Matie Sɛbɛ 27
27
A JEEJU BA NA CENʼƖ̃ A PƖLATƖ SƐ̃
(Mar 15.1, Lu 23.1-2, Jã 18.28-32)
1A dʋ̃ꞌwʋlɩ̃ ɓaaraa a Jufisɩ *baar-lo-nɩ-bɛrɛ nɩ a ba ni-dierbe guorʼã taa a *Jeeju kʋfʋ, 2ɩ̃ ƴɔ̃w a ba lũ ʋ, taw cenʼɩ̃ kʋ a jamana *Pɩlatɩ.
A JUDASƖ KŨU
(Ntt 1.18-19)
3A mɩnɛ a Judasɩ ʋlɔ na de a *Jeeju a juu, na nyɛ a ɩ ba na kú na a Jeeju, a dama ʋ na, ʋ de a libi-kure lɩjɛrʼɩ̃-pie ala, lɩɛb cenʼɩ̃ na kʋrɔ a *baar-lo-nɩ-bɛrɛ nɩ a ni-dierbe 4yele nɩ:
“Ɩ̃ maalʼã fãa a mɩnɛ ɩ̃ na de a nɩ-cɛcɛ a juu a ba na kú ʋ.” A ba yel ʋ:
“Aa bá sɩ wa. A fʋ jie a be.” 5A Judasɩ de a libie lɔb bar a be a Naaŋmɩn puor-yir kpɛ̃ɛ, ɩ̃ yi cen na yaal miir kpi. 6A baar-lo-nɩ-bɛrɛ woor a libie ɩ̃ yel:
“A sɩ ƴɛr-kpɛn ma kʋ sɩ sɔr a sɩ na ƴɔ̃w a libie asɩmɛ a Naaŋmɩn puor-yir kpɛ̃ɛ libie pʋɔ wa, a-na-ɩ kũu libie ʋ.”
7A mɩnɛ ba na guor taa baar, ba da na lakpo-mɩɛrɛ puo nɩ a ana libie, ʋ ɩ sáanba ũufʋ jie. 8Ala-ɩ̃-sɔ a ba bʋɔlɔ a ʋna puo wa ta nɩ a dɩnaa, á “Jɩ̃ɩ puo.” 9Nɔhɔ̃ a wɔ̃ a mɩnɛ a Naaŋmɩn ƴɛr-hiere Jeremi na dãa yel:
“Ba de na a libie ala a *Ɩsɩrayɛl nɩbɛ
na dãa man taa a ʋ yafʋ ɩnɛ,
a libi-kure lɩjɛrʼɩ̃-pie ala,
10da nɩ a lakpo-mɩɛrɛ puo,
tu nɩ a mɩnɛ a Nɩ-kpɛ̃ɛ na dãa man ma.”
A PƖLATƖ NA SOORO A JEEJU
(Mar 15.2-5, Lu 23.3-5, Jã 18.33-38)
11A *Jeeju ɩraa na a *Pɩlatɩ nii-sɔw, ʋ sooro ʋ:
“Fʋ̃ʋ ɩ a Jufisɩ jamana mɩɩ?” A Jeeju yel:
“A mɩnɛ fʋ na yel, a lɛ ʋ.” 12Ɩ̃ a mɩnɛ a Jufisɩ *baar-lo-nɩ-bɛrɛ nɩ a ni-dierbe na ɩraa mana a ʋ maal-bebe, ꞌwaa yel bom wa. 13A Pɩlatɩ yel ʋ:
“Faa wonaa a fʋ maal-bebe ba na mana wa?” 14Ɩ̃-cɛ ꞌwaa mɩ haa nʋɔr cɔw ʋ wa, a nʋɔr ko a jamana.
A JEEJU BA NA ƳƆ̃W A KŨU ƳƐRƖ̃
(Mar 15.6-15, Lu 23.13-25, Jã 18.39—19.16)
15A yomo a jaa, a *Pakɩ fɛtɩ daar, a jamana ma irʼã a kasu nɩrɛ ʋlɔ a nɩbɛ na bʋɔrɔ bar. 16Ɩ̃ a lɛdaar, kasu nɩrɛ kãw dãa na be be ɩ̃ dɩ a Barabasɩ ba na nyɩrɩ̃ bɔ̃w. 17A be jie a *Pɩlatɩ soor a nɩbɛ na duo:
“Ala nyɩ bʋɔrɔ ɩ̃ bar kʋ nyɩ? A Barabasɩ ʋ, mɩɩ a *Jeeju ʋlɔ ba na bʋɔlɔ a *Kirisi ʋ?” 18A-na-ɩ a Pɩlatɩ bɔ̃w na áa ba nyuur ɩ̃ saa a ba nyɔw a Jeeju wɩ nɩ kʋ ʋ.
