Markɩ Sɛbɛ 6
6
A NAJARƐTƖ-TẼ-DEME SU-KPƐ̃W A JEEJU ƖNƐ
(Mat 13.53-58, Lu 4.16-30)
1A *Jeeju yi na a jie ʋlɔ ɩ̃ na ʋ cen a tẽw ʋlɔ pʋɔ ʋ na nʋ̃ɔ, a ʋ *par-tuurbe bɩɛl ʋ cenʼɩ̃. 2A *bibi-ciiraa dayen ʋ kpɛ na a ba *puorfʋ yir ɩ̃ nyɔw ɩ̃ jaana a nɩbɛ a Naaŋmɩn ƴɛrɩ̃. A nɩ-yaw bala na wõ a ʋ jaanfʋ ha na nɔɛ ɩ̃ yele:
“Nyɩnɛ tɔr ʋ yi nɩ a tɩɛrɩ̃sɩ na? Yɛ̃ buor bʋrɔ nɩ a naa ʋ na tɛrɛ? Ɩ̃ mɩnɛ ʋ ɩ ɩ̃ tʋɔ a nɔ-kofʋ tʋmɔ a lɛ? 3Má a dafɔɔrɔ ʋ! Ɩ̃ aa ɩ a Maarɩɩ bi-daba ʋ wa? Má a Jakɩ nɩ a Jojɛsɩ nɩ a Judi nɩ a Sɩmɔ̃ yɛ-kpɛ̃ɛ ʋ. Ɩ̃ a ʋ yɛ-pɔɔbɔ, má a ka sɩ lãa be taa!” Ɩ̃ a ʋ maal-bie cɛ ba na a ba jɛ ʋ bar. 4Ɩ̃ a Jeeju yel ba:
“A jiir a jaa ba ma ƴɔnɔ na a Naaŋmɩn ƴɛr-hiere, ɩ̃-cɛ a ʋ mɩ̃ɛ tẽw, nɩ a ʋ nɩbɛ nɩ a ʋ yir deme sɔ̃w tɛw ba maa ƴɔ̃w ʋ wa.”
5ꞌWaa tʋɔ maal nɔ-kofʋ tʋn a be, ɩ̃ a ala ma ɩ a baalsɩ ŋmɛɛ tɛw ʋ na dɔɔl a nuu a ba kpɛmɛ ʋ wa. 6Ɩ̃ a nʋɔr ko ʋ a ba su-kpɛn ɩnɛ.
A JEEJU NA TƲ̃ A Ʋ PAR-TUURBE AYI-YI
(Mat 10.5-15, Lu 9.1-6)
A ala ɩ̃ baar, a *Jeeju yɔ na cʋb a ten ala na viirĩ kolĩ, na ʋ jaana a nɩbɛ, 7ɩ̃ na ʋ bʋɔl a ʋ *par-tuurbe pie-nʼayi tʋnɔ ba ayi-yi ɩ̃ kʋ ba a tʋɔfʋ a ba na diw nɩ a kɔ̃tɔnsɩ. 8Ɩ̃ ʋ man ba na a ba taa tɛrɛɛ bom diere nɩ a sɔr wa, a ala ɩ̃ ɩ a dɩb ʋ, mɩɩ a wʋɔ mɩ, a ba taa mɩ tɛrɛɛ libie a ba ɩ̃ganɩ̃ wa, ɩ̃ ba tɛrɛ daa tɛw, 9ɩ̃ lɛ yel ba:
“Nyɩ́ su nafaba, ɩ̃ nyɩ taa su fu-bɛrɛ ayi wa.” 10Ʋ lɛ yel ba na:
“A yir lɛ pʋɔ nyɩ nɔɔ kpɛ, nyɩ́ jɛ a be wa ta nɩ a mɩnɛ nyɩ na yire a tẽw ʋlɔ pʋɔ. 11Ɩ̃-cɛ a jie lɛ a nɩbɛ na ma sɔw de nyɩ ɩ̃ cɛl a nyɩ ƴɛrɩ̃ wa, nyɩ́ yi a be ɩ̃ tɛb a nyɩ gbɛɛ tãbuulĩ#6.11 Gbɛɛ tãbuulĩ tɛb barfʋ: Nyɩ́ ꞌwuor Mat 10.14. bar, a ɩ bõ-miilaa a ba jie.”
