãwfʋ», mɛ̃ a lɛ nyɩ na mɩ́ yel a. Ɛcɛ a yele bãwfʋ mɩ́ ɩ n a nɩsaal zɛwr ʋ tʋɔra, ɛ́ nɔ̃wfʋ mɩ́ ɩ a Lãw-yir ʋ kɛrɛ dɔwlɛ. 2Nɩr wa tɩɛrɛ k'ʋʋ bãw nɩ bom kãw a, ʋ cãà bɛ bãw mɛ̃ a lɛ a na sɛw k'ʋʋ bãw a ɩ. 3Ɛcɛ nɩr wa nɔnɛ Naaŋmɩn a, a Naaŋmɩn mɩ́ bãw ʋ na.
4Ɛ́ a nɛnɛ al bɛ na mɩ́ kʋ ƴãw a tɩbɛ ƴãw a 'wɔbrʋ ƴãw a, tɩ bãwnɩ a na kɛ́ tɩɩb kãw za bɛ ɩ bʋ̃-sɩza ɩ, ɛ́ ŋmɩn kãw za bɛ be a tẽ-daa zu a bɛ ɩ a Naaŋmɩn-been yõ ɩ.
5Ŋmɩn-yaga na saa be a salom zu bɩɩ a tẽw zu bɛ bʋɔlɛ ŋmɩmɛ a — ɛ́ ŋmɩn-yaga nɩ sorbɛ yaga sɩrɩ na be be — 6tɩɩm zie a, Naaŋmɩn-been yõ n'ʋ be, a Naaŋmɩn Sãà na ír bom za ɛ́ tɩ vʋʋrɛ a ʋ ƴãw a, nɩ Sore been yõ, Yeezu Kɩrɩta, na so bom za be ɛ́ so tɩ vʋʋrɛ a.
7Ɛcɛ nɩbɛ za bɛ nɛbɛ tɛr a yele bãwfʋ ŋa ɩ. Bɛ mɩnɛ na mili nɩ a tɩbɛ a, 'wɔbr'ɩ a tɩbɛ bàwr-nɛnɛ mɛ̃ a tɩbɛ sɩrɩ so a a. A bɛ tɩɛrʋ bɛ kpɛmɛ ɩ, lɛ so bɛ mɩ́ nyɛ̃ a nɛn ŋa wa n dɛwr a bɛ zie. 8Bʋ̃-dɩra bɛ n'ʋ na taw tɩ pɩɛl'ɩ a Naaŋmɩn ɛ. Tɩmɛ bɛ wa dɩ a, a kʋ̃ ɩ tɩ bom za ɩ, ɛ́ tɩmɛ saa wa dɩ a, tɩ kʋ̃ páw bom za dɔwlɩ ɛ.
9Ɛcɛ nyɩ gù vla k'aa nyɩ só-nyɩ-tʋɔra taa ɩrɛ a bãbàalbɛ bɛ lore ɩ. 10Bʋ̃ʋ n'ʋ vɛ̃, nɩr wa nyɛ̃ a fʋ̃ʋ na bãw a, fʋ zɩ̃ a tɩbɛ yir pʋɔ dɩrɛ a, mɛ̃ ʋ taa mɩ̀ na bɔbr a tɩbɛ bàwr-nɛnɛ 'wɔbrʋ, ʋl a tɩɛrʋ na bɛ kpɛmɛ a? 11Ɛ́ a fʋ̃ʋ na bãw a zũú, a bãbàal na kpi na, a yɛb ŋa ƴãw a Kɩrɩta na kpi a. 12Nyɩmɛ wa sãwnɛ a nyɩ yɛbr à ŋá a, ɛ́ sãwnɛ a bɛ tɩɛrʋ na bɛ kpɛmɛ a, Kɩrɩta n'ʋ nyɩ sãwnɛ. 13Lɛ so, bʋ̃-dɩra na na ɩ a ɩ̃ yɛb lo a sãwna pʋɔ a, ɩ̃ na ciir'ɩ a nɛn kʋralɛ, k'ɩ̃ɩ taa ɩrɛ a ɩ̃ yɛb lore sãwna pʋɔ ɩ.
Đang chọn:
1 Korɛ̃tɩ 8: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.