19A lɛ a Pɩlatɩ na cãa jɛ a ƴɛrɩ̃ guorfʋ dakɔw juu, a ʋ pɔw tʋ̃ na yel ʋ:
“Taa wa maala a ʋna nɩ-cɛcɛ bom wa, a-na-ɩ a tɩsɔw, ɩ̃ nyɛ na nãw a jãasʋlɩ̃ pʋɔ a ʋ ɩnɛ.”
20Ɩ̃ cɛ a *baar-lo-nɩ-bɛrɛ nɩ a ni-dierbe kpãa na a nɩbɛ a ba sʋɔr a ba bar a Barabasɩ, ɩ̃ kú a Jeeju. 21A Pɩlatɩ lɛ soor ba:
“Buor nyɩ bʋɔrɔ ɩ̃ bar a basɩmɛ ayi pʋɔ?” A ba yel, áa Barabasɩ. 22A Pɩlatɩ lɛ soor ba go:
“Ɩ̃ bõ ɩ̃ na maalʼɩ̃ a Jeeju ba na bʋɔlɔ a Kirisi?” A ba jaa yel:
“Kpa ʋ a nɩ-kʋ-daa juu!” 23Ʋ lɛ bɔ̃w soor:
“Bõ ɩnɛ? Bõ fãa ʋ maal?” Ɩ̃-cɛ ba lɛ nyɩrɩ̃ na wuure nɩ kpɛ̃w yele nɩ:
“Kpa ʋ a nɩ-kʋ-daa juu!”
24A mɩnɛ a Pɩlatɩ na nyɛ bɔ̃w ka ꞌwaa tʋɔrɔ maala bom wa, ɩ̃ a mɩnɛ a tẽw na mɩ nyɔw ɩ̃ dama, ʋ ꞌwɔ̃w na a kʋ̃ɔ pɛw a nur a nɩbɛ nii-sɔw ɩ̃ yel:
“Maa be tɔ a daba na kʋfʋ ɩnɛ wa. Nyɩ jie a be.” 25A nɩbɛ ba jaa yel ʋ:
“A ʋ kũu ƴɛrɩ̃, á mar sɩ, sɩmɩ nɩ a sɩ bibiir.”
26A Pɩlatɩ irʼã a Barabasɩ a kasu pʋɔ bar a ba ɩnɛ, ɩ̃ a mɩnɛ ʋ na ƴɔ̃w a ba fɔb a Jeeju nɩ a kpaara, ʋ turʼã a sɔr a ba taw ʋ cere nɩ a kpafʋ jie a nɩ-kʋ-daa juu.
A SƆDAALSƖ NA LAARA A JEEJU
(Mar 15.16-20, Jã 19.2-3)
27A jamana sɔdaalsɩ taw na a *Jeeju kulʼɩ̃ a jamana yir, ɩ̃ bʋɔl a sɔdaalsɩ ba jaa a ba wɩ tiw kolĩ ʋ. 28Ba yaw ʋ na a yele, ɩ̃ su ʋ kpar-jɩ̃ɛw, 29ɩ̃ wob a gʋʋr sapi kpa ʋ a juumɩ, ɩ̃ ƴɔ̃w ʋ a kakɩr a dʋrɩ̃ nuumɩ, ɩ̃ gburĩ a dume a ʋ nii-sɔw laara wuolo nɩ ʋ yele nɩ:
“Jufisɩ jamana yaa, yaanɩ!” 30Ɩ̃ pʋʋrɔ a natɛɛr ƴɔnɔ ʋ, ɩ̃ de a kakɩr ŋmeere nɩ ʋ a juumɩ. 31A mɩnɛ ba na la ʋ baar, ba yaw ʋ na a kpar-jɩ̃ɛw ʋlɔ, ɩ̃ lɛ su ʋ a ʋ yele, ɩ̃ taw ʋ cere nɩ a kpafʋ jie.