12Ba cenʼã na hiere yele a nɩbɛ a ba lɩɛb a ba yɛ̃. 13Ba diw na kɔ̃tɔn yaw bar, ɩ̃ na ba bol a kãa a baalsɩ yaw a ba kpɛmɛ.
A JÃ-BATII KŨU
(Mat 14.1-12, Lu 9.7-9)
14A jamana *Ɛrɔdɩ dãa na wõ a ba ƴɛr a *Jeeju ƴɛrɩ̃ a-na-ɩ a ʋ yuor yire na a jiir a jaa, ɩ̃ na ʋ yel:
“A Jã-Batii irʼã a kũu pʋɔ. Ala ɩnɛ ʋ tɛrɛ a tʋɔfʋ maala nɩ a nɔ-kofʋ tʋmɔ.” 15Ɩ̃ a nɩŋmɛɛ yele na:
“A Eli ʋ,” ɩ̃ a ŋmɛɛ go á ƴɛr-hiere kãw ʋ, na wɔ̃ a korĩ-cɛ ƴɛr-hierbe kaarɩ̃. 16Ɩ̃-cɛ, a mɩnɛ a Ɛrɔdɩ na wõ a lɛ, ʋ yelʼã:
“A Jã ʋlɔ ɩ̃ na ɩ a ba ŋmaa a juu, ʋlɔ ɩ̃ ir a kũu pʋɔ.”
17-18A-na-ɩ a Ɛrɔdɩ dãa na de a ʋ yɛbɛ Fɩlɩpɩ pɔw Ɛrɔdɩya kul, a Jã ma yele ʋ á ꞌwaa tɛrɛ sɔr na de a ʋ yɛbɛ pɔw wa. Ala-ɩ̃-sɔ a Ɛrɔdɩ dãa ɩ a ba nyɔw a Jã lũ ƴɔ̃w a kasu pʋɔ. 19A Ɛrɔdɩya dãa na tɛrɛ nɩ a Jã suur, ɩ̃ bʋɔrɔ ʋ kú ʋ ɩ̃ ma nyɛ sɔr wa, 20a-na-ɩ a Ɛrɔdɩ jɔrɔ na a Jã, ʋ na bɔ̃w ʋ ɩ nɩ-dẽdẽ nɩ nɩ-son. Ʋ maa sɔw a Jã ɩnɛ wa, ɩ̃ a ʋlɔ wa cɛl a Jã ƴɛrɩ̃, a ma dɩrɛ ʋ na a suur, ɩ̃ a ma cãa na nʋmɔ ʋ a ʋ cɛlfʋ.
21Bibir vɩlaa kãw wa yi na a Ɛrɔdɩya. A Ɛrɔdɩ dɔwfʋ yuon ta na, ʋ maal fɛtɩ kpɛ̃ɛ ɩ̃ bʋɔl a ʋ tʋ̃tʋ̃-nɩ-bɛrɛ nɩ a ʋ sɔdaal-bɛrɛ nɩ a Galile-tẽw nɩ-bɛrɛ. 22A Ɛrɔdɩya bi-pɔw kpɛ na a fɛtɩ jie ɩ̃ sɛ a bɩnɛ, a nʋ̃ɔ nyɔw a Ɛrɔdɩ nɩ a ʋ lãa-dɩrbɛ, ʋ yel a poole:
“Sʋɔr ma a bom lɛ fʋ na bʋɔrɔ, ɩ̃ ɩ̃ na kʋ fʋ na,” 23ɩ̃ lɛ pɔ yelʼɩ̃:
“A bom lɛ fʋ na sʋɔrɔ ma, ɩ̃ na kʋ fʋ na, a ala saarɩ̃ ɩ a ɩ̃ tẽw lõboor gãw ʋ.” 24A poole yi soor a ʋ mã:
“Bõ ɩ̃ na sʋɔr?” A ʋ mã yel ʋ:
“Sʋɔr a Jã-Batii juu!” 25Ʋ pɔw na fɔfɔw cen a jamana jie na yel ʋ:
“Ɩ̃ bʋɔrɔ na fʋ ŋmaa a Jã-Batii juu a jie naan dɔɔl lagbaal juu kʋ ma”, 26a ni-sɔbaa kpɛ a jamana, ɩ̃-cɛ a-na-ɩ ʋ faa na pɔ a ʋ lãa-dɩrbɛ nii-sɔw, ꞌwaa tʋɔrɔ jaara wa. 27Ʋ tʋ̃ na a ʋ sɔdaalaa kãw a jie naan, ɩ̃ yel ʋ á ʋ wa nɩ a Jã-Batii juu, a sɔdaalaa cen na ŋmaa a Jã juu a kasu pʋɔ 28dɔɔl a lagbaal juu wa nɩ kʋ a poole, a poole ɩraa ɩ̃ de kʋ a ʋ mã. 29A Jã *par-tuurbe wõ na a lɛ, ɩ̃ cen na de a kũu ũu.
