Máfìù 17

Zízɛ̀ mɛ́ e vɔ̀ɔ

(Máà 9.2-13; Lúù 9.28-36)

1Yé lúó sáláádo e diea, Zízɛ̀ e Pílɛ̀, ɛ̃́ɛ̃́ Zĩ́ĩ̀ wà e lèe‐gé Zɔ̃̀ɔ̃́ o líé sí, e ló o ká tɔ̃̀ũ̀ gbèkèni dò wĩĩ́ o dòló ká. 2Lɛ̀ wa gɛ̃̀ɛ, kɛɛ Zízɛ̀ mɛ́ aà vɔ̀ɔ. À wɛlɛ mɛ́ nyɔ́nɔ́ e kɛ ɓɔpìà lɛ̀ nyɛ́nɛ́ lɛ́ ɓe. À mɔ̀‐sɔ̀ bɛ̃̀ɛ̃ e kɛ púlú lɛ̀ lɛ̀‐fɔ̀nɔɔ̀ɔ lɛ́ ɓe. 3Lɛ̀ e kɛ nɔ́ kília, o Móózè wà Ìláyà o gɛ̃̀, wà Zízɛ̀ nì wáà wèè. 4Pílɛ̀ a gèe Zízɛ̀ lɛ̀ɛ, “Ko Dàa‐mì, e kɛ sɛ̀ lɛ́ ko lɛ̀ɛ mɔ̀ɔ. É kɛ̀á i nàà‐ká‐wɔ̃̀ káa, ḿm̀ lo gbàa yààka dɔɔ̀ lɛ̀ɛ mɔ̀, kɛɛ i zì é kɛ ɓe, ɛ̃́ɛ̃́ Móózè zì é kɛ ɓe, e bɛ̀i, Ìláyà zì é kɛ ɓe.”

5Lɛ̀ e kɛ wéépìàa, lúé‐lúé púlú séléé e yà yi. À gbùlù e dɔ gbaa o là. O wéé dò ma, áà gò lúé‐lúéa yí weeá kélɛ̀, “M zì lɔ̀‐kɛ̀á‐nɛ̀ lɛ́ e yía. M zò dàà lɛ à píé. Kà ka tóó dɔ à mɔ̀.”

6Lɛ̀ tòà‐píé‐mìàa o wéé e kília maa, túó e o kɛ nyɔ́ɔ̀ɔ, tó wáà pèlè o gí là. 7Kɛɛ Zízɛ̀ e nu o píé, e pá o mɔ̀, áà gèè, “Kà wɛ̀lɛ̀. Yékɛ̀ ká túó.” 8Lɛ̀ o lɛ̀ gɛ̃̀ lɛ̀í gbaa, òó gbaa mi gbɛɛ gɛ̃̀ é kã́ Zízɛ̀ mɔ̀ɔ ká.

9Lɛ̀ o kɛ gópìà tɔ̃̀ũ̀a wĩĩ́a, Zízɛ̀ e mɛ́ĩ́ ɓo o lɛ̀ɛ weeá kélɛ̀, “Yékɛ̀ ká wɔ̃́ lɛ́ ka gɛ̃̀ɛ gèe mi nɔ́ɔ fé lɛ̀ɛ, é tóá kíli Mi Gbe é wɛ̀lɛ̀ ga kɛ̀lɛ̀.”

10Là tòà‐píé‐mìà wa wɛ̃́ĩ́‐lɔ̀ɔ kɛ weeá kélɛ̀, “Mɛ́ e kɛ lɛ́ Wálà kii‐dɔ‐mìàa ò gèe lɛ Ìláyà mɔ̀ é nu líé ɓɛ?”

11Zízɛ̀ a yí zṹ weeá kélɛ̀, “Ìláyà lɛ́ɛ̀ nu líé wánà ká, ɛ̃́ɛ̃́ lɛ́ɛ̀ lo pɛ séĩ́ pɛ̀ kɛɛ̀. 12Kɛɛ ḿm̀ gèe ka lɛ̀ɛ kélɛ̀, Ìláyà nuù lɛ. Kɛɛ mia òó gbaa à dɔ. Ɛ́ɛ̃́ wɔ̃́ lɛ́ wa naa ó kɛ à káa, wa kɛ à ká. Zi nɔ́ doóa káa, óò lo Mi Gbe sã̀ dɔɔ̀ à ká.”