A JEEJU A NƖ-KƲ-DAA JUU KPAFƲ
(Mar 15.21-32, Lu 22.26-43, Jã 19.17-27)
32A mɩnɛ ba na yire a tẽw pʋɔ, ba tuorʼɩ̃ na a daba na yi a
Sɩɩrɛn, ba na bʋɔlɔ a Sɩmɔ̃, a sɔdaalsɩ fɛr ʋ ʋ de a *Jeeju nɩ-kʋ-daa tuo. 33A lɛ ba na ta a jie ʋlɔ ba na bʋɔlɔ a Gɔlgɔta, a lɛ-ƴelʼã a “Juŋman Jie”, 34ba kʋ ʋ na a dɩvɛ̃ ba na nyakarɩ̃ a tɩ̃ɩ. Ɩ̃ a mɩnɛ ʋ na ꞌlɛm nyɛ a lɛ, ꞌwaa bʋɔrɔ a nyufʋ wa.
35A lɛ ba na kpa ʋ yaal baar, ba ŋme na a gbã po nɩ a ʋ cẽcẽne, 36ɩ̃ jɛ a be gu ʋ. 37Ba sɛbʼã a sɛbɛ kpa a ʋ ju-sɔ̃w na miile a ʋ kpafʋ par. A yelʼã a be: “A Jufisɩ Jamana Jeeju nɩ a nanɩ”. 38Ba mɩ kpa na nyanyube ayi a be, a bõ-ƴen a ʋ dʋrɩ̃ loor, ɩ̃ a kãw a ʋ gʋbaa loor.
39A nɩbɛ bala na dãa tɔlɔ a be vavire na a jur, tʋrɔ nɩ ʋ 40yele nɩ:
“A fʋ̃ʋ na dãa yel á fʋ na wɛlʼã a Naaŋmɩn puor-yir kpɛ̃ɛ, ɩ̃ lɛ mɛ ʋ a bibie ata pʋɔ, a ala ɩ a Naaŋmɩn Bie fʋ ɩ, faa a fʋ mɩ̃ɛ suu nɩ a nɩ-kʋ-daa juu.”
41A *baar-lo-nɩ-bɛrɛ nɩ a *ƴɛr-kpɛn-bɔɔnbɔ nɩ a bala na ɩ a ni-dierbe, mɩ laara ʋ na a lɛ yele nɩ:
42“Ʋ faa na nɩŋmɛɛ, ɩ̃ ma lɛ tʋɔrɔ faara a ʋ mɩ̃ɛ wa. Ʋ ɩ na a *Ɩsɩrayɛl jamana! ṹ suu a ƴɛ̃ƴɛrɩ̃ na a nɩ-kʋ-daa juu, ɩ̃ sɩ na tɩɛrɛ ʋ na. 43Ʋ barʼã a ʋ mɩ̃ɛ kʋ a Naaŋmɩn. A ala ɩ a Naaŋmɩn bʋɔrɔ ʋ na, ú faa ʋ a ƴɛ̃ƴɛrɩ̃ na, a-na-ɩ ʋ yelʼã á Naaŋmɩn Bie ʋ ɩ.”
44Ɩ̃ a nyanyube bala ba na mɩ kpa a be, kpɛrɛ ʋ na a lɛ.
A JEEJU KŨU
(Mar 15.33-41, Lu 23.44-49, Jã 19.28-30)
45A mɔtɔ̃-tuo daar a wɩɛr liw na a tẽw pʋɔ ʋ jaa wa ta nɩ a mɔtɔ̃w gɔrfʋ daar. 46Ɩ̃ a mɩnɛ a mɔtɔ̃w na gɔr, a *Jeeju wuurʼã nɩ kɔkɩr kpɛ̃w yele:
“Eli, Eli, lɛma sabatanɩ?” A lɛ yelʼã: “Ɩ̃ Naaŋmɩn, ɩ̃ Naaŋmɩn, bõ ɩ a fʋ bar ma?” 47A bala na dãa ɩraa a be, a nɩŋmɛɛ wõ na a ʋ wuurfʋ ɩ̃ yel:
“A Eli a nanɩ bʋɔlɔ”.
48Ɩ̃ a jie naan a bõ-ƴen jɔ na cen na de cẽcen kãw ƴɔ̃w dã-ɓiirũ pʋɔ, ɩ̃ ir tʋ̃ ƴɔ̃w kakɩr pʋɔ, tur a Jeeju a ʋ nyu. 49Ɩ̃-cɛ a nɩŋmɛɛ yel, á ú ɩra-lɛ. Á ba ꞌwuor je kãa, a ala ɩ a Eli na wa na faa ʋ.
50Ɩ̃ a Jeeju lɛ wuurʼã nɩ kɔkɩr kpɛ̃w, ɩ̃ kpi.