A DABSƖ TURE ANUU NA ꞌWƆB A BURU ANUU
(Mat 14.13-21, Lu 9.10-17, Jã 6.1-14)
30A *nɩ-tʋnɩsɩ lɛ lɩɛbʼã wa tiw taa a *Jeeju sɛ̃ na man ʋ a ala a jaa ba na maal, nɩ a ala a jaa ba na jaan a nɩbɛ. 31A sɔ-tɔlbɔ waa na vara vara taa a jie ba na be a baa dãa mɩ nyɛ nĩe na dɩ bõ-dɩraa wa. A Jeeju yel ba:
“Nyɩ́ wa a sɩ yi cɛ̃cɛ̃w a wɛkar pʋɔ sɩ tɛw a nyɩ pɩɛn fɩ̃ɩ.”
32A lɛ, ba kpɛ na a gbor pʋɔ, bala ba tɛw, yire a cɛ̃cɛ̃w a wɛkar pʋɔ. 33A mɩnɛ ba na cere, nɩ-yaw nyɛ ba na bɔ̃w ba, ɩ̃ na ba yi a ten a jaa pʋɔ ɩ̃ jɔ nɩ gbɛɛ de ba nĩe cen na gure ba a jie ʋlɔ ba na cere.
34A mɩnɛ a Jeeju na yi a gbor pʋɔ, nyɛ a nɩ-yaw a lɛ, nãw nyɔw ʋ na a ba ɩnɛ a-na-ɩ ba wɔ̃ na taa nɩ piir na ma tɛrɛ dɔ-cɩɩnaa wa, ʋ nyɔw ɩ̃ jaana ba yel-yayaw. 35A mɩnɛ a mɔ̃tɔ̃w na mʋrɔ, a Jeeju *par-tuurbe taw na ta ʋ ɩ̃ yel ʋ:
“A jie na ɩ na wɛkar ɩ̃ a mɔtɔ̃w mʋrɔ. 36Wɛl a nɩbɛ bar a ba cen a ten ala pʋɔ na pɩɛlʼɩ̃ a ka da a bõ-dɩraa.” 37A Jeeju yel ba:
“A nyɩmɩ mɩ̃ɛ, nyɩ́ kʋ ba a dɩb a ba dɩ.” Ɩ̃ a ba yel ʋ:
“Mɩnɛ! A dɩb dafʋ na ta na ture lɩjaayi. Fʋ bʋɔrɔ na sɩ de a libi-kpɛ̃ɛ a lɛ cen na da nɩ a buru wa nɩ kʋ ba mɩɩ?” 38A lɛ, a Jeeju yel ba:
“Nyɩ́ cen na ꞌwuor je kãa: bur-bie amɩnɛ nyɩ tɛrɛ?” A ba cen na ꞌwuor ɩ̃ yel ʋ:
“Bur-bie anuu sɩ tɛrɛ, nɩ jɩm-bie ayi.”
39A Jeeju ƴɔ̃w na a ʋ par-tuurbe a ba maal a nɩbɛ ba jaa a ba jɛ ji-gbulĩsɩ ji-gbulĩsɩ a mɔ-ɓaar juu, 40a ba jɛ cʋr taa ŋmɛɛ ji-gbulĩsɩ kɔɔr-kɔɔr, ŋmɛɛ ji-gbulĩsɩ lɩjaayi nɩ piir-piir. 41A ala ɩ̃ baar, a Jeeju de na a bur-bie anuu nɩ a jɩm-bie ayi ɩ̃ dʋɔ ꞌwuor a saꞌlon puor a Naaŋmɩn, ɩ̃ nyɔw a buru ŋma ŋma kʋ a ʋ par-tuurbe a ba de po a nɩbɛ. A lɛ ʋ mɩ ɩ a ba de a jɩm-bie ayi po a nɩbɛ ba jaa. 42Ɩ̃ ba ꞌwɔbʼã sɛw ba jaa 43ɩ̃ a ʋ par-tuurbe wob a bur-ŋmara nɩ a jɩm-ŋmara ala na cɛ sɛw pɩɩr pie-nʼayi. 44A bala na dãa ꞌwɔb a buru ɩ na dabsɩ ture anuu.