13Lɛ̀ e kɛ kília, là tòà‐píé‐mìàa wa yí dɔ gbaa kélɛ̀ Zɔ̃̀ɔ̃́ mia bàtáì‐kɛ‐mì lɛ́ è à wɔ̃̀ gèe o lɛ̀ɛ.

Zízɛ̀ e nɛ́fú lɛ́ pɛ yɔɔ e kɛ à píéa la

(Máà 9.14-29; Lúù 9.37-43a)

14Lɛ̀ lɛ́ o ɓɔ mia kùa mɔ̀ɔ, gɔ̃ doó e nu Zízɛ̀ píé, e káá e kpuò là à wɛlɛ mɔ̀, áà gèè à lɛ̀ɛ, 15“M dàa‐mì, ì m gbe yéĩ̀ kṹ. Sãsã lɛ́ɛ̀ à kɛ̀. Lɛ́ɛ̀ wàa dìè kpó‐kpó ɓèlè. Teelea lɛ́ɛ̀ dà tíè, tó à gbú aà kɛɛ, áà dà yíí bà. 16M nu à ká ɓà tòà‐píé‐mìà píé. Kɛɛ òó gbaa bɛ̀i à mɔ̀ ó à la.”

17Zízɛ̀ a gèe kélɛ̀, “Míá ka ɓe yà kɔa ɓoa yí e ké ɓɛ. Zò‐dɔ̀à‐mɔ̀ gbɛɛ wá ka yí, ɛ̃́ɛ̃́ káà wɔ̃́ ni. Káà nàà ḿ kɛ ka píé lúó wɛ̀ɛɛ̀ píé? Lúó wɛ̀ɛɛ̀ píé lɛ́ kà nàà ḿ ka kɛ‐wɔ̃̀ káá ká m píé? Nu nɛ́fúa ká m píé zèe.” 18Lɛ̀ e kɛ kília, Zízɛ̀ e mɛ́ĩ́ ɓo pɛ yɔɔ lɛ̀ɛ. Pɛ yɔɔ e gó gbaa nɛ́fúa píé. Lɛ̀ e kɛ nɔ́ kília, nɛ́fúa e la gbaa.

19Lɛ̀ e kɛ kília, tòà‐píé‐mìàa o nu Zízɛ̀ píé o doó lɛ̀ píà, wáà gèè, “Mɛ́ e kɛ lɛ́ bɛ̀i lɛ̀ɛ́ gbaa kɛ ko mɔ̀ kɛ kó pɛ yɔɔ ɓo nɛ́fúa píé?”

20Zízɛ̀ a gèe o lɛ̀ɛ, “Bɛ̀i lɛ̀ɛ́ gbaa kɛ ka mɔ̀, ɓii ka zì zò‐dɔ̀à‐mɔ̀ɔ e kɛ nyɔ̀nɔ́ nyɔ́ɔ̀ɔ. Wánà‐wɔ̃̀ lɛ́ m̀ gèe ka lɛ̀ɛ ɓɛ. Zò‐dɔ̀à‐mɔ̀ e ka yía, é kɛ̀á lɛ gbùò vɔ̀ kélɛ̀ màà‐yè‐ŋèlè wɛ́lɛ́ doó kɛ̀‐gbɔ́ù‐kɔ̀ lɛ́ ɓea, káà bɛ̀i à mɔ̀ ká gèe tɔ̃̀ũ̀ e kéa lɛ̀ɛ, ‘Wɛ̀lɛ̀ lɛ̀ e kéa mɔ̀, í ló dĩ̀ĩ,’ tó áà lò. Wɔ̃́ dò lɛ̀ɛ́ ló kɛɛ̀ ɓe kɛ ká kɔ̃́ à kɛɛ̀ mɔ̀. [ 21Kɛɛ pɛ yɔɔ sùu e kéa, pɛ gbɛɛ lɛ̀ɛ́ bɛ̀i à ɓoò mi píé. Kɛɛ sɛ̀nɛ ɓoò wà lò sṹũ yí lɛ́ nɔ́ à ɓo mi píéa.]”

