Markus 16
16
Si Yesus tumou sumawel
(Mat. 28:1-8; Luk. 24:1-12; Yoh. 20:1-10)
1Kelangkoi angé in endo Sabat, si Maria tou Magdala, si Maria inang i Yakobus, wo si Salome, mangé tumeles nanamur émaan solo eng kisu a mayat i Yesus. 2Wo asi endo kataré asi duminggu itu imamoondopé' keli, séra mangé ang kubur. 3An uner in lalan séra membuéian, “Éi, em batu aipénet ing kubur wangker keli. Wo si séi réén e mangé miléi im batu en untepanta?” 4Taan an tutuw éra makatawio mangé ing kubur, sérén éra em batu wangker imiléio an tampana.
5An tutuw éra muntep angé ang kubur, séra mangaya'ka' ampa'paan sérén éra ang kakan in tinekelan i mayat i Yesus awéan esa mangalitou mekarai ing kulo' makalukut. 6Wo icua i mangalitou itu ai séra, “Kamu ra'ica toro maindé'! Kailekanku sapaoka kamu maéré-éré si Yesus, si tou Nazaret si aisalip éra itu. Sia tinouo sumawel wo ra'io ka'i am bia'i. Sérén iow! Si tampa anio' en tinekelan i mayat-Na. 7#Mat. 26:32; Mrk. 14:28 Anaé intarépé', mangéo icua a sé murit-Na wo a si Petrus, tana'i, ‘Si Yesus itumouo sumawel wo Sia irumioro mangé ang Galilea. A mangé mbitu sérén iow oka Sia, tanu si sumangkumo aicua-Na ai camu.’ ”
8Kekawus ako in itu, séra makala'us kumesot ang kubur itu wo tumincas ampa'paan maindé'o keli wo mangaya-ngaya'ka'. Wo séra ra'ica kumua in sapa-sapa a sé tou ampa'paan séra maindé'o. [Wo icua éra ang karapi in da'ica lambot pakasa en taar itu a si Petrus wo sé kara-karapina. Kumawus itu, ampa'paan in taar i Yesus in esa a sé murit-murit-Na, wo mangé icua éra waya en taar-Na itu am pakasa ing kayo'baan tumo'tol a micona akar an tempok ako. En abar itu le'nas wo ra'ica kawisa maka'pu, siituo en abar andumoro' ing kalowiran akar ing kauré-uré.]
Si Yesus mapaturu' in owak-Na
(Mat. 28:9-10; Yoh. 20:11-18)
9Asi endo kataré an duminggu itu i mamoondo keli tutuw i Yesus tumou sumawel, kataré-taré Sia mangé mapaturu' in owak-Na a si Maria tou Magdala. Si Yesus sumangkumo musér sé pitu sétang kumesot ai sia. 10Wo mangé icuana a sé tou makiit si Yesus sé mala'lu-la'lupé' wo mengamé-ngamé'. 11An tutuw éra iluminga en aicua i Maria sapaoka si Yesus itumouo sumawel wo sinérénao, ra'ica percayan éra.
12Kekawus in itu, si Yesus mapaturu' in owak-Na a sé rua murit-Na. Séra in dua ang karoro'an i mawaya' maangé asi esa roong. Asi témpo itu ra'ica katuusan éra si Yesus, ampa'paan Sia kaséréan walina ra'io puté indior. 13Wo séra in dua maréng angé sumawel a sé kara-karapi éra walina wo icua éra sapaoka séra imeta'upo wo si Yesus, taan sé kara-karapi éra ka'i ra'ica mercaya.
14Ang kasiwakanna, si Yesus mapaturu' in owak-Na a sé sangapulu' esa murit-Na. An tutuw itu séra ang karoro'an i makan. Wo romaan-Na séra ampa'paan ing kaketéan in até éra wo ra'ica mercaya a sé tou sé isuméréo Sia itumou sumawel. 15#Kis. 1:8 Wo icua-Na ai séra, “Mangém kamu am pakasa ing kayo'baan, wo icuao mangé en Abar Kaaruien-Na a sé im pakasa in tou. 16Si séi e maéman a Yaku wo baptisen, sia malowir oka. Taan si séi si ra'- ica maéman a Yaku, makéré oka in ukuman. 17Sia'io en tuusna sé tou maéman a Yaku: Séra musér oka sé sétang maké i ngaran-Ku, rumoma' oka maké i nunuwu' walina si ra'ipé' sumangkum ako kailekan éra. 18Mandé séra tumimboi si ula' rumacu-racung wo melep racung séra ra'ica masapa-sapa. Séra maro ing kama a sé tou sumakit wo sé tou itu masama'.”
Si Yesus icaangkai angé an sorga
(Luk. 24:50-53; Kis. 1:9-11)
19 #
Kis. 1:9-11 Makanuwu' mako si Apo' Yesus a sé murit-Na, Sia icaangkai angé an sorga wo lumukut ang kakan i Amang Kasuruan. 20Kumawus ako in itu, sé murit i Yesus mangé am bisa-wisa wo mangé kumua in Abar Kaaruien andumoro' i Yesus Kristus, wo si Casuruan tumawoi mewali-wali wo tumawang iséra akar ro'na méma' in tuu-tuus kakaya'kaan, en tumuru' sapaoka en taar aicua éra itu ulit.
Đang chọn:
Markus 16: TNT
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
En Taar Weru a nunuwu' é Tontemboan @ LAI 2018