A JEEJU CERE NA A KƲ̃Ɔ JUU
(Mat 14.22-33, Jã 6.15-21)
45A mɩnɛ a ala na yi tɔ, a *Jeeju ɩ na a ʋ *par-tuurbe a ba kpɛ a gbor pʋɔ a jie naan, na ba de ʋ nĩe gãwna a man gbẽgbere nʋɔr ʋlɔ na be a Bɛsada loor, ɩ̃ a ʋlɔ mɩ̃ɛ ɩraa wɛlɛ a nɩbɛ bara. 46A lɛ ʋ na wɛl ba bar baar, ʋ do na a tãw juu a Naaŋmɩn sʋɔrfʋ. 47A mɩnɛ a wɩɛr na liwre, a gbor dãa na be a man sɔɔlɩ̃sɔw, ɩ̃ cɛ a Jeeju bar a ʋ yẽ be a tene. 48Ʋ nyɛ na a ʋ par-tuurbe a ba mɔnɔ a gbor hana nɩ, a-na-ɩ a sɛsɛb dãa na gbãga tuoro ba. A nɔdɛɛ kuon daar, ʋ be na a kʋ̃ɔ juu cere a ba sɛ̃, nɩ a gbɛɛ, ɩ̃ dãa tɩɛr wɔ̃ ʋ vɩɛ ba bar. 49A mɩnɛ ba na nyɛ ʋ, ʋ cere a kʋ̃ɔ juu a lɛ, ba tɩɛrʼã beeka kpɩɩn ʋ, ɩ̃ wuure, 50a-na-ɩ ba jaa dãa na nyɛ ʋ, ɩ̃ a ɩ ba ni-sɔbaa. A jie naan, a Jeeju bʋ nɩ ba na yel ba:
“Nyɩ́ bar tɩɛrʋ̃, maa ʋ. Nyɩ taa ɩ a dãbɩ̃ɛ nyɔw nyɩ wa!” 51Ɩ̃ cen na kpɛ a ba sɛ̃ a gbor pʋɔ, a sɛsɛb ŋmaa. A nyãa nyɩl ba a ba ha nɔɛ, 52a-na-ɩ baa dãa bɔ̃w a buru ala ƴɛrɩ̃ par wa, a yi a ba sube kpɛmɛfʋ jie.
A JENEJARƐ WƲLƖ̃SƖ DEME A JEEJU NA KPAAR
(Mat 14.34-36)
53A lɛ ba na gãw a man baar, ba cenʼã na ta ɩraa nɩ a gbor a Jenejarɛ wɩɛr, 54ɩ̃ a mɩnɛ ba na yi a gbor pʋɔ, a nɩbɛ nyɛ na a *Jeeju bɔ̃w ʋ a jie naan, 55ɩ̃ na ba jɔ cʋb a ʋna wɩɛrʼãa ʋ jaa, ɩ̃ nyɔw ɩ̃ tuoro a baalsɩ nɩ a gan cere nɩ a jiir a jaa ba na yel a be a Jeeju be. 56Ɩ̃ a jie lɛ ʋ na wa ta, mɩɩ a tẽ-bil pʋʋr, mɩɩ a tẽ-bɛrɛ pʋʋr, mɩɩ a va-pɔrsɩ pʋʋr, a nɩbɛ ma wɩ nɩ na a baalsɩ gaal a dar pʋʋr, ɩ̃ ma sʋɔr ʋ a ʋ kʋ ba sɔr a ba sɩɩr a ʋ cẽcen nʋɔr tɛw, ɩ̃ a bala ba jaa na sɩɩr ʋ, ba kpaarʼã.
Đang chọn:
Markɩ Sɛbɛ 6: BNT93
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