Zízɛ̀ e wɔ̃́ gèe é gbɛ̃̀á e ga‐wɔ̃̀ mɔ̀ zeĩ́

(Máà 9.30-32; Lúù 9.43b-45)

22Lɛ̀ tòà‐píé‐mìà séĩ́ o pá o kíe mɔ̀ Gálàlíìa, Zízɛ̀ a gèe o lɛ̀ɛ, “Óò lo Mi Gbe nɔɔ̀ gɔ̃à 23lɛ́ ò lo à zɛɛ̀ɛ lɛ̀ɛ. Kɛɛ lɛ́ɛ̀ lo wɛ̀lɛ̀ ga kɛ̀lɛ̀ à lɛ̀‐kpɛ̀iì yààka lùò ká.”

Lɛ̀ e kɛ kília, tòà‐píé‐mìàa o zò e dà zízàá kpó‐kpó ɓo.

Wálà‐kà mɔ́ɔ̀ pɛlèe

24Lɛ̀ Zízɛ̀ wà là tòà‐píé‐mìà o ló Kàpɛ́nìɛ̀a, mia lɛ́ ò Wálà‐kà mɔ́ɔ̀ nìíì sɔ̃̀ɔ̃́ ɓoa, o nu Pílɛ̀ píé, wa wɛ̃́ĩ́‐lɔ̀ɔ kɛ weeá kélɛ̀, “Kà pɛ‐zɔ̃̀ɔ̃̀‐mìa lɛ́ɛ̀ Wálà‐kàa mɔ́ɔ̀ nìíì sɔ̃̀ɔ̃́ ɓo kàáà?”

25Pílɛ̀ a gèe, “M̀m̀ɔ̀.”

Lɛ̀ Pílɛ̀ e ló káa wìa, Zízɛ̀ e mɛ́ĩ́ ɓo bèĩzɛ̀ weeá kélɛ̀, “Sáímɔ̀, mɛɛ kpó‐kpó lɛ́ e i zì yɛ́lɛ́‐táá yí? Dé è gòmɛ́nɛ̀ pɛ̀lèe wà nìíì sɔ̃̀ɔ̃́ ɓo kpóṹ là zèe líé‐sí‐mìà lɛ̀ɛ? Sɛ́lɛ́ yí ye‐nɛ́ vɔ̀ lɛ, ɛ̃́ɛ̃́ lɔ̀ɔ̀‐mìà vɔ̀ lɛ?”

26Pílɛ̀ a gèe kélɛ̀, “Lɔ̀ɔ̀‐mìà vɔ̀ lɛ.”

Zízɛ̀ a gèe à lɛ̀ɛ, “Yé lɛ mɔṹ kília, kɛɛ fã̀ã̀ káà lɛ sɛ́lɛ́ yí ye‐nɛ́ vɔ̀ mɔ̀. 27Kɛɛ kòó naa kó míá o kéa kɛ o zò é dà zízàá. À mɔ́ɔ̀ wɔ̃̀ mɔ̀ɔ, lo yíí‐pṹã́a sɔ́nɔ́, í kàa dà yíí bà. Kpã̀ã́ bèĩzɛ̀ lɛ́ ì lo à síìa, ì à sí, í lɛ̀ gɛ̃̀ à kpéĩ́. Íì lo pɛlèe lɛ́ è bɛ̀i kò ɓi kò Wálà‐kà nìíì sɔ̃̀ɔ̃́ɔ mɔ̀ɔ gɛ̃̀ɛ̃̀ yi. Ì à sí, í à nɔ o lɛ̀ɛ ko pèèlɛɛ ko mɔ́ɔ̀ wɔ̃̀ mɔ̀.”

Đang chọn:

Máfìù 17: MNT

Tô màu

Chia sẻ

So sánh

Sao chép