51A daar ʋlɔ pʋɔ, a cẽcen kpɛ̃ɛ ʋlɔ ba na dãa yaal a Naaŋmɩn puor-yir kpɛ̃ɛ pʋɔ ʋ ŋma a der ayi, nyɔw na a saꞌlon ɩ̃ ɓer wa suu nɩ a pulẽe. A tẽw damʼã, a kʋsɩ-bɛrɛ wɛl, 52a yar yuo, ɩ̃ a *duo-puorbo yaw bala na dãa kpi, irʼã a kũu pʋɔ. 53A mɩnɛ a Jeeju na ir a kũu pʋɔ baar, a bana nɩbɛ yi na a yar pʋʋr ɩ̃ kpɛ a Jerujalɛm-tẽw pʋɔ, a nɩ-yaw nyɛ ba.
54A lɛ a Orom sɔdaal-nɩ-kpɛ̃ɛ nɩ a bala na dãa be nɩ ʋ gure a Jeeju na nyɛ a mɩnɛ a tẽw na dam, nɩ a ala a jaa na ta, a dãbɩ̃ɛ nyɩrɩ̃ na nyɔw ba, a ba yel: “Sɩrɛ jaa ʋ! A daba na dãa na ɩ a Naaŋmɩn Bie.” 55A pɔɔ-yaw dãa na be be ɩ̃ ɩraa a nɩdaa ꞌwuoro, a pɔɔbɔ bala na dãa tuure a Jeeju sũono ʋ, wa yi nɩ a Galile-tẽw pʋɔ. 56A ba pʋɔ, Madala Maarɩɩ dãa na be be, nɩ a Maarɩɩ ʋlɔ na ɩ a Jakɩ nɩ a Jojɛfʋ mã, pɔw nɩ a Jebede bi-dabsɩ ayi mã.
A JEEJU ŨUFƲ
(Mar 15.42-47, Lu 23.50-56, Jã 19.38-42)
57A mɩnɛ a jaanʋɔr na ta, dab-naaba na dɩ a Jojɛfʋ yi na a Arimate-tẽw ɩ̃ wɩ. (A Jojɛfʋ ʋlɔ, ʋ mɩ dãa na ɩ a *Jeeju *par-tuure). 58Ʋ cenʼã a *Pɩlatɩ sɛ̃ na sʋɔr a kũu, a Pɩlatɩ sɔw, ɩ̃ yel a ba kʋ ʋ, 59ʋ de a kũu vilĩ nɩ ʋ a cẽcen paalaa, 60ɩ̃ cenʼɩ̃ ʋ na ƴɔ̃w a ʋ mɩ̃ɛ ya-paalaa pʋɔ ba na dãa kpu a kʋsɩpan pʋɔ, ɩ̃ bilĩ a kʋsɩr kpɛ̃ɛ pɔw a yaa nʋɔr, ɩ̃ kul. 61A Madala Maarɩɩ nɩ a Maarɩɩ ƴen sʋbɔ jɛ na a be a yaa par.
A YAA GUFƲ
62A lɛ a *bibi-ciiraa gbɛɛrɩ̃fʋ na vɩɛ, a *baar-lo-nɩ-bɛrɛ nɩ a *Farɩsɩ nɩbɛ cenʼã a *Pɩlatɩ sɛ̃ 63na yel ʋ:
“Nɩ-kpɛ̃ɛ, sɩ tɩɛrʼã yuo a mɩnɛ a bɛbɛlɛ na na dãa yel a lɛ ʋ na dãa cãa, á bibie ata pʋɔ, á ʋ na irʼã a kũu pʋɔ. 64Ala-ɩ̃-sɔ, ƴɔ̃w nɩbɛ a ba cen na gu a yaa, wa ta nɩ a bibie ata dayen, a ʋ *par-tuurbe kɔ̃ɔ wɩ ju a kũu, ɩ̃ yel a nɩbɛ, á ʋ irʼã a kũu pʋɔ wa, a mɩnɛ a ba bɛlɩ̃fʋ kɔ̃ wa gãw a dãdãw ben wa.” 65A Pɩlatɩ yel ba:
“Nyɩ́ nyɛ a gugurbe. Nyɩ́ taw ba cenʼɩ̃ na ƴɔ̃w a ba gu a mɩnɛ nyɩ na bʋɔrɔ”, 66a ba taw ba cenʼɩ̃ na man a mɩnɛ ba na gure a yaa, ɩ̃ maal a ba jɩbaa mar a yaa kubir juu.
Đang chọn:
Matie Sɛbɛ 27: BNT93
